Lwakusaanguna kuBatesalonikka
4 Chamamanino bakombima, mbuli mbumwakatambula malayilile kuzwa kulindiswe, aatondeezya mbumweelede kweenda kuti mubotezye Leza, mbuli mbumulikweenda kale, tulikumukumbila akumukombelezya kwiinda muMwaami Jesu, kuti mwiinkilile kunembo kuchita oobo munzila iizwide. 2 Nkaambo mulaazi malayilile ngitwakamupa kwiinda muMwaami Jesu.
3 Nkaambo kuyanda kwaLeza nkooku, mweelede kusalala akutantamuka bwaamu.* 4 Umwi awumwi wanu weelede kuziba mbayelede kweendelezya mubili wakwe mukusalala amubulemu, 5 kutali kwiinda mukutangala, mukuba aachiyandisyo chitanyoneki mulizyakoonana mbuli mbubachita bantu bazisi batazi Leza. 6 Taakwe muntu weelede kwiinzilizya aamigaano iibikkidwe akubisizya mukombinyina kumakani aaya, nkaambo Jehova* uzoobasubula bantu bachita zintu zyoonse eezi, mbuli mbutwakamubuzya kale akumuchenjezya. 7 Nkaambo Leza taakatwiitila kutasalala pe, pesi wakatwiitila busalali. 8 Nkinkaako, muntu uunyansya makani aaya, tanyansyi muntu pe, pesi unyansya Leza, ooyo uumupa muuya wakwe uusalala.
9 Nikuba oobo, kumakani aaluyando lwabuzyalwama, takuyandikani kuti tumulembele biya pe, nkaambo inywe muyiisigwa aaLeza kuti muyandane. 10 Eezi biya nzizyo nzimulikuchita kubakombima boonse bali muMakkedoniya yoonse. Pesi bakombima, tumusungwaazya kuti mwiinkilile kunembo kuchita oobo munzila iizwide. 11 Aabe makanze aanu kukkala muluumuno, akuti mutanjilili makani aatali aanu akuti mubeleke amaboko aanu mbuli mbutwakamuyiisya, 12 kuchitila kuti mweende bweelede kunembo lyabantu bakunze akuti mutabuli chintu.
13 Mukuyungizya bakombima, tuyanda kuti muzibe makani aali atala abaabo balikoona mulufu, kuchitila kuti mutawusi mbuli mbubachita bamwi boonse batakwe bulangilizi. 14 Nkaambo kuti katuli aalusyomo lwakuti Jesu wakafwa mpawo wabusigwa, nkukwaamba kuti Leza uzoobabusya kuti babaamwi anguwe, aabo bakoona mulufu kwiinda muli Jesu. 15 Nkaambo eezi nzizyo nzitumubuzya kwiinda mujwi lyaJehova,* kuti iswe tubawumi nitunoopona kusikila kuchiindi chakubawo kwaMwaami, tatuzoobasaangunini pe aabo bakoona mulufu, 16 nkaambo Mwaami lwakwe uzooseluka kuzwa kujulu akupa malayilile ajwi pati, ajwi lyangilozi mpati, amweembo waLeza, mpawo aabo bafwide bajisini aaKkristu bazoosaanguna kubuka. 17 Kuzwa waawo, iswe tubawumi nitunoopona, tuzootolwa mumayoba katulaamwi ambabo kuti tukaswaanane aaMwaami mujulu. Alubo tunooli aaMwaami chiindi choonse. 18 Nkinkaako, amwiinkilile kunembo kuumbulizyania amajwi aaya.