Lwabili kuBakkorinte
9 Kumakani aali atala amulimu wakugwasya basalali, takuyandikani kuti ndimulembele pe, 2 nkaambo ndilichizi chiyandisyo chanu chilikupa kuti ndimudundilizye kubantu bakuMakkedoniya, kuti bantu baku-Akkaya baba aamunyaka uumwi kabalibambilide kugwasya alubo busungu bwanu bwasungwaazya biingi aakati kabo. 3 Pesi ndilikutuma bakombima, kuchitila kuti kumudundilizya nkutulikuchita kunkani eeyi kutabi kwabuyo, kuchitila kuti mulibambile choonzyo, mbuli mbundakaambide kuti munoolibambilide. 4 Nkaambo, kuti bantu bakuMakkedoniya basala kuza aandime, mpawo bazoojane kamutalibambilide, ime ndizooba aabweeme kuswaanizya andinywe, nkaambo twakali kumusyoma. 5 Nkinkaako, lino ndabona kakuyandikana kuti ndisungwaazye bakombima kuti baze kulindinywe kakuchili chiindi, kuti bazoobambe chipo chanu chipati nchimwakasyomezya kupa kakuchili chiindi, kuchitila kuti chibe chipo chipegwa muntu kaliyandila kutali kuti kamanikizigwa biya pe.
6 Pesi nzindilikwaamba nzeezi, kufumbwa uubyala ziche uzootebula ziche alubo kufumbwa uubyala zyiingi uzootebula zyiingi. 7 Umwi awumwi achite kweendelana ambaasala mumoyo wakwe, kutali kupa katayandi naakuti kalikumanikizigwa, nkaambo Leza uyanda muntu uupa kabotelwa.
8 Mukuyungizya, Leza ulakonzya kupa kuti luzyalo lwakwe lupati loonse luvule kulindinywe, kuchitila kuti chiindi choonse kutabi chintu nchimubula muzintu zyoonse, akuti mube aazyiingi akaambo kamulimu woonse mubotu. 9 (Mbuli mbukulembedwe kuti: “Wapa zipo zyiingi,* wapa bafwaba. Bululami bwakwe bunooliwo kukabe kutamani.” 10 Ooyo uupa mulimi mbuto nyingi alubo uupa bantu chinkwa chakulya, uzoomupa mbuto alubo uzooyivuzya kuchitila kuti mubyale alubo uzooyungizya butebuzi bwabululami bwanu.) 11 Muzintu zyoonse, mulikulongezegwa kuchitila kuti mupe zyiingi munzila zyoonse, mpawo eezi zipa kuti bantu balumbe Leza kwiinda mulindiswe, 12 nkaambo mulimu ooyu wakugwasya bantu, tawupi kuti basalali bajane zintu nzibabulide kupela, pesi upa kuti bantu biingi balumbe Leza. 13 Akaambo kabukamboni bupegwa aamulimu ooyu wakugwasya bantu, bantu balumbayizya Leza nkaambo mulalibombya kumakani mabotu aali atala aKkristu, mbuli mbumwakaambilizya aantanganana, nkaambo mulabapa zipo zyanu amoyo woonse kuswaanizya abantu boonse. 14 Alubo munkombyo zyakumukombelezezya, batondeezya kuti balamuyanda akaambo kaluzyalo lupati loko lwaLeza luli aalindinywe.
15 Alumbwe Leza akaambo kachipo chakwe chitabbadalwi alubo chitapandululiki pe.