Lwakusaanguna kuBakkorinte
9 Tandaangunukide na? Tandili mwaapostoli na? Teendakamubona na Jesu Mwaami wesu? Inywe tamuli mulimu wangu na muMwaami? 2 Nikuba kuti tandili mwaapostoli pe kuli bamwi, pesi kwaamba choonzyo, ndili mwaapostoli kulindinywe. Nkaambo inywe muli chitondeezyo chitondeezya kuti ndili mwaapostoli muMwaami.
3 Nkoku kulisandwida kwangu kuli baabo bandilanga-langa: 4 Tuli aacheelelo chakulya akunywa, teembubo na? 5 Tuli aacheelelo chakusindikilwa aamwanakazi uusyoma mbuli bamwi baapostoli boonse, abanike baMwaami, aKkefasi,* teembubo na? 6 Ndime aBbanabbasi kupela na nitweelede kubeleka kuti tujane chakuponaacho? 7 Mpali na musoja uubelesya mali yakwe kuti kalikuchita mulimu wabusoja? Ngwani uunga wabyala masaansa pesi katalyi michelo yawo? Ngwani uunga weembela lubono, pesi katanywi malili aalubono oolo?
8 Ndilikwaamba zintu eezi mbuli mbubayeeya na bantu? Anguwo Mulawu tawuzyaambi na zintu eezi? 9 Nkaambo muMulawu waMozesi kulilembedwe kuti: “Toyelede kwaanga pule wang’ombe kumulomo chiindi napola zilyo.” Mbapule bang’ombe na Leza mbali aandaba ambabo? 10 Taakaamba oobo akaambo kandiswe na? Kwaamba choonzyo, makani aaya akalembwa akaambo kandiswe, nkaambo muntu uulima amuntu uupola, bachita oobo kabalangilila kupegwa chaabilo.
11 Kuti kakuli kuti twakabyala zintu zyakumuuya aakati kanu, tunooli twabisya na kuti twatebula zintu zitugwasilizya kumubili kuzwa kulindinywe? 12 Kuti bamwi bantu kabali aacheelelo chakumubuzya kuti mubape zimwi zintu, aniswe tatweelede kuchita oobo na kwiinda mbabo? Nikuba oobo, tatuchibelesezye pe cheelelo eechi,* pesi tulikulisimya muzintu zyoonse, kuchitila kuti tutasinkili makani mabotu aali atala aKkristu munzila yoonse. 13 Tamuzi na kuti bantu bachita milimu iisalala balya zintu zyamutempele, akuti aabo babeleka aachipayililo chiindi choonse bajana chaabilo kuzwa kuchipayililo? 14 Munzila iikozyenie, Mwaami wakalayilila kuti aabo baambilizya makani mabotu bapone akaambo kamakani mabotu.
15 Pesi taakwe chintu nichiba chimwi nchindakabelesya aakati kazintu eezi. Kwaamba choonzyo, ndilikulemba zintu eezi kutali kuti ndichitilwe zintu eezi, nkaambo zilikabotu kuti ndifwe kwiinda kuti—taakwe muntu uukonzya kundinyanga twaambo tupa kuti ndilidunde. 16 Kuti kandilikwaambilizya makani mabotu, taakwe kaambo keelede kupa kuti ndilidunde, nkaambo nguumulimu ngundakapegwa. Kwaamba choonzyo, ndili aapenzi kuti teendaambilizya makani mabotu. 17 Kuti ndachita mulimu ooyu kandiliyandila, ndili aabulumbu, pesi nikuba kuti ndawuchita kanditayandi, ndichili aamulimu wabulangizi ngundakapegwa. 18 Ani mpo bulumbu bwangu mbwanzi? Mbwakuti, nindaambilizya makani mabotu, ndaambilizye kanditabbadalisyi pe, kuchitila kuti manguzu aangu ndaabelesye kabotu* akaambo kamakani mabotu.
19 Nkaambo nikuba kuti ndilaangunukide kubantu boonse, ndalichita kuba muzike kubantu boonse, kuchitila kuti, kuti kazikonzeka ndijane bantu biingi. 20 KumaJuda ndakaba mbuli muJuda, kuchitila kuti ndijane maJuda. Kuli baabo bali aansi aamulawu, ndakaba mbuli muntu uuli aansi aamulawu nikuba kuti ime tandili aansi aamulawu, kuchitila kuti ndijane aabo bali aansi aamulawu. 21 Kubantu batakwe mulawu, ndakaba mbuli muntu uutakwe mulawu, kuchitila kuti ndijane aabo batakwe mulawu nikuba kuti nditobela mulawu waLeza akuti ndili aansi aamulawu waKkristu. 22 Kubantu batakwe manguzu, ndakabula manguzu, kuchitila kuti ndijane aabo batakwe manguzu. Ndaba zintu zyoonse kubantu bamisyobo yoonse, kuchitila kuti ndifutule bamwi kuti kazikonzeka. 23 Pesi ndichita zintu zyoonse akaambo kamakani mabotu, kuchitila kuti ndaabuzye bamwi.
24 Tamuzi na kuti basikuchijaana mumuzundaano balachijaana boonse, pesi ngumwi biyo uujana bulumbu? Amuchijaane munzila yakuti mukajane bulumbu. 25 Muntu woonse uutola lubazu mumuzundaano* ulalinyona muzintu zyoonse. Bachita oobo kuti bajane bulumbu bunyonyooka,* pesi iswe tuchita oobo kuti tujane bulumbu butanyonyooki. 26 Nkinkaako, kuchijaana nkundilikuchita teekwamuntu uutazi pe kuti uya kuli, alubo kuwaala mfayindi nkundilikuchita teekwakuuma moya pe. 27 Pesi ndilawuwuma* mubili wangu akuupa kuti ube muzike, kuchitila kuti nindamana kukambawukila bamwi, nditajanwi kandili aamulandu pe.*