Makani mabotu aakalembwa aaMateyo
15 Mpawo baFarisi abalembi bakasika kuli Jesu kabazwa kuJerusalema kabati: 2 “Nkamboonzi basikwiiya bako nibasotoka tunsiya-nsiya twabantu bachiindi? Muchikozyano, tabasambi pe kumaboko* nibayanda kulya.”
3 Mpawo wakabasandula kuti: “Nkamboonzi inywe nimusotoka mulawu waLeza akaambo katunsiya-nsiya twanu? 4 Muchikozyano, Leza wakati, ‘Lemeka wuso abanyoko’ akuti, ‘Muntu uutukila* wisi naakuti banyina, weelede kujayigwa.’ 5 Pesi inywe mwaamba kuti, ‘Kufumbwa muntu uubuzya wisi naakuti banyina kuti, “Kufumbwa chintu nchindilaacho chikonzya kumugwasya, nchipo chibambilidwe kupegwa Leza,” 6 teelede kulemeka wisi pe.’ Nkinkaako, mwapa kuti jwi lyaLeza litagwasyi akaambo katunsiya-nsiya twanu. 7 Inywe nibasikuupa-wupa, Isaya wakali kwaamba choonzyo naakapolofita atala andinywe, naakati: 8 ‘Bantu aaba balandilemeka amilomo yabo, pesi myoyo yabo ili kule andime. 9 Kundikomba nkubachita nkwabuyo, nkaambo bayiisya milawu yabantu mbuli kuti ninjiisyo zyaLeza.’” 10 Mpawo wakayita nkamu yabantu kuti ize aafwiifwi, mpawo wakati kulimbabo: “Amuswiilile alubo muzimvwisisisye zyaambwa: 11 Zintu zinjila munkanwa lyamuntu, teenzizyo zipa kuti atasalali pe, pesi zintu zizwa munkanwa lyakwe, nzizyo zipa kuti atasalali pe.”
12 Mpawo basikwiiya bakasika kulinguwe bamubuzya kuti: “Ulizi na kuti baFarisi balebwa nibamvwa nzwaamba?” 13 Mpawo wakabasandula kuti: “Chilimwa choonse Taata wakujulu nchaakatabyala, chizoonyukulwa. 14 Amubaleke kabali boobo. Mbazulwidi boofu, nkinkaako, kuti moofu wazulwida moofunyina, boonse balawida mudindi.” 15 Petro wakati: “Tupandulwide chikozyanisyo eechiya.” 16 Mpawo wakati: “Andinywe tamunachimvwisisisya pe? 17 Tamuzi na kuti kufumbwa chintu chinjila munkanwa, chiinda mwida mpawo chizwe chiye muchimbuzi? 18 Nikuba oobo, kufumbwa zintu zizwa munkanwa, zizwa mumoyo alubo zintu eezyo nzizyo zipa kuti muntu atasalali pe. 19 Muchikozyano, mumoyo muzwa mizeezo mibi: bujayi, bumambi, bwaamu,* kubba, bukamboni bwakubeja, kusampula. 20 Zintu eezi nzizyo zipa kuti muntu atasalali pe, pesi kulya kutasambide* kumaboko, teenkuko pe kupa kuti muntu atasalali pe.”
21 Jesu naakazwa mpawaawo, wakaya kuchilawu chaTire aSidoni. 22 Lino bona, umwi mwanakazi wakuFonikke uukkala muchilawu eecho, wakasika mpawo wakoompolola kati: “Ndifwide luzyalo Mwaami, Mwana waDavida. Mwanaangu musimbi ulaadimoni limoombya loko.” 23 Pesi, taakwe jwi niliba limwi ndyaakamusandula pe. Nkinkaako, basikwiiya bakwe bakasika mpawo bakasaanguna kumubuzya kuti: “Mutande, nkaambo uzabututobela kalikoompolola.” 24 Mpawo wakasandula kuti: “Teendakatumwa kumuntu woonse pe, pesi ndakatumwa kumbelele zisweekede zyamung’anda ya-Israyeli.” 25 Pesi mwanakazi ooyo wakasika mpawo wakamufugamina kati: “Mwaami, ndigwasye!” 26 Pesi Jesu wakamusandula kuti: “Tazili kabotu pe kubweza chinkwa chabana akuchiwaalila tunkala.” 27 Mwanakazi ooyo wakati: “Iiyi Mwaami, pesi tunkala tulya bufwefwelenga buloka kuzwa aatebbulu lyabasimalelaato.” 28 Mpawo Jesu wakamusandula kuti: “Yoomwanakazi, lusyomo lwako ndupati, azichitike kulinduwe kweendelana ambuyanda.” Mpawo mwanaakwe musimbi wakapona kuzwa ku-awa njiyeeyo.
29 Naakazwa ooko, Jesu wakasika aafwiifwi akuLwizi lwaGalili mpawo naakatanta aachilundu, wakakkala nkukooko. 30 Mpawo makamu aabantu akasika kulinguwe alubo akaza aabantu bateendi, balemene, boofu, zimuumu, abamwi biingi, alubo bakabalazika kumawulu aakwe, mpawo wakabasilika. 31 Bantu bakagamba loko nibakabona zimuumu kazyaambuula, balemene kababa kabotu, bateendi kabeenda, aboofu kababona, mpawo bakalumbayizya Leza wa-Israyeli.
32 Pesi Jesu wakayita basikwiiya bakwe, mpawo wakati: “Ndabeetelela bantu aaba nkaambo bakkala aandime kwamazuba aatatu alubo taakwe nchibalya pe. Tandiyandi kuti beende aanzala,* nkaambo balakonzya koongelwa munzila.” 33 Nikuba oobo, basikwiiya bakamubuzya kuti: “Tulazijana kuli zinkwa zinga zilakkwana bantu boonse aaba mulusaka oolu?” 34 Mpawo Jesu wakati kulimbabo: “Mulaazinkwa zingana?” Bakati: “Zili musanu azibili atuswi tuche.” 35 Nkinkaako, naakabuzya nkamu yabantu kuti ikkalaansi, 36 wakabweza zinkwa zili musanu azibili atuswi, mpawo naakalumba, wakazikwamuna mpawo wakasaanguna kuzipa basikwiiya mpawo basikwiiya bakazipa bantu. 37 Bantu boonse bakalya, bakkuta alubo basikwiiya bakazuzya mabbasikiti mapati* aali musanu aabili achakulya chakasyaala. 38 Aabo bakalya bakali baalumi bali 4 000, kuswaanizya banakazi abana. 39 Kumamanino, kali wabuzya bantu kuti beende, wakatanta bwaato mpawo wakasika kuchilawu chaMagadani.