Makani aakalembwa aaMakko
1 Matalikilo aamakani mabotu aali atala aJesu Kkristu, Mwana waLeza: 2 Mbuli mbukulembedwe muli Isaya mupolofita kuti: “(Bona! Ndilikutuma mutumwa wangu kunembo lyako,* ooyo uutazookubambile nzila.) 3 Ijwi lyayooyo uulikoompolola munkanda kaliti: ‘Amubambe nzila yaJehova!* Amululamike migwagwa yakwe.’” 4 Johane Mubbabbatizi wakali munkanda kalikukambawuka kuti bantu beelede kubbabbatizigwa kuti batondeezye kuti basanduka, kuchitila kuti balekelelwe zibi. 5 Bantu boonse bamuJudiya abantu boonse bamuJerusalema, bakali kwiinka kulinguwe alubo bakali kubbabbatizigwa* aanguwe muMulonga waJodani, kabalyaambilila zibi zyabo aantanganana. 6 Johane wakali kuzwaata chigogo chakapangidwe aaboya bwankamela, alubo wakali kulyaanga bbanti lyachikumba muchibuno alubo wakali kulya nsozi abuchi bwamulusaka. 7 Alubo wakali kukambawuka kati: “Umwi muntu uuli aamanguzu kwiinda ndime, ulikuza musule lyangu, ooyo ngunditeeleli pe kukotama kuti ndaangunune ntambo zyamanyatela aakwe. 8 Ime ndimubbabbatizya aamaanzi, pesi we uzoomubbabbatizya aamuuya uusalala.”
9 Mumazuba aayo, Jesu wakazwa kuNazareta yakuGalili alubo wakabbabbatizigwa aaJohane muMulonga waJodani. 10 Mbaakazwa biyo mumaanzi, wakabona majulu kaajulika, amuuya kawuza aalinguwe mbuli nziba. 11 Mpawo kwakamvwigwa jwi kuzwa kujulu kaliti: “Uli Mwanaangu, uuyandwa, uundibotezya.”
12 Alubo aachiindi nchicheecho, muuya wakapa kuti aye munkanda. 13 Nkinkaako, wakakkala munkanda kwamazuba aali 40, kalikusunkwa aaSaatani. Wakali kukkala aabanyama, pesi ngilozi zyakalikumubelekela.
14 Johane naakasungwa, Jesu wakayinka kuGalili kayabukambawuka makani mabotu aaLeza, 15 kati: “Chiindi chibikkidwe chasika alubo Bwaami bwaLeza bwaswena aafwiifwi. Amusanduke, mube aalusyomo mumakani mabotu.”
16 Jesu naakali kuyabweenda kumbali aaLwizi lwaGalili, wakabona Simoni amwanikaakwe Andreya kabali kuwaala tunyandi twabo mulwizi, nkaambo bakali basikuzuba baswi. 17 Nkinkaako, Jesu wakati kulimbabo: “Amunditobele mpawo ndizoopa kuti mube basikuzuba bantu.” 18 Aachiindi nchicheecho, bakasiya tunyandi twabo, mpawo bakamutobela. 19 Naakaya aanembo-nembo, wakabona Jakkobo mwana waZebbediya amwanikaakwe Johane, kabali mubwaato bwabo kabali kusuma tunyandi twabo, 20 alubo wakabayita mpawaawo. Nkinkaako, bakasiya wisi, Zebbediya mubwaato kalaamwi ababelesi mpawo bakamutobela. 21 Mpawo bakanjila muKkapenawume.
Mbuyakatalika biyo Sabata, wakanjila muchikombelo mpawo wasaanguna kuyiisya. 22 Mpawo bakagamba loko akaambo kanzila njaakali kuyiisyaayo nkaambo wakali kubayiisya mbuli muntu uuli aamanguzu kutali mbuli balembi. 23 Aachiindi nchicheecho, muchikombelo chabo, mwakali umwi mwaalumi wakali kweendelezegwa aamuuya mubi alubo wakoompolola kati: 24 “Tuleenzi anduwe Jesu wakuNazareta? Wazida kuzootunyonyoona na? Ndizizi kabotu kuti nduwe Uusalala waLeza!” 25 Pesi Jesu wakawukalalila kati: “Umuna, uzwe mulinguwe!” 26 Mpawo muuya mubi, nwaakasuntusya mwaalumi ooyo, wakoompolola ajwi pati mpawo wakazwa mulinguwe. 27 Bantu boonse bakagamba loko akaambo kazeezi, zyakuti bakasaanguna kwaambuula muli chabo-chabo kabati: “Niinzi eechi? Ninjiisyo mpya na? Mwaalumi ooyu ulaamanguzu aakutanda myuuya mibi, alubo ilamuswiilila.” 28 Nkinkaako, makani aali atala anguwe akazula koonse-koonse chakufwambaana muchilawu choonse chaGalili.
29 Mpawo bakazwa muchikombelo bayinka kumuunzi waSimoni a-Andreya kabalaamwi aJakkobo aJohane. 30 Banyinazyala aaSimoni bakalilede kabalikupya mubili, mpawo bantu bakabuzya Jesu makani aaya chakufwambaana. 31 Wakasika mpubakabede, wabajata kuboko wababusya. Mpawo kupya mubili kwakamana alubo bakasaanguna kubajikila.
32 Nilyakaba goko, zuba kalili lyabbila, bantu bakasaanguna kumweetela bantu boonse bakali kuchiswa abakali aamadimoni, 33 mpawo muunzi woonse wakabungana aamulyango. 34 Nkinkaako, wakasilika bantu biingi bakali kuchiswa malwazi aasiyene-siyene alubo wakatanda madimoni miingi, pesi taakali kwaazumizya pe kuti aambuule nkaambo akalizi kuti nguKkristu.*
35 Kuseeni loko kakuchisiya-siya, Jesu wakabuka wazwa aanze, waya kundawu iitakwe bantu mpawo wakasaanguna kukomba kali nkukooko. 36 Nikuba oobo, Simoni abamwi mbaakalaabo bakamuvwima, 37 kusikila bamujana, mpawo bakati kulinguwe: “Bantu boonse balikukuyanduula.” 38 Pesi wakati kulimbabo: “Atwiinke kuliimwi ndawu, kumyuunzi ilaafwiifwi kuchitila kuti ndikakambawuke ankuko, nkaambo eezi nzizyo nzindakazida.” 39 Alubo wakeenda kayabukambawuka muzikombelo zyabo, muGalili yoonse alubo kalikutanda madimoni.
40 Alubo kwakasika umwi sichipele, mpawo wakamukombelezya kafugeme kati: “Kuti kuyanda, ulakonzya kundisalazya.” 41 Mpawo wakamweetelela alubo wakatandabika kuboko kwakwe, wamujata mpawo wakati kulinguwe: “Ndilayanda! Salazigwa.” 42 Chipele chakwe chakamana mpawaawo alubo wakasalala. 43 Mpawo wakamuchenjezya akumuleka kuti ayinke mpawaawo, 44 kati: “Utaabuzyi muntu pe makani aaya pesi yinka ukalitondeezye kumupayizi alubo ukape zintu nzyaakaamba Mozesi kuti usalazigwe, kuchitila kuti bube bukamboni kulimbabo.” 45 Pesi mwaalumi ooyo naakazwa, wakasaanguna kwaambilizya makani aaya akwaamwaya koonse-koonse, zyakuti Jesu taakachili kukonzya pe kunjila kufumbwa muunzi kaangunukide, pesi wakakkala aanze aamuunzi mundawu zitakwe bantu. Nikuba oobo, bantu bakali kusika kulinguwe kabazwa kundawu zyoonse.