Makani Aakalembwa aaLukka
12 Aachiindi eecho, zyuulu zyabantu nizyakabungana kazilikusyanikizyania, Jesu wakasaanguna kubuzya basikwiiya bakwe saansi kuti: “Amuchenjelele bumena bwabaFarisi, nkukwaamba kuupa-wupa. 2 Nkaambo taakwe chintu chivumbidwe kabotu-kabotu chitazooyubununwi alubo taakwe chintu chansiswa chitazoozibinkani. 3 Nkinkaako, kufumbwa zintu nzimwaamba mumudima, zizoomvwigwa mumumuni alubo nzimuvwiya-vwiya mumaanda aamukati, zizookambawukilwa aajulu aamaanda. 4 Mukuyungizya, nibeenzuma, ndimubuzya kuti, mutabayoowi pe aabo bajaya mubili pesi nibamana taachikwe chimwi nchibachikonzya kuchita pe. 5 Pesi ndilamutondeezya ngumweelede kuyoowa: Amuyoowe Ooyo uunga kuti wajaya, ulaamanguzu aakuwaalila muGehena.* Kwaamba choonzyo, ndimubuzya kuti, amuyoowe Nguwe. 6 Tutiiti tuli musanu tuuzigwa aatumali tubili tutakwe ambutubede,* teembubo na? Nikuba oobo, taakwe nikaba kamwi Leza nkaluba.* 7 Pesi naaba masusu aali mumitwe yanu alibalidwe woonse. Mutayoowi pe, muyandikana loko kwiinda tutiiti twiingi.
8 “Ndimubuzya kuti, muntu woonse uundizumina kunembo lyabantu, anguwe Mwanaamuntu uzoomuzumina kunembo lyangilozi zyaLeza. 9 Pesi kufumbwa muntu uundikaka kunembo lyabantu, uzookakwa kunembo lyangilozi zyaLeza. 10 Alubo muntu woonse waamba majwi mabi atala aMwanaamuntu, uzoolekelelwa pesi kufumbwa muntu uusampula muuya uusalala, tazoolekelelwi pe. 11 Chiindi nibamwiimikizya kunembo lyabantu babungene,* kubapati bamfulumende akubeendelezi, mutakataazikani pe atala akuti muzoowambuula biyeni naakuti muzootyeni nimulyiiminina akuti muzoowambaanzi, 12 nkaambo muuya uusalala uzoomuyiisya ku-awa njiyeeyo, zintu nzimweelede kwaamba.”
13 Mpawo umwi wakali munkamu yabantu wakati kulinguwe: “Muyiisi, buzya mukulanaangu kuti andaabile lukono.” 14 Wakati kulinguwe: “Yoomwaalumi, ngwani wakandisala kuti ndibe mubetesi wanu naakuti ndibe sikumwaabania zintu?” 15 Mpawo wakati kulimbabo: “Amukkale kamujulide meso alubo amuchenjelele misyobo yoonse yakutangala nkaambo nikuba muntu kalaazintu zyiingi, buumi bwakwe tabuzwi kuzintu nzyalaazyo.” 16 Mpawo wakababuzya chikozyanisyo eechi, wakati: “Muunda wawumwi mwaalumi uunotede wakaba aazilyo zyiingi. 17 Nkinkaako, wakasaanguna kulibuzya kuti, ‘Ndichite biyeni lino mbukunga tandikwe aakubikka zilyo zyangu?’ 18 Mpawo wakati: ‘Yaa, ndayeeya: Ndiladilisya matala ngindilaawo, mpawo ndiyake mapati munditabikkile zilyo zyangu zyoonse azintu zyangu zyoonse, 19 mpawo ndilalibuzya kuti: “Ulaazintu zyiingi zibotu zinooliwo kwaminyaka myiingi, nkinkaako lyiibe, ulye, unywe alubo ubotelwe.”’ 20 Pesi Leza wakati kulinguwe, ‘Yoomufuba-fuba, mansiku aano balabuyanda buumi bwako. Zintu nzwaakabunganizya zilaba zyani?’ 21 Nkinkaako, mbukutazoobe kumuntu uulibunganisizya zintu zyiingi pesi katanotede pe kuli Leza.”
22 Mpawo wakabuzya basikwiiya bakwe kuti: “Nchindilikumubuzya kuti, amuleke kukataazikana atala abuumi bwanu kuti muzoolyaanzi naakuti atala amibili yanu kuti muzoozwaataanzi. 23 Nkaambo buumi buyandikana loko kwiinda chakulya alubo mubili uyandikana loko kwiinda zyakuzwaata. 24 Amuyeeye bachikwangala. Tababyali mbuto pe nikuba kutebula alubo tabakwe matala naaba maanda aakubambila zintu pesi Leza ulabasanina. Inywe tamuyandikani loko na kwiinda bayuni? 25 Ngwani aakati kanu uukonzya kulampya buumi bwakwe naaba aaniini* akaambo kakukataazikana? 26 Nkinkaako, kuti kamutakonzyi kuchita chintu eechi chiniini, nkamboonzi nimulikataazya atala azimwi zintu? 27 Amuyeeye mbaakomena maluba aamulusaka: Taabeleki pe nikuba kusuma, pesi ndimubuzya kuti, naaba Solomoni mubulemu bwakwe boonse, taakwe naakazwaata munzila mbotu mbuli limwi lyawo. 28 Kuti Leza kazwaatika zimena zyamulusaka munzila eeyi, ziliwo sunu mpawo juunza zyawaalilwa mumulilo, nkukwaamba kuti uzooyindilila kumupa zyakuzwaata inywe nimuli aalusyomo luniini! 29 Nkinkaako, amuleke kuyanduula nzimuyoolya anzimuyoonywa. Alubo amuleke kukataazikana zyiindilide, 30 nkaambo zintu zyoonse eezi nzizyo zilikwaandililwa aazisi zyamunyika pesi Wuso ulizi kuti mulaziyanda zintu eezi. 31 Pesi amwiinkilile kunembo kuyanduula Bwaami bwakwe alubo zintu eezi, zizooyungizigwa kulindinywe.
32 “Mutayoowi pe nikatanga kaniini, nkaambo Wuso wasala kumupa Bwaami. 33 Amuuzye zintu zyanu mpawo mupe zipo zyalweetelelo.* Amupange zikwama zyamali zitazakali, nkukwaamba bunoti butamani kujulu, ooko basikubba nkubatasiki azyuuka nkuzitakonzyi kubulya. 34 Nkaambo ooko kuli bunoti bwanu, nkwiinoobede myoyo yanu.
35 “Amuzwaate, mulibambile* alubo malambe aanu akkale kaayaka. 36 Alubo amube mbuli bazike balikulinda simalelaabo kuti asike kuzwa kumuchado, kuchitila kuti aasika akukonkomona, bamujulile mpawaawo. 37 Balabotelwa bazike aabo, naasika simalelaabo ajane kabalindide! Kwaamba choonzyo, ndimubuzya kuti, uzoozwaata* zigogo zyamulimu kuti abeleke mpawo uzoobabuzya kuti bakkale aatebbulu alubo uzooswena kuti abape chakulya. 38 Alubo bazike aabo balabotelwa kuti wasika aachiindi chakulinda chachibili* naakuti aachiindi chakulinda chachitatu* mpawo ajane kabalibambilide! 39 Pesi amuzibe kuti, kuti mwining’anda kazi kuti sikubba usika ku-awa iili, walikunookkala kalindide, kuchitila kuti sikubba atanjili mung’anda yakwe. 40 Andinywe amukkale kamulibambilide, nkaambo Mwanaamuntu ulasika ku-awa njimutayeeyeli pe.”
41 Mpawo Petro wakati: “Mwaami, chikozyanisyo eechi ulikuchibuzya ndiswe kupela na, naakuti ulikuchibuzya bantu boonse?” 42 Pesi Mwaami wakati: “Ngwani loko mulangizi uusyomeka alubo uuchenjede* ooyo simalelaakwe ngwatasale kuti alanganie babelesi bamung’anda yakwe kuti akkale kabapa chakulya chabo chikkwene aachiindi cheelede? 43 Ulabotelwa muzike ooyo kuti aazoosika simalelaakwe, azoojane kachita mbuboobo! 44 Ndilikumubuzya choonzyo kuti, uzoomusala kuti alanganie zintu zyakwe zyoonse. 45 Pesi kuti muzike ooyo waamba kuti mumoyo wakwe, ‘Simalelaangu wanonoka kusika,’ mpawo wasaanguna kuuma bazike bachaalumi abachanakazi akulya akunywa akukolwa, 46 simalelaakwe uzoosika mubuzuba mbwatayeeyeli pe aku-awa njatazi pe alubo uzoomupa chisubulo chipati akumubikkaamwi abantu batasyomeki. 47 Mpawo muzike wakamvwisisisya zintu ziyandwa aasimalelaakwe mpawo waleka kulibambila naakuti kuchita nzyaakabuzigwa, uzoowumwa zimboko zyiingi. 48 Pesi muzike wakatamvwisisisya mpawo wachita zintu zyuumya, uzoowumwa zimboko ziche. Kwaamba choonzyo, muntu woonse wakapegwa zyiingi, kuzooyandwa zyiingi kulinguwe alubo ooyo wakasalwa kuti alanganie zintu zyiingi, kuzooyandwa zyiingi loko kulinguwe.
49 “Ndakazida kuzooyasya mulilo aanyika. Mulilo ooyo wayaka kale, ndichiyandaanzi chimbi? 50 Kwaamba choonzyo, kuli kubbabbatizigwa nkundeelede kuchita, alubo ndinookataazikene kusikila kukamane! 51 Mubonaanga ndakazida kuzoopa kuti kube luumuno na aanyika? Peepe, pesi ndimubuzya kuti, ndakazida kuzoopa kuti kube kwaanzaana. 52 Kuzwa lino kaziya kunembo, mumpuli kunooli bantu bali musanu batajisini, batatu bazoobukila babili alubo babili bazoobukila batatu. 53 Mumpuli banoowanzeene, wisi uzoobukila mwana mulombe, mwana mulombe uzoobukila wisi, banyina bazoobukila mwana musimbi, mwana musimbi uzoobukila banyina, alubo banyinazyala bazoobukila mukamwana, amukamwana uzoobukila banyinazyala.”
54 Alubo wakabuzya makamu aabantu kuti: “Kuti mwabona joba kububbila nga mwabukaakuti, ‘Kulikuza mvula mpati iili aaguwo’ alubo nga yawa choonzyo. 55 Alubo kuti mwabona guwo lyuunga kalizwa kumusanza, nga mwati, ‘Kunoopya loko,’ alubo nga kwapya choonzyo. 56 Nibasikuupa-wupa, mulakonzya kupandulula mbukubede aanyika ambulibede julu, pesi nkamboonzi nimutakonzyi kupandulula chiindi eechino? 57 Nkamboonzi nimutakonzyi kubeteka munzila iiluleme? 58 Muchikozyano, kuti kuli kuya kumwaami amuntu uuli akaambo anduwe, yezya amanguzu aako woonse kuti mwaambulilane kamuchili munzila, kuchitila kuti atakutoli kumubetesi nkaambo mubetesi uzookutola kumupulisa wankuta alubo mupulisa ooyo uzookuwaalila mujele. 59 Ndikubuzya kuti, tukazwi pe mujele kusikila ukabbadale kamali kaniini kamamanino.”*