Lwakusaanguna kuBatesalonikka
5 Bakombima, kumakani aali atala aziindi amazuba aabikkidwe, taakwe nchimweelede kulembelwa pe. 2 Nkaambo inywe lwanu muzizi kabotu kuti buzuba bwaJehova* bulikuza mbuli mbasika mubbi mansiku. 3 Kufumbwa chiindi nibanoowamba kuti, “Luumuno akulyiiba!” mpawo lunyonyooko lulabukaakubasikila kabatayeeyeli pe, mbuli kumyongwa kwamwanakazi uulaada, alubo tabakachiji pe naaba aaniini. 4 Pesi inywe bakombima, tamuli mumudima pe zyakuti buzuba oobo nga bulamusikila kamulyiibide mbuli mbubukonzya kusikila babbi, 5 nkaambo inywe moonse muli bana bamumuni abana basikati. Tatuli bamansiku pe naakuti bamudima.
6 Nkinkaako, tutooni pe mbuli mbubachita bamwi boonse, pesi atukkale katulangide alubo katuyeeya kabotu. 7 Nkaambo aabo boona, boona mansiku alubo aabo bakolwa, bakolwa mansiku. 8 Pesi iswe nituli basikati, atuyeeye kabotu, tuzwaate chigogo chakukwabilila kaango chalusyomo, aluyando angowani yabulangilizi bwalufutuko, 9 nkaambo Leza taakatusalila bukali pe, pesi wakatusalila kujana lufutuko kwiinda muMwaami wesu Jesu Kkristu. 10 Wakatufwida, kuchitila kuti kufumbwa kuti tulilangide naakuti tulikoona,* tuponaamwi anguwe. 11 Nkinkaako, amwiinkilile kunembo kusungwaazyania* akuyakana mbuli mbumulikuchita kale.
12 Lino bakombima, tulikumukumbila kuti mubalemeke aabo balikubeleka changuzu aakati kanu, akumuzulwida muMwaami akumulayilila 13 akuti mubalemeke loko munzila yaluyando akaambo kamulimu wabo. Amukkale muluumuno abamwi. 14 Kuli limwi bbazu, tulikumusungwaazya bakombima kuti muchenjezye* bapilingene, muumbulizye bawuside,* mugwasye batakwe manguzu, mube aamoyo mulamfu kubantu boonse. 15 Amubone kuti taakwe muntu uubweedezya chibi kuchibi kumuntu woonse, pesi chiindi choonse amusungwaalile kuchita zibotu kuli umwi awumwi akuli bamwi boonse.
16 Amubotelwe chiindi choonse. 17 Amukombe chiindi choonse. 18 Amube bantu balumba muzintu zyoonse. Eezi nzizyo nzyayanda Leza kuti muchite muli Kkristu Jesu. 19 Mutazimi mulilo wamuuya. 20 Mutabunyansyi pe bupolofita. 21 Amube aachoonzyo azintu zyoonse. Amujatisisye kuzintu zibotu. 22 Amutantamuke bubi boonse.
23 Leza waluumuno, amusalazye chakumaninina. Alubo muuya, buumi amubili wanu bakombima, azikkwane mumbazu zyoonse, zibambwe kazisalala muchiindi chakubawo kwaMwaami wesu Jesu Kkristu. 24 Ooyo uulikumwiita ulasyomeka alubo kwaamba choonzyo, uzoochita oobo.
25 Bakombima, amwiinkilile kunembo kutukombela.
26 Amubajuzye bakombima boonse amyonto iisalala.
27 Ndilikumulayilila muMwaami, kuti lugwalo oolu lubalilwe bakombima boonse.
28 Luzyalo lupati lwaMwaami wesu Jesu Kkristu alube aandinywe.