Makani Aakalembwa aaLukka
1 Nindakabona kuti bantu biingi bakeezya kubunganizya akulemba makani aachoonzyo ngitusyoma zizwide andiswe, 2 mbuli mbutwakaabuzigwa abaabo bakalibonena zintu eezi kuzwa kumatalikilo akwaambilizya atala amakani aaya, 3 andime ndakasala kuti nditobelezye zintu zyoonse mbuli mbuzibede kuzwa kumatalikilo, kuti ndikulembele makani aaya mbuli mbaatobelana, nuulemekwa Tiyofilasi, 4 kuchitila kuti ubone mbaasyomeka makani ngwaakayiisigwa mulomo mpande.
5 Mumazuba aaHerodi* mwaami waJudiya, kwakali mupayizi uutegwa Zakkariya wakabunga kabapayizi ka-Abbija. Mwanakazi wakwe wakali kuzwa kubana basimbi ba-Aroni alubo zina lyakwe wakali Elizabbeti. 6 Boonse kabali babili bakaliluleme kunembo lyaLeza alubo teebakalikwe mulandu pe nkaambo bakali kutobelezya milawu yoonse amalayilile aaJehova.* 7 Nikuba oobo, teebakalikwe mwana pe nkaambo Elizabbeti taakali kuzyala pe alubo boonse bakali bachembaala.
8 Zakkariya naakali kubeleka mulimu wabupayizi kunembo lyaLeza, mbukunga wakali mweenya wakabunga kabo 9 kweendelana achiyanza chabapayizi, wakanjila mundawu iisalala yaJehova* kuti atente tununkilizyo nkaambo chakali chaba chiindi chakwe. 10 Aachiindi chakutenta tununkilizyo, bantu boonse bakali aanze kabali kukomba. 11 Mpawo ngilozi yaJehova* yakaboneka kulinguwe kayiimvwi kuchilisyo lyachipayililo chatununkilizyo. 12 Zakkariya naakabona zintu eezi, wakakataazikana alubo wakayoowa loko. 13 Pesi ngilozi yakati kulinguwe: “Utayoowi pe Zakkariya, nkaambo nkombyo zyako zyakukombelezya zyamvwigwa. Mwanakazi wako Elizabbeti uzooba aamwana mulombe alubo weelede kumuuzika zina lyakuti Johane. 14 Uzookondwa akubotelwa loko alubo bantu biingi bazoobotelwa mwana ooyo aazoozyalwa, 15 nkaambo unooli mupati mumeso aaJehova.* Nikuba oobo, teelede kunywa wayini naakuti zintu zikola alubo uzoozula muuya uusalala nikuba katanazyalwa.* 16 Alubo uzoogwasya bana ba-Israyeli biingi kuti babweede kuli Jehova* Leza wabo. 17 Uzooyinka kunembo lyaLeza kali aabusungu* amanguzu ngaakalaawo Elija, kuti asandule myoyo yamawisi ibe mbuli yabana akuti bantu bataswiilili bajane busongo bwabantu baluleme, kuchitila kuti Jehova* abe aabantu balibambilide.”
18 Pesi Zakkariya wakati kungilozi eeyo: “Kujana ndaasyoma biyeni makani aaya, nkaambo ime ndakomena alubo mwanakazi wangu wachembaala?” 19 Pesi ngilozi yakati kulinguwe: “Ndime Gabbriyeli, wiimikila kunembo lyaLeza alubo ndakatumwa kuti ndizoowambuule aanduwe akuti ndikubuzye makani aaya mabotu. 20 Lino bona, uzooba chimuumu alubo tukookonzya pe kwaambuula kusikila mubuzuba nizitazoochitike zintu eezi nkaambo teewaasyoma pe majwi aangu aatazoozuzikizigwe kuchiindi chawo chibikkidwe.” 21 Kuchiindi eecho, bantu bakali kulindila Zakkariya alubo bakagamba nkaambo wakali waba aachiindi chilamfu kali mundawu iisalala. 22 Naakazwa mundawu iisalala, taakachili kukonzya pe kwaambuula aabantu, mpawo bakaziba kuti wabona chilengaano. Nkinkaako, wakali kwaambuula aambabo kabelesya maboko nkaambo taakachili kukonzya pe kwaambuula. 23 Naakamana mazuba aakwe aakubeleka mulimu uusalala,* wakaya kumuunzaakwe.
24 Nikwakayinda mazuba, mwanakazi wakwe Elizabbeti wakaba aada alubo wakali kulisisa kubantu kwamyeezi iili musanu kati: 25 “Eezi nzizyo nzyaasala kundichitila Jehova.* Wandiyeeya akugwisya masampu aangu aakati kabantu.”
26 Kali waba aamyeezi iili musanu awumwi kalaada, ngilozi Gabbriyeli yakatumwa aaLeza kuti yiinke kumuunzi waGalili uutegwa Nazareta, 27 kuli nakalindu* uutegwa Mariya wakasyomezedwe kukwatwa aamwaalumi uutegwa Josefa wamung’anda yaDavida. 28 Ngilozi eeyo niyakanjila, yakati kulinguwe: “Wapona iwe nuulongezedwe? Jehova* ulaanduwe.” 29 Pesi nakalindu ooyo wakakataazikana loko akaambo kamajwi aakwe alubo wakali kuyanda kumvwisisisya kuti nkujuzya kulibiyeni ooku. 30 Nkinkaako, ngilozi yakati kulinguwe: “Utayoowi pe Mariya, nkaambo Leza wakulongezya. 31 Lino bona, uzooba aada alubo uzootumbuka mwana mulombe alubo weelede kuzoomuuzika zina lyakuti Jesu. 32 Mwana ooyo uzooba mupati alubo uzootegwa Mwana waSijulu Lyamajulu alubo Jehova* Leza uzoomupa chuuno chabwaami chaDavida wisi, 33 alubo uzooba Mwaami uutazooyendelezye bamung’anda yaJakkobo kukabe kutamani alubo Bwaami bwakwe tabukamani pe.”
34 Pesi Mariya wakati kungilozi: “Ani eezi zizoochitika biyeni nkaambo tandinoona aamwaalumi pe?” 35 Mpawo ngilozi yakamusandula kuti: “Muuya uusalala uzooza aalinduwe alubo manguzu aaSijulu Lyamajulu azookuvumba. Nkinkaako, mwana ngutazoozyale uzootegwa uusalala, Mwana waLeza. 36 Bona, anguwe Elizabbeti bbululu wako, ooyo bantu ngubati tazyali pe unyampwide mwana mulombe mubuchembele bwakwe. Alubo lino da lyakwe lyaba aamyeezi iili musanu awumwi, 37 nkaambo zintu zyoonse nzyaamba Leza zilachitika.” 38 Mpawo Mariya wakati: “Bona! Ime ndili muzike waJehova!* Azichitike kweendelana ambwaamba.” Mpawo ngilozi yakeenda.
39 Mumazuba aayo, Mariya wakafwambaana kunyampuka mpawo wakayinka kunyika yazilundu, mumuunzi waJuda 40 alubo wakanjila mumuunzi waZakkariya, mpawo wakajuzya Elizabbeti. 41 Elizabbeti mbaakamvwa biyo kujuzya kwaMariya, mwana wakali mwida lyakwe wakaputuuka mpawo Elizabbeti wakazula muuya uusalala, 42 mpawo wakoompolola ajwi pati kati: “Ulilongezedwe aakati kabanakazi boonse alubo ulilongezedwe mwana uuli mwida lyako! 43 Ndimeni biya kuti ndijane chilongezyo chakuswayigwa aabanyina aaMwaami wangu? 44 Nkaambo mbundamvwa kujuzya kwako, mwana uuli mwida waputuuka akaambo kakukondwa. 45 Ulabotelwa anguwe ooyo uusyoma makani aaya, nkaambo zintu zyoonse nzyaakabuzigwa aaJehova* zizoozuzikizigwa chakumaninina.”
46 Mpawo Mariya wakati: “Ndilaambilizya bupati bwaJehova.* 47 Alubo moyo* wangu unoobotelwa loko akaambo kaLeza Mufutuli wangu. 48 Nkaambo wandibona ime ndemuzike wakwe uulangilwaansi. Bona, kuzwa lino kaziya kunembo, mazyalani woonse anoondaamba kuti ndilabotelwa 49 nkaambo Ooyo uuli aamanguzu wandichitila zintu zipati alubo zina lyakwe lilasalala, 50 alubo kuzwa kuzyalani limwi kuya kulilimwi, bantu bamuyoowa ulabafwida luzyalo. 51 Wachita milimu yanguzu akuboko kwakwe. Bantu bali aamakanze aakulisumpula mumyoyo yabo wabamwaya. 52 Baalumi basinguzu wabagwisya aazyuuno zyabo zyabwaami alubo aabo balangilwaansi wabasumpula. 53 Bali aanzala wabakkutya aazintu zibotu alubo aabo banotede wabatanda kuti beende kabalengelezezye maboko. 54 Leza waboola kuzoogwasya Israyeli mubelesi wakwe, nkaambo wayeeya chisyomezyo chakwe chakumufwida luzyalo 55 Abbrahamu abana bakwe kukabe kutamani mbuli mbaakaamba kumasianene.” 56 Mariya wakakkala aa-Elizabbeti kwachiindi chisika kumyeezi iitatu, mpawo wakabweeda kulimbabo.
57 Chakasika chiindi chakuti Elizabbeti atumbuke, mpawo wakatumbuka mwana mulombe. 58 Bantu mbaakayakilene aabo ababbululu bakwe nibakamvwa kuti Jehova* wamufwida luzyalo lupati, bakabotelwaamwi anguwe. 59 Alubo mubuzuba bwamusanu atutatu, bakasika kuti bazoopalule mwana alubo bakali kuyanda kumuuzika zina lyawisi lyakuti Zakkariya. 60 Pesi banyina aamwana bakati: “Peepe! Ulawuzikwa zina lyakuti Johane.” 61 Mpawo bakati kulinguwe: “Taakwe bbululu wako ulaazina eelyo.” 62 Mpawo bakabuzya wisi kwiinda mukubelesya maboko kuti mwana uyanda kumuuzika zina lyakutyeni. 63 Nkinkaako, wakakumbila aakulembela mpawo wakalemba kuti: “Zina lyakwe nguJohane.” Mpawo bantu boonse bakagamba. 64 Aachiindi nchicheecho, mulomo wakwe wakajulika alubo lulimi lwakwe lwakaangunuka mpawo wakatalika kwaambuula kalikutembawula Leza. 65 Bantu boonse mbibakayakilene aabo, bakayoowa alubo zintu zyoonse eezi zyakasaanguna kwaambuulwa munyika yoonse yazilundu yaJuda. 66 Bantu boonse bakamvwa zintu eezi, bakali kuziyeeyesesya mumyoyo yabo alubo bakali kwaamba kuti: “Mwana ooyu uzooba biyeni?” Nkaambo kwaamba choonzyo, kuboko kwaJehova* kwakali aanguwe.
67 Mpawo Zakkariya wisi aamwana ooyo wakazula muuya uusalala alubo wakapolofita kati: 68 “Atembawulwe Jehova* Leza wa-Israyeli, nkaambo wabayeeya bantu bakwe alubo wabafutula. 69 Iswe tubamung’anda yaDavida mubelesi wakwe, watubusizya kwija kwalufutuko,* 70 mbuli mbaakaamba kwiinda mubapolofita bakwe basalala bachiindi kuti 71 uzootufutula kuli basinkondoma akubantu boonse batuzonda. 72 Uzootufwida luzyalo kweendelana amajwi ngaakabuzya masianene. Alubo uzooyeeya chizuminano chakwe chisalala 73 achikonke nchaakakonkezya sianene Abbrahamu, 74 kuti uzootuvuna mumaboko aabasinkondoma akutupa chilongezyo chakuti tumubelekele mulimu uusalala kakutakwe nchituyoowa, 75 katusyomeka alubo katululeme kunembo lyakwe mazuba woonse aabuumi bwesu. 76 Pesi iwe mwanaangu, uzoowambwa kuti uli mupolofita waSijulu Lyamajulu alubo uzooyinka kunembo lyaJehova* kuti ubambe nzila zyakwe. 77 Alubo uzooyiisya bantu kuti bazibe kuti Leza uzoobafutula kwiinda mukubalekelela zibi zyabo, 78 nkaambo Leza wesu ngusiluzyalo. Kwiinda muluzyalo oolu, tuzooswayigwa aamumuni wakubuchedo kawuzwa kujulu. 79 Aabo bakkede mumudima abali mumweenzule walufu, uzoobapa mumuni alubo uzoozulwida mawulu eesu munzila yaluumuno.”
80 Mwana ooyo wakakomena akusima akaambo kamuuya waLeza, alubo wakali kukkala munkanda kusikila mubuzuba naakalitondeezya aantanganana kuma-Israyeli.