Jona
3 Mpawo jwi lyaJehova lyakasika kachibili kuli Jona kaliti: 2 “Buka, yinka kuNiniva muunzi mupati, ukaambilizye mulumbe ngundili kukubuzya kulinguwo.”
3 Nkinkaako, Jona wakaswiilila jwi lyaJehova mpawo wakanyampuka waya kuNiniva. Niniva wakali muunzi mupati loko*—wakali kweendwa mazuba aatatu kuuzyunguluka woonse. 4 Mpawo Jona wakanjila mumuunzi weenda musinzo weendwa buzuba bumwi kali kwaambilizya kuti: “Kwasyaala mazuba aali 40 kupela kuti Niniva inyonyoonwe.”
5 Mpawo bantu bamuNiniva bakasyoma muli Leza alubo bakaambilizya kuti baliimye kulya akuzwaata zigogo zyamasaka, kuzwa kumupati aakati kabo kusika kumuniini. 6 Mulumbe ooyo niwakasika kumwaami waNiniva, wakanyampuka aachuuno chakwe chabwaami, wagwisya chigogo chabwaami nchaakazweete mpawo wazwaata chigogo chamasaka alubo wakakkala mudyota. 7 Mukuyungizya, mwaami wakapa kuti kwaambilizigwe muNiniva yoonse kuti:
“Kwiinda mumulawu wamwaami abasilutwe bakwe: Taakwe muntu naba munyama, ng’ombe naakuti mbelele, weelede kulya chintu pe. Tabeelede kulya chakulya nikuba kunywa maanzi. 8 Bantu abanyama abazwaate zigogo zyamasaka mpawo bayite Leza amoyo woonse, basiye nzila zyabo zibi akulwana nkubachita. 9 Ngwani uuzi, amwi Leza wakasimpe ulachincha mizeezo* kulizeezyo nzyaachiyande kuchita akuti aleke bukali bwakwe bupati kuchitila kuti tutalobi.”
10 Leza wakasimpe naakabona nzibakachita, mbubakasiya nzila zyabo zibi, wakachincha mizeezo* atala apenzi ndyaakali waamba kuti ulabeetela, taakazoolyeeta pe.