Jona
4 Pesi eezi zyakapa kuti Jona abijilwe loko alubo wakanyema loko. 2 Mpawo wakakomba kuli Jehova kati: “Jehova, eezi teenzizyo na zyakali kupa kuti ndikataazikane nindakali kunyika yakulindiswe? Nzizyo zyakapa kuti kumatalikilo ndeezye kuchijila kuTashishi; nkaambo ndakalizi kuti nduwe Leza siluzyalo asilweetelelo, uutafwambaani kunyema alubo uuzwide luyando lutamani, uuchincha mizeezo kuchitila kuti ateeti penzi. 3 Ikaka O Jehova, lino ndijaye biya, nkaambo kulikabotu kuti ndifwe kwiinda kuti kandipona.”
4 Jehova wakamubuzya kuti: “Zili kabotu na kuti unyeme oobo?”
5 Mpawo Jona wakazwa mumuunzi waakukkala aansi kubuzwezuba kwamuunzi. Wakayaka kasanza nkukooko wakkala mumweenzule* wakasanza aako kuti abone zitachitike kumuunzi ooyo. 6 Jehova Leza wakapa kuti munsamu uuli mbuli luungu* umene aajulu aali Jona, kuti ube mweenzule kuli Jona akupa kuti aleke kunyema. Jona wakabotelwa loko naakabona munsamu ooyo.
7 Pesi kubuchedo mubuzuba bwakatobela, Leza wakasimpe wakatuma chikonye kuti chilume munsamu ooyo uuli mbuli luungu, mpawo wakayuma. 8 Zuba nilyakasaanguna kubala, Leza wakatuma luuwo lupya lwakubuzwezuba, alubo zuba lyakamuumpa mumutwe Jona mpawo wakoongelwa. Wakaliswini kakumbila kuti afwe, wakali kwaamba kuti, “Zili kabotu kuti ndifwe kwiinda kuti kandichipona.”
9 Leza wakabuzya Jona kuti: “Zili kabotu na kuti unyeme akaambo kamunsamu ooyu?”
Mpawo wakasandula kuti: “Iiyi zili kabotu kuti ndinyeme, ndanyema loko zyakuti nchindiyanda nkufwa biyo.” 10 Pesi Jehova wakamubuzya kuti: “Wawufwida nsoni munsamu ooyu ngwaakatabelekela pe, nikuba kuukomezya; wakakomena mubusiku bumwi akufwa mubusiku bumwi. 11 Andime tandeelede kuufwida nsoni na muunzi mupati waNiniva, oomo muli bantu bayinda ku 120 000, batazi kusiyanisya chibotu achibi,* kuswaanizya abanyama babo biingi?”