Lugwalo Luya kuBakkolose
2 Nkaambo ndiyanda kuti muzibe mbundilikulwisya changuzu akaambo kandinywe, kuswaanizya abaabo bali kuLawodekkiya abantu boonse batanandibona. 2 Ndilikuchita oobo, kuchitila kuti myoyo yabo iwumbulizigwe akuti bajatane kabotu-kabotu muluyando akuti babe aabunoti boonse bubawo akaambo kakuba aachoonzyo chikkwene muzintu nzibamvwisisisya, kuchitila kuti babe aaluzibo lwachoonzyo atala ansiswa iisalala yaLeza, nkukwaamba Kkristu. 3 Bunoti boonse bwabusongo abwaluzibo bulisisidwe kabotu-kabotu mulinguwe. 4 Ndilikwaamba zintu eezi kuchitila kuti kutabi muntu uumweena kwiinda mukubelesya majwi aakuyunga. 5 Nikuba kuti tandili aandinywe kumubili, pesi ndili aandinywe kumuuya alubo ndilikubotelwa kubona mbumubambikene ambulusimide lusyomo lwanu muli Kkristu.
6 Nkinkaako, mbukunga mwakamutambula Kkristu Jesu Mwaami, amwiinkilile kunembo kweenda kamujisini aanguwe, 7 kamusimpide miyanda, kamuyakidwe mulinguwe, kamwiimvwi nji mulusyomo mbuli mbumwakayiisigwa alubo kamufusuuka aakulumba.
8 Amuchenjelele kuti kutabi muntu uumutola kubuzike kwiinda mubusongo bwabantu alweeno lwabuyo, kweendelana atunsiya-nsiya twabantu azintu zyakusaanguna zyanyika, kutali kweendelana aKkristu 9 nkaambo buntu bwaLeza boonse bulizwide mulinguwe. 10 Nkinkaako, mwazula akaambo kanguwe, ooyo uuli ngumutwe wamfulumende zyoonse abweendelezi. 11 Kwiinda mukumvwanana aanguwe, andinywe mwakapalulwa, kutali aakupalulwa kuchitwa aamaboko kwakugwisya nyama yamubili, pesi akupalulwa kwaKkristu. 12 Nkaambo mwakazikkwaamwi anguwe mukubbabbatizigwa kwakwe alubo akaambo kakumvwanana aanguwe, andinywe mwakabusigwaamwi anguwe akaambo kakuba aalusyomo mumulimu mupati waLeza, ooyo wakamubusya kuzwa kubafu.
13 Mukuyungizya, nikuba kuti mwakalifwide mumilandu yanu akuti teemwakapalwidwe pe, Leza wakapa kuti mube bawumi aamwi anguwe. Leza wakatulekelela milandu yesu yoonse amoyo woonse 14 alubo wakazima lugwalo lwakalembedwe, lwakali aamilawu alubo lwakali kukazyania aandiswe. Wakalugwisya kwiinda mukulugankamina aachisamu chakupenzezya.* 15 Kwiinda mukubelesya chisamu chakupenzezya,* wazunda* mfulumende abeendelezi alubo wabayanika kuti babonwe aabantu boonse kalikubazulwida, mbukunga bazundwa.
16 Nkinkaako, kutabi muntu naaba uumwi uumubeteka atala anzimulya anzimunywa naakuti atala akubamba mapobwe naakuti atala akukkala kwamweezi naakuti atala asabata. 17 Zintu eezyo mweenzule wazintu ziza, pesi chintu chili nchicho, nguKkristu. 18 Kutabi muntu uumukachizya kujana bulumbu, uuyandisya kulibombya kwakubeja, uukomba ngilozi alubo “wiimvwi nji”* kuzintu nzyaakabona. Muntu ooyo ulalisumpula aatakwe kaambo, akaambo kakuyeeya kwanyama, 19 alubo tajisilidi kumutwe pe, nkukwaamba kuli yooyo uupa mubili woonse nzuuyanda, alubo uupa kuti uswaanizigwe kabotu-kabotu kwiinda munswaanganino zyawo amilambi akupa kuti ukomene akukomena kuzwa kuli Leza.
20 Kuti kakuli kuti mwakafwaamwi aKkristu kuzintu zyakusaanguna zyanyika, nkamboonzi nimupona mbuli kuti muchili banyika kwiinda mukutobela milawu yakuti: 21 “Utajati, utalabili, utagumi,” 22 nkukwaamba zintu zyoonse zinyonyooka kuti zyabelesegwa, kweendelana aamilawu anjiisyo zyabantu? 23 Nikuba kuti zintu eezyo zibonekaanga mbusongo kweendelana abukombi bwabo bwakulipangila akulibombya kwakubeja, akoombya mibili yabo, pesi tazibagwasyi kulwana zintu ziyandwa aanyama pe.