Mukambawusi
12 Nkinkaako, yeeya Mulengi wako Mupati mumazuba aako aabuniini, kaatanasika pe mazuba aamapenzi aminyaka njutazoowambe kuti: “Tayindibotezyi pe,” 2 azuba amumuni amweezi anyenyeezi kazitanasiya, amayoba katanabweeda, mvula niyawa,* 3 mubuzuba bantu balinda ng’anda nibatazoozazame, abaalumi bali aamanguzu nibatazoobule manguzu, abanakazi nibatazooleke kuziya akaambo kakuti bacheya, abanakazi basondela aawindo nibatazoojane kwasiya, 4 milyango iilangene aamugwagwa niitazoojalwe, amisindo yamaziyo niyoomvwikila ansaansi, achiindi muntu natazoobusigwe aakulila kwakayuni, abasimbi bayimba nibanooyimbila ansaansi. 5 Amuntu natazooyoowe ndawu zili aajulu anikunooli migwagwa iiyoosya. Amunsamu wamu-alumondi nuutazoofulule, ansozi nizitanooyende kazilikwela, amichelo yamunsamu uupa kuti muntu ayande kulya kayitachigwasyi pe, nkaambo muntu ulikweenda kaya kung’anda yakwe eeyo iinooliwo kukabe kutamani alubo basikulila balikweendeenda mumugwagwa. 6 Ntambo yansiliva kayitanagwisigwa, andido yangolida kayitanafwa anongo yamuchikala kayitanapwachuuka andirayi yamumugodi kayitanafwa. 7 Mpawo bulongo bulabweeda munyika mubwakabede, amuuya ulabweeda* kuli Leza wakasimpe ooyo wakawupa bantu.
8 Sikubunganizya wakati: “Taakwe chigwasya pe! Zintu zyoonse nzyabuyo.”
9 Mukuyungizya kubusongo mbwaakali aabo, sikubunganizya wakayiisya bantu zintu nzyaakazi alubo wakayeeyesesya akuyanduulisisya kuchitila kuti ayobolole tusimpi twiingi. 10 Sikubanganizya wakabeleka changuzu kuti ayanduule makani aabotezya akuti alembe makani aachoonzyo.
11 Majwi aabasongo ali mbuli zibinzyo zyakubinzya ng’ombe alubo twaambyo twabo tubunganizidwe, tuli mbuli zipikili zyagankaminwa zyasima. Majwi aaya azwa kumweembeli uumwi. 12 Kunze kwazintu eezi nzindaamba, njeyi nchenjezyo njindili kukubuzya mwanaangu: Kupanga mabbuku miingi takumani pe alubo kulipeda zyiindilide kulingawo kupa kuti uminwe.
13 Mbukunga makani woonse aaya amvwigwa, mamanino aakaambo ngaya: Yoowa Leza wakasimpe alubo ubambe milawu yakwe, nkaambo eezi nzizyo muntu nzyalangililwa kuchita. 14 Nkaambo Leza wakasimpe uzoobeteka zintu zyoonse zichitwa aabantu kuswaanizya azeezyo zisisikene, kuti abone kuti zilikabotu na, naakuti nzibi.