Chiyubunuzyo chaJohane
21 Mpawo ndakabona julu pya anyika mpya, nkaambo julu lyachiindi anyika yachiindi zyakali zyayinda, alubo lwizi taluchiwo pe. 2 Alubo ndakabona muunzi uusalala, Jerusalema Mpya, kawuseluka kuzwa kujulu kuli Leza, kawubambidwe mbuli nabwiinga walibotya akaambo kamulumaakwe. 3 Mpawo ndakamvwa jwi pati kuzwa kuchuuno chabwaami kaliti: “Bona! Tente lyaLeza lili aabantu, alubo uzookkala aambabo, mpawo ambabo bazooba bantu bakwe. Alubo Leza lwakwe uzooba aambabo. 4 Alubo uzoosinda misozi yoonse kumeso aabo, alubo lufu taluchizoobi lubo pe, nikuba koomoka nikuba kulila nikuba kuchisa, takuchizoobi lubo pe. Zintu zyachiindi zyamana.”
5 Mpawo Ooyo wakakkede aachuuno chabwaami wakati: “Bona! Ndilikupa kuti zintu zyoonse zibe zipya.” Alubo wakati: “Lemba, nkaambo majwi aaya alasyomeka alubo ngachoonzyo.” 6 Alubo wakandibuzya kuti: “Zyachitika! Ndime Alufa a-Omega,* matalikilo amamanino. Muntu woonse uuli aanyota ndilamupa maanzi aazwa kukasawu kamaanzi aabuumi katabbadali pe. 7 Muntu uuzunda, uzookona zintu eezi alubo ndizooba Leza wakwe anguwe uzooba mwanaangu. 8 Pesi aabo bayoowa abaabo batakwe lusyomo abaabo batasalali basesemya abajayi abasibwaamu* abaabo basyoma mizimu abakomba zibumbwa abasikubeja boonse, chaabilo chabo chizooba mulwizi luyaka mulilo asalufa. Lwizi oolu lwiiminina lufu lwachibili.
9 Imwi yangilozi zili musanu azibili zyakajisi ndido zili musanu azibili zyakazwide zipenzyo zyakumamanino zili musanu azibili, yakasika mpawo yakandibuzya kuti: “Kuza ndikutondeezye nabwiinga, mwanakazi waMwanaambelele.” 10 Mpawo yakandibweza mumanguzu aamuuya, yanditola kuchilundu chipati alubo chilamfu, mpawo yakanditondeezya muunzi uusalala, Jerusalema, kawuseluka kuzwa kujulu kuli Leza, 11 kawuli aabulemu bwaLeza. Kumweka kwawo kwakali mbuli kwabbwe bbotu loko, mbuli kwabbwe lyajaspa ling’ayima alubo libalangala mbuli bbwe lyakkristali. 12 Alubo wakali aamuduli mupati alubo mulamfu amageedi aali 12, angilozi zili 12 zyakali aamageedi aayo, alubo aamageedi aayo kwakalembedwe mazina aamisyobo iili 12 yabana ba-Israyeli. 13 Kubuzwezuba kwakali mageedi aatatu, kunyika kwakali mageedi aatatu, kumusanza kwakali mageedi aatatu, kububbila kwakali mageedi aatatu. 14 Muduli wamuunzi wakali aamabwe aantalisyo aali 12, alubo aalingawo kwakalembedwe mazina aali 12 aabaapostoli bali 12 baMwanaambelele.
15 Ooyo wakali kwaambuula aandime wakajisi tete lyakupimya lyangolida, kuchitila kuti apime muunzi amageedi aawo amuduli wawo. 16 Muunzi ooyu ulaamabazu aane aayelene, alubo bulamfu bwawo bweelene aabusasa bwawo. Mpawo wakapima muunzi atete, mpawo wakajana kuti wakali kulampa makkilomita aasika ku 2 220.* Alubo bulamfu bwawo, abusasa bwawo abulamfu bwakuya mujulu zyakaleelene. 17 Alubo wakapima muduli wawo mpawo wakajana kuti wakali kulampa mamita aali 64,* kweendelana achipimyo chamuntu, cheendelana aachipimyo changilozi. 18 Muduli ooyo wakayakidwe aabbwe lyajaspa, alubo muunzi wakali wangolida yakasalazigwa, iibalangala mbuli gilazi. 19 Ntalisyo zyamuduli wamuunzi bakazibotya aamisyobo yoonse yamabwe mabotu: ntalisyo yakusaanguna yakali yabbwe lyajaspa, yachibili yakali yabbwe lyasafire, yachitatu yakali yabbwe lyakkalikkedoni, yachine yakali yabbwe lya-emarawudi, 20 yamusanu yakali yabbwe lyasadonikkisi, yamusanu awumwi yakali yabbwe lyasadiyasi, yamusanu atubili yakali yabbwe lyakkrisoliti, yamusanu atutatu yakali yabbwe lyabbelili, yamusanu atune yakali yabbwe lyatopazi, yakkumi yakali yabbwe lyakkrisofulezi, yakkumi akamwi yakali yabbwe lyahayisinti, yakkumi atubili yakali yabbwe lya-ametisiti. 21 Alubo, mageedi aali 12 akali aamaparela aali 12. Geedi limwi alimwi lyakapangidwe aaparela limwi. Alubo nzila mpati yamuunzi yakali yangolida yakasalazigwa, iibalangala mbuli gilazi.
22 Teendakalibona pe tempele mulinguwo, nkaambo Jehova* Leza Singuzuzyoonse ndiitempele lyawo, alubo Mwanaambelele ndiitempele lyawo. 23 Alubo muunzi ooyu tawuyandikani kumunikilwa azuba pe naakuti amweezi, nkaambo bulemu bwaLeza bulawumunikila, alubo lambe lyawo wakali Mwanaambelele. 24 Alubo zisi zizooyenda mumumuni wawo, alubo baami banyika bazooyeta bulemu bwabo mulinguwo. 25 Mageedi aawo taakajalwi pe sikati, nkaambo tamunoochilikwe mansiku pe. 26 Alubo bazooyeta bulemu alulemeko bwazisi mulinguwo. 27 Pesi chintu choonse chitasalali amuntu woonse uuchita zintu zisesemya asilweeno, tabazoonjili pe mulinguwo, pesi aabo balembedwe mubbuku lyakupeta lyaMwanaambelele, mbabo abalikke batazoonjile.