Makani aakalembwa aaMakko
8 Mumazuba aayo, kwakali nkamu mpati lubo yabantu alubo teebakalikwe chakulya pe. Nkinkaako, wakayita basikwiiya mpawo wakababuzya kuti: 2 “Ndabeetelela bantu aaba nkaambo bakkala aandime kwamazuba aatatu alubo tabachikwe chakulya pe. 3 Kuti ndibabuzye kuti baye kumyuunzi yabo kabalaanzala,* bayoowongelwa munzila, alubo bamwi babo bazwa kule loko.” 4 Pesi basikwiiya bakwe bakamusandula kuti: “Nkuukuli muntu nkwakonzya kujana zinkwa zitakkwane bantu aaba mulusaka luli boobu?” 5 Mpawo wakababuzya kuti: “Mulaazinkwa zingana?” Bakati: “Zili musanu azibili.” 6 Mpawo wakalayilila nkamu yabantu kuti ikkalaansi. Mpawo wakabweza zinkwa zili musanu azibili, walumba, wazikwamuna mpawo wakasaanguna kuzipa basikwiiya bakwe kuti bape bantu mpawo bakazipa bantu. 7 Alubo bakali aatuswi tuche, mpawo naakatulongezya, wakababuzya kuti batupe bantu. 8 Bantu bakalya, bakkuta alubo basikwiiya bakazuzya mabbasikiti mapati* aali musanu aabili achakulya chakasyaala. 9 Kwakali baalumi basika ku 4 000. Mpawo wakababuzya kuti beende.
10 Aachiindi nchicheecho, wakatanta bwaato abasikwiiya bakwe, mpawo wakasika kuchilawu chaDalimanuta. 11 Kali nkukooko, baFarisi bakasika mpawo bakasaanguna kukazyania aanguwe kabayanda kuti abachitile chitondeezyo kuzwa kujulu, kuchitila kuti bamusunke. 12 Jesu wakakataazikana loko mumoyo,* mpawo wakati: “Nkamboonzi zyalani eeli nililikuyanduula chitondeezyo? Kwaamba choonzyo, ndaamba kuti, zyalani eeli talizoopegwi chitondeezyo pe.” 13 Mpawo wakabasiya watanta bwaato lubo waya mutaleeliya.
14 Nikuba oobo, bakaluba kubweza zinkwa alubo taakwe nchibakalaacho pe mubwaato kunze kwachinkwa chimwi kupela. 15 Mpawo wakabachenjezya aantanganana kati: “Amukkale kamujulide meso. Amuchenjelele bumena bwabaFarisi abumena bwaHerodi.” 16 Nkinkaako, bakasaanguna kukazyania aakati kabo akaambo kakuti teebakalikwe zinkwa pe. 17 Naakabona zintu eezi, wakati kulimbabo: “Nkamboonzi nimulikukazyania atala akuti tamukwe zinkwa pe? Tamunabona na alubo tamunamvwisisisya pe? Myoyo yanu ichitindibede na mukumvwisisisya? 18 ‘Nikuba kuti muli aameso, tamuboni na, alubo nikuba kuti muli aamatwi, tamumvwi na?’ Tamuchiyeeyede na 19 kuti mwakazuzya mabbasikiti aangana aachakulya chakasyaala nindakakwamuna zinkwa zili musanu kuti baalumi bali 5 000 balye?” Bakati kulinguwe: “Twakazuzya aali 12.” 20 “Nindakakwamuna zinkwa zili musanu azibili kuti baalumi bali 4 000 balye, mwakazuzya mabbasikiti mapati* aangana aachakulya chakasyaala?” Bakati: “Twakazuzya aali musanu aabili.” 21 Mpawo wakati kulimbabo: “Ambulisunu tamunamvwisisisya pe?”
22 Mpawo bakasika kuBbetisayida. Nkukooko, bantu bakamweetela umwi mwaalumi moofu mpawo bakamukombelezya kuti amugume biyo. 23 Mpawo wakajata kuboko kwamwaalumi ooyo wazwaawe aanze aamuunzi. Mpawo naakamuswida mumeso, wakabikka maboko aakwe aalinguwe mpawo wakamubuzya kuti: “Kuli nchubwene na?” 24 Mwaalumi ooyo wakalanga kujulu mpawo wakati: “Ndibwene bantu, pesi babokekaanga minsamu iilikweendeenda.” 25 Mpawo wakaaguma lubo meso aamwaalumi ooyo mpawo wakabona kabotu. Meso aakwe akapona alubo wakakonzya kuzibona kabotu zintu zyoonse. 26 Nkinkaako, wakamubuzya kuti ayinke kulimbabo kati: “Utanjili mumuunzi ooyu pe.”
27 Jesu abasikwiiya bakwe bakazwa mpawo bakayinka kumyuunzi iili muKkesariya Filipi alubo nibakali munzila, wakasaanguna kubuzya basikwiiya bakwe kuti: “Bantu batii ndimeni?” 28 Bakati kulinguwe: “Bamwi bati nduwe Johane Mubbabbatizi, bamwi bati nduwe Elija, nikuba oobo, bamwi bati uli umwi wabapolofita.” 29 Mpawo wakababuzya kuti: “Ani inywe muti ndimeni?” Petro wakamusandula kuti: “Nduwe Kkristu.” 30 Pesi wakabachenjezya kuti batabuzyi muntu pe kuti wakalini. 31 Mpawo wakasaanguna kubayiisya kuti Mwanaamuntu weelede kuswaana mapenzi miingi, akukakwa aabaalu abapati babapayizi abalembi akujayigwa mpawo azoobuke nikwayinda mazuba aatatu. 32 Kwaamba choonzyo, wakaabikka aantanganana makani aaya. Pesi Petro wakamutola kumbali mpawo wakasaanguna kumukalalila. 33 Mpawo wakachengunuka walanga basikwiiya bakwe, mpawo wakakalalila Petro kati: “Yinka kusulaangu, Saatani! Nkaambo ulaamizeezo yabantu kutali yaLeza pe.”
34 Mpawo wakayita makamu aabantu abasikwiiya bakwe mpawo wakati kulimbabo: “Kuti muntu kayanda kunditobela, aleke kupona mbuli mbayanda, mpawo anyampule chisamu chakwe chakupenzezya* alubo ayinkilile kunembo kunditobela. 35 Nkaambo kufumbwa muntu uuyanda kufutula buumi bwakwe, uzoosweekelwa aambubo pesi kufumbwa muntu uusweekelwa aabuumi bwakwe akaambo kangu, alubo akaambo kamakani mabotu, uzoobufutula. 36 Kwaamba choonzyo, zigwasyaanzi kuti muntu ajane nyika yoonse pesi asweekelwe aabuumi bwakwe? 37 Niinzi biya muntu nchakonzya kupa kuti ajane buumi bwakwe? 38 Nkaambo kufumbwa muntu uuba aabweeme akaambo kangu amajwi aangu muzyalani eeli lichita bumambi* alubo libisya, anguwe Mwanaamuntu uzooba aabweeme kumuntu ooyo aazoosika mubulemu bwaWisi kali aangilozi zisalala.”