Makani aakalembwa aaMakko
9 Mukuyungizya, wakati kulimbabo: “Kwaamba choonzyo, ndimubuzya kuti, kuli bamwi bayimvwi aano, batazooluboni pe lufu kusikila basaangune kubona Bwaami bwaLeza kabuli bwaza amanguzu.” 2 Nikwakayinda mazuba aali musanu alimwi, Jesu wakabweza Petro aJakkobo aJohane, mpawo wakayinkaabo kuchilundu chilamfu loko kabali abalikke. Mpawo wakasanduka kunembo lyabo. 3 Zigogo zyakwe zyaajulu zyakamweka akutuba buu zyakuti taakwe sikuwacha zigogo aano aanyika wakali kukonzya kuzitubya mbuli mbuzyakabede. 4 Elija aMozesi bakaboneka kulimbabo alubo bakali kwaambuula aaJesu. 5 Mpawo Petro wakati kuli Jesu: “Rabbi, chabota kuti tulaano. Atuyake matente aatatu, lyako, lyaMozesi alya-Elija.” 6 Kwaamba choonzyo, Petro taakazi pe kuti achite biyeni nkaambo bakayoowede loko. 7 Mpawo kwakaba joba alubo nilyakabavumba, kwakazwa jwi mujoba eelyo lyakati: “Ooyu Mwanaangu uuyandwa. Amumuswiilile.” 8 Pesi bakalanga koonse-koonse mpawo bakabona kuti taakwe ngubakachilaawe kunze kwaJesu alikke.
9 Nibakali kuseluka kuzwa kuchilundu, wakabachenjezya kuti batazibuzyi muntu naaba uumwi zintu nzibakali babona, kusikila Mwanaamuntu azoobusigwe kuzwa kubafu. 10 Makani aaya bakaabamba mumyoyo yabo* pesi bakaambuula aakati kabo atala anzikwaamba kubusigwa ooku kuzwa kubafu. 11 Alubo bakasaanguna kumubuzya kuti: “Nkamboonzi balembi nibati Elija weelede kusaanguna kusika?” 12 Mpawo wakati kulimbabo: “Elija nguwe uusaanguna kusika kuti azoobambulule zintu zyoonse, pesi nkamboonzi nikulembedwe atala aMwanaamuntu kuti weelede kwiinda mumapenzi miingi akunyansigwa? 13 Kwaamba choonzyo, ndimubuzya kuti, Elija wasika alubo bakachita kufumbwa nzibayanda aalinguwe, mbuli mbukulembedwe atala anguwe.”
14 Nibakasika kuli bamwi basikwiiya, bakabona nkamu mpati yabantu bakalaamwi ambabo alubo kwakali balembi bakali kukazyania ambabo. 15 Pesi nkamu yoonse yabantu niyakamubona biyo, yakagamba mpawo yakachijaana kayiya kulinguwe kuti ikamujuzye. 16 Nkinkaako, wakababuzya kuti: “Mulikukazyaniaanzi ambabo?” 17 Mpawo umwi wakali munkamu eeyo, wakamusandula kuti: “Muyiisi, ndaza aamwanaangu kulinduwe nkaambo ulaamuuya uumupede kuba chimuumu. 18 Kufumbwa chiindi mpuwamujatila, nga wamuwisizyaansi, mpawo nga wazwa fulu* kumulomo kumwi kalikuluma ntwinyo alubo nga wamana manguzu. Ndakumbide basikwiiya bako kuti bawutande, pesi bakachilwa.” 19 Mpawo wakati kulimbabo: “Inywe nizyalani litakwe lusyomo, ndeelede kukkala aandinywe kwachiindi chilamfu biyeni? Ndeelede kumutondeezya moyo mulamfu kwachiindi chilamfu biyeni? Amumweete ookuno.” 20 Nkinkaako, bakatola mwana kuli Jesu pesi muuya mubi nwaakamubona, wakamugwigwimya. Naakawidaansi, wakali kubumbuluka kalikuzwa fulu* kumulomo. 21 Mpawo Jesu wakabuzya wisi kuti: “Zyaba aachiindi chilamfu biyeni eezi kazimuchitikila?” Wisi wakati: “Kuzwa kachili muniini, 22 alubo chiindi chiingi, nga wamuwisizya mumulilo amumaanzi kawuyanda kumunyonyoona. Pesi kuti kukonzya kuchita chimwi chintu, tufwide luzyalo, utugwasye.” 23 Jesu wakati kulinguwe: “Aayo majwi aakuti, ‘Kuti kukonzya’! Zintu zyoonse zilakonzeka kumuntu uuli aalusyomo.” 24 Wisi wamwana ooyo wakoompolola mpawaawo kati: “Ndilaalo lusyomo! Ndigwasye mpundiyanda lusyomo!”
25 Jesu naakabona kuti nkamu yabantu ilikuchijaana kayiza nkubakabede, wakakalalila muuya mubi ooyo kati: “Iwe numuuya uupede kuti mwana ooyu abe chimuumu akuti atamvwi kumatwi, ndikubuzya kuti, zwa mulinguwe, utachizoonjili lubo pe mulinguwe!” 26 Muuya ooyo nwaakakwiila akumugwigwimya kwaziindi zyiingi, wakazwa mpawo mwana wakabaanga wafwa zyakuti bantu biingi bakali kuti: “Mwana wafwa!” 27 Pesi Jesu wakamujata kuboko, wamubusya, mpawo wakayimikila. 28 Nkinkaako, naakanjila mung’anda, basikwiiya bakwe bakamubuzya kakutakwe bamwi bantu kuti: “Nkamboonzi iswe nitwakachilwa kuutanda?” 29 Wakati kulimbabo: “Muuya uuli boobu uzwa biyo kwiinda munkombyo.”
30 Bakazwa nkukooko mpawo bakayinda muGalili pesi taakwe ngwaakali kuyanda kuti azibe. 31 Nkaambo wakali kuyiisya basikwiiya bakwe kalikubabuzya kuti: “Mwanaamuntu uzoowuzigwa mumaboko aabantu alubo bazoomujaya, pesi nikuba kuti wajayigwa, uzoobuka nikwayinda mazuba aatatu.” 32 Nikuba oobo, teebakazimvwisisisya pe nzyaakaamba, alubo bakayoowa kumubuzya.
33 Mpawo bakasika kuKkapenawume. Jesu naakali mung’anda, wakababuzya kuti: “Mwalikukazyania atala aanzi munzila?” 34 Bakawumuna, nkaambo munzila bakali kukazyania atala akuti ngwani mupati aakati kabo. 35 Nkinkaako wakakkala aansi, wayita bali Kkumi Ababili mpawo wakati kulimbabo: “Kuti muntu kayanda kuba wakusaanguna, weelede kuba wamamanino alubo weelede kuba mubelesi wabamwi boonse.” 36 Mpawo wakabweza mwana muniini wamwiimikizya aakati kabo alubo wakamukumbata mpawo wakati kulimbabo: 37 “Kufumbwa muntu uutambula mwana muniini uuli mbuli yooyu muzina lyangu, ulanditambula andime. Alubo kufumbwa muntu uunditambula, tatambuli ndime kupela pesi ulamutambula aYooyo wakandituma.”
38 Johane wakati kulinguwe: “Muyiisi, twabona umwi muntu kalikutanda madimoni muzina lyako, tweezya kumukasya nkaambo taali kututobela pe.” 39 Pesi Jesu wakati: “Muteezyi kumukasya pe, nkaambo taakwe muntu uutachite chigambyo muzina lyangu uutafwambaane kwaambuula zintu zibi atala andime.” 40 Nkaambo kufumbwa muntu uutatulwani ulikubbazu lyesu. 41 Alubo kufumbwa muntu uumupa nkomeki yamaanzi aakunywa akaambo kakuti muli baKkristu, ndimubuzya choonzyo kuti, takoosweekelwa bulumbu bwakwe. 42 Pesi kufumbwa muntu uulebya umwi wabaniini aaba bali aalusyomo mulindime, zinooli kabotu loko kuti munsingo, asungililwe ziyo pati lizyungulusigwa aadonki mpawo awaalilwe mulwizi.
43 “Kuti kuboko kwako kakupa kuti ulebwe, kugonke. Zilikabotu loko kuti unjile mubuumi kulemene, kwiinda kuti wiinke muGehena,* mumulilo uutazimiki kuli aamaboko aabili. 44 *—— 45 Alubo, kuti kuulu kwako kakupa kuti ulebwe, kugonke. Zilikabotu loko kuti unjile mubuumi kulemene, kwiinda kuti uwaalilwe muGehena* kuli aamawulu aabili. 46 *—— 47 Alubo, kuti liso lyako kalipa kuti ulebwe, lisowele kule. Zilikabotu loko kuti unjile muBwaami bwaLeza kuli aaliso limwi, kwiinda kuti uwaalilwe muGehena* kuli aameso aabili, 48 oomo muli nkonye zitafwi amulilo uutazimwi.
49 “Nkaambo muntu woonse weelede kulungwa aamulilo. 50 Munyo ulikabotu, pesi kuti kawutachilweeli, kujana mwawuchita biyeni kuti ulweele lubo? Amube aamunyo mulindinywe alubo mubambe luumuno aakati kanu.”