Lwakusaanguna kuBakkorinte
10 Bakombima ndiyanda kuti muzibe kuti, masianene boonse bakali munsi aajoba akuti boonse bakayinda mulwizi, 2 akuti boonse bakabbabbatizigwa muli Mozesi kwiinda mujoba alwizi, 3 akuti boonse bakalya chakulya chikozyenie chakumuuya, 4 akuti boonse bakanywa chakunywa chikozyenie chakumuuya. Nkaambo bakali kunywa kubbwe lyakumuuya lyakali kubatobela alubo bbwe eelyo lyakali kwiiminina* Kkristu. 5 Nikuba oobo, Leza taakabotelwa pe abiingi babo, nkinkaako, bakajayigwa munkanda.
6 Zintu eezi zyakaba zikozyano kulindiswe, kuchitila kuti tutayandi zintu zibi mbuli mbubakaziyanda. 7 Alubo tutabi basikukomba zibumbwa mbuli mbubakachita bamwi babo, mbuli mbukulembedwe kuti: “Bantu bakakkala aansi kuti balye akunywa. Mpawo bakanyampuka kuti babotelwe.” 8 Alubo tutachiti bwaamu* mbuli bamwi babo bakachita bwaamu,* zyakuti bali 23 000 bakafwa mubuzuba bumwi biyo. 9 Alubo tutasunki Jehova* mbuli bamwi babo mbubakamusunka, zyakuti bakanyonyoonwa aanzoka. 10 Alubo tutabi basikung’ung’una mbuli bamwi babo bakang’ung’una, zyakuti bakanyonyoonwa aasikunyonyoona. 11 Zintu eezi zyakachitika kulimbabo mbuli zikozyano alubo zyakalembelwa kuti zituchenjezye, iswe nitwasikilwa aamamanino aabwiime bwazintu.*
12 Nkinkaako, ooyo uuyeeya kuti uliimvwi achenjelele kuti atawi pe. 13 Taakwe sunko lyamusikila litabasikili pe bamwi bantu. Pesi Leza ulasyomeka alubo tazoomulekeli kuti musunkwe aazintu nzimutakonzyi kulisimya kulinzizyo, pesi mwanoosunkwa, uzoomujulila nzila yakuzwaayo kuchitila kuti mukonzye kulisimya.
14 Nkinkaako nibayandwa, amuchije kukomba zibumbwa. 15 Ndilikwaambuula mbuli mbundichita kubantu balaamaanu, amulisalile amulikke kuzintu nzindaamba. 16 Nkomeki yachilongezyo njitulongezya, tayaambi kwaabilana ganzi lyaKkristu na? Alubo chinkwa nchitukwamuna, tachaambi kwaabilana mubili waKkristu na? 17 Akaambo kakuti kuli chinkwa chimwi, iswe nikuba kuti tuli biingi, tuli mubili uumwi nkaambo toonse tulya chinkwa chimwi nchicheecho.
18 Amuyeeye Israyeli wakunyama: Aabo balya zipayizyo, nga tabalikwaabilana aachipayililo na? 19 Ani ndilikutyeni biya? Ndilikuti chintu chapayizigwa kuchibumbwa chilayandikana na, naakuti chibumbwa chilayandikana na? 20 Peepe, pesi ndilikuti, zintu nzibapayizya bantu bazisi, bazipayizya kumadimoni kutali kuli Leza pe. Alubo tandiyandi pe kuti mwaabilane aamadimoni. 21 Tazichiti pe kuti munywe nkomeki yaJehova* ankomeki yamadimoni. Alubo tazichiti pe kuti mulide “aatebbulu lyaJehova”* akutebbulu lyamadimoni. 22 Naakuti, ‘tatuli kupa kuti Jehova* abe aabuzuba na’? Tatukwe manguzu pe kwiinda nguwe, teembubo na?
23 Zintu zyoonse zilazumizigwa, pesi teezintu zyoonse pe zigwasya. Zintu zyoonse zilazumizigwa, pesi teezintu zyoonse pe ziyaka. 24 Umwi awumwi ayinkilile kunembo kuyanduula zintu zigwasya umwi, kutali zintu zigwasya nguwe kupela.
25 Amulye kufumbwa chuuzigwa kumusika wanyama kamutabuzyi pe akaambo kamyoyo yanu,* 26 nkaambo “nyika njiyaJehova* azintu zyoonse zili mulinjiyo.” 27 Kuti muntu uutasyomi wamutamba mpawo kuti mwayanda kwiinka, amulye kufumbwa nchimwapegwa kamutabuzyi pe akaambo kamyoyo yanu.* 28 Pesi kuti umwi muntu wamubuzya kuti, “Chintu eechi chakapayizigwa,” mutalyi pe akaambo kamuntu ooyo wamubuzya oobo alubo akaambo kamoyo.* 29 Tandilikwaamba moyo* wako pe, pesi ndilikwaamba moyo wawumwi muntu. Nkamboonzi lwaangunuko lwangu nilweelede kubetekwa aamoyo wawumwi muntu? 30 Kuti kandilya aakulumba, nkamboonzi nindilikwaambilwa majwi mabi akaambo kachakulya nchindalumba?
31 Nkinkaako, kufumbwa kuti mulikulya, naakuti mulikunywa, naakuti mulikuchita chimwi chintu, amuchite zintu zyoonse kuti Leza alemekwe. 32 Mutabi chilebyo kumaJuda, kumaGrikki akumbungano yaLeza, 33 mbuli mbundilikweezya andime kubotezya bantu boonse muzintu zyoonse, kutali kuyanduula zintu zigwasya ndime pe, pesi zigwasya bantu biingi kuchitila kuti bafutulwe.