Lwakusaanguna kuBakkorinte
3 Nkinkaako bakombima, teendakakonzya kwaambuula aandinywe mbuli mbundichita kubantu bamuuya, pesi ndakaambuula aandinywe mbuli mbundichita kubantu banyama, bachili bana muli Kkristu. 2 Ndakamupa malili kutali chakulya chisimide, nkaambo teemwakalinasima pe. Kwaamba choonzyo, nikuba lino tamunasima pe, 3 nkaambo muchili bantu banyama. Kuti kamulikuchitilana bbivwe alubo kamulikulwana, tamuli bantu banyama na alubo tamulikweenda mbuli mbubeenda na bantu banyika? 4 Nkaambo kuti umwi waamba kuti, “Ime ndili waPawulu,” mpawo umwi waamba kuti, “Ime ndili wa-Apolo,” ani mpo musiyene aali abantu biyo?
5 Ani Apolo ngwani biya? Anguwe Pawulu, ngwani biya? Mbabelesi biyo bakapa kuti mube basyomi, mbuli umwi awumwi mbaakapegwa mulimu aMwaami. 6 Ime ndakabyala, Apolo wakatiliila, pesi Leza wakali kupa kuti zikomene, 7 zyakuti ooyo uubyala ayooyo uutiliila, taakwe ambubabede pe, kunze kwaLeza uupa kuti zikomene. 8 Ooyo uubyala ayooyo uutiliila mbamwi, pesi umwi awumwi uzoopegwa bulumbu bwakwe kweendelana amulimu wakwe. 9 Nkaambo tubelekaamwi aLeza. Inywe muli muunda waLeza uulikulimwa, ng’anda yaLeza.
10 Mbuli mupati wabasikuyaka* uuli aaluzibo, ndakabikka ntalisyo kweendelana aluzyalo lupati ndundakatondeezegwa aaLeza, pesi umwi ulikuyaka aalinjiyo. Nikuba oobo, umwi awumwi alangisisye mbalikuyaka aalinjiyo. 11 Nkaambo taakwe umwi muntu uukonzya kubikka imwi ntalisyo kuliyeeyo yakabikkwa kale, nkukwaamba Jesu Kkristu. 12 Kuti umwi muntu wayaka aantalisyo eeyi kabelesya ngolida, nsiliva, mabwe aayandikana, zisamu, bwizu naakuti makuba, 13 mulimu wawumwi awumwi uzooboneka mbuubede choonzyo, nkaambo buzuba oobo buzoowubikka aantanganana nkaambo uzooyubununwa aamulilo alubo mulilo uzoozibikka aantanganana nzyaakayaka umwi awumwi. 14 Kuti mulimu ngwaakayaka aalinjiyo wasyaala, muntu ooyo uzoojana bulumbu, 15 kuti walota, muntu ooyo uzoosweekelwa loko, pesi uzoofutulwa. Nikuba oobo, kuzooba mbuli kuti wafutwidwa mumulilo.
16 Tamuzi na kuti inywe lwanu muli tempele lyaLeza, akuti muuya waLeza ukkala mulindinywe? 17 Kufumbwa muntu uunyonyoona tempele lyaLeza, uzoonyonyoonwa aaLeza, nkaambo tempele lyaLeza lilasalala alubo inywe ndindinywe tempele eelyo.
18 Kutabi muntu uulyeena pe: Kuti umwi aakati kanu kabonaanga musongo mubwiime bwazintu oobuno,* abe mufuba-fuba, kuchitila kuti abe musongo. 19 Nkaambo busongo bwanyika eeyi, mbufuba-fuba kuli Leza, nkaambo kulilembedwe kuti: “Ulabacha basongo mulweeno lwabo.” 20 Akuti: “Jehova* ulizi kuti mizeezo yabasongo njabuyo.” 21 Nkinkaako, kutabi muntu uulidunda akaambo kabantu, nkaambo zintu zyoonse nzizyanu, 22 abe Pawulu, abe Apolo, abe Kkefasi,* ibe nyika, bube buumi, lube lufu, zibe zintu ziliwo lino naakuti zintu ziza, zintu zyoonse nzizyanu, 23 mpawo inywe muli baKkristu, anguwe Kkristu nguwaLeza.