Lwakusaanguna kuBakkorinte
15 Bakombima, ndilikumuyeezya atala amakani mabotu ngindakaambilizya kulindinywe, ngimwakatambula alubo ngimuchijisilidi kulingawo. 2 Kuti mwajatisisya kumakani mabotu ngindakaambilizya kulindinywe, mulafutulwa. Kuti teemwachita oobo, nchimwakabeda basyomi tachiwo pe.
3 Nkaambo aakati kazintu zyakusaanguna nzindakamubuzya, nzeezyo nzindakatambula andime, kuti Kkristu wakafwida zibi zyesu kweendelana aMagwalo, 4 akuti wakazikkwa mpawo wabusigwa mubuzuba bwachitatu, kweendelana aMagwalo, 5 akuti wakaboneka kuli Kkefasi* akuli bali Kkumi Ababili. 6 Mpawo wakalibonia kuli basikwiiya bayinda ku 500 aachiindi chimwi. Biingi babo tuchilaamwi ambabo, pesi bamwi bakoona mulufu. 7 Kuzwa waawo, wakalibonia kuli Jakkobo mpawo wakazoolibonia kubaapostoli boonse. 8 Pesi kumamanino wakazoolibonia kulindime nindakachili mbuli mwana wakatumbukwa chiindi kachitanakkwana.
9 Nkaambo ime ndendime muniini loko kuli bamwi baapostoli alubo tandeeleli pe kwiitwa kuti ndili mwaapostoli nkaambo ndakapenzya mbungano yaLeza. 10 Pesi akaambo kaluzyalo lupati lwaLeza, ndili mbuli mbundibede. Alubo luzyalo lwakwe lupati teelwakaba lwabuyo pe aalindime, pesi ndakabeleka kwiinda bamwi boonse, nikuba oobo, teendime pe, pesi nduzyalo lupati lwaLeza luli mulindime. 11 Nkinkaako, kufumbwa kuti ndime naakuti mbabo bakakambawuka, eeyi njiinzila njitukambawukaayo alubo njiyo yakapa kuti mube basyomi.
12 Kuti kakulikukambawukwa kuti Kkristu wakabusigwa kuzwa kubafu, nkamboonzi bamwi aakati kanu nibalikwaamba kuti taakwe kubusigwa kwabantu bafwide pe? 13 Kuti choonzyo kakuli kuti taakwe kubusigwa kwabantu bafwide, nkukwaamba kuti Kkristu taakabusigwa pe. 14 Pesi kuti Kkristu taakabusigwa, nkukwaamba kuti kukambawuka nkutuchita nkwabuyo alubo lusyomo lwanu ndwabuyo. 15 Mukuyungizya, kuti kakuli kuti bafwide tabazoobusigwi choonzyo, tuli bakamboni baLeza bakubeja nkaambo twakapa bukamboni bwakubeja atala aLeza kwiinda mukwaamba kuti Leza wakabusya Kkristu kuzwa kubafu kakuli taakamubusya pe. 16 Nkaambo kuti kakuli kuti bafwide tabazoobusigwi, nkukwaamba kuti anguwe Kkristu taakabusigwa pe. 17 Alubo, kuti Kkristu taakabusigwa pe, nkukwaamba kuti lusyomo lwanu ndwabuyo, muchili muzibi. 18 Alubo, aabo boonse bakoona mulufu muli Kkristu, nkukwaamba kuti bakafwidilila. 19 Kuti kulangilila kwesu muli Kkristu kakuli kwamubuumi oobuno kupela, nkukwaamba kuti tuleetezya kwiinda bantu boonse.
20 Pesi Kkristu wakabusigwa kuzwa kubafu, ngumuchelo wakusaanguna kuli baabo bakoona mulufu. 21 Nkaambo, mbukunga lufu lwakasika kwiinda mumuntu, ankuko kubusigwa kwabantu bafwide kulaba kwiinda mumuntu. 22 Nkaambo, mbukunga boonse balikufwa muli Adamu, nkukwaamba kuti boonse bazooba bawumi muli Kkristu. 23 Pesi umwi awumwi uzoobusigwa aachiindi chakwe cheelede: Kulasaanguna Kkristu muchelo wakusaanguna, mpawo kutobele aabo bali kubbazu lyaKkristu, muchiindi chakubawo kwakwe. 24 Mpawo kuze mamanino, natazoobweedezye Bwaami kuli Leza wakwe aWisi, kali wamaninsya kunyonyoona mfulumende zyoonse abeendelezi boonse abantu bali aamanguzu. 25 Nkaambo weelede kweendelezya kali mwaami, kusikila Leza azoobikke basinkondonyina boonse kunsi aamawulu aakwe. 26 Alubo, sinkondoma wamamanino, lufu, uzoonyonyoonwa. 27 Nkaambo Leza “wakabombya zintu zyoonse kunsi aamawulu aakwe.” Pesi chiindi naamba kuti, ‘zintu zyoonse zyakabombesegwa,’ zili aantanganana kuti nga talikubikkilizya Yooyo wakabombya zintu zyoonse kulinguwe. 28 Pesi zintu zyoonse zyaakubombesegwa kulinguwe, Mwana uzoolibombya kuli Yooyo wakabombya zintu zyoonse kulinguwe, kuchitila kuti Leza abe zintu zyoonse kubantu boonse.
29 Nkinkaako, bazoochitaanzi aabo balikubbabbatizigilwa kufwa? Kuti kakuli kuti bafwide tabazoobusigwi choonzyo, nkamboonzi nibalikubbabbatizigilwa kufwa? 30 Nkamboonzi andiswe nitulikubikka buumi bwesu mungozi chiindi choonse? 31 Buzuba abuzuba ndilangana aalufu. Eezi nzyachoonzyo bakombima mbuli kulidunda nkundichita akaambo kandinywe muli Kkristu Jesu Mwaami wesu. 32 Kuti mbuli bamwi bantu* ndakalwana abanyama bayoosya ku-Efeso, zindigwasyaanzi ime? Kuti kakuli kuti bafwide tabazoobusigwi, “atulye, tunywe nkaambo juunza tulafwa.” 33 Muteenwi pe. Kumvwanana aabantu babi kupambanisya michito iilikabotu.* 34 Amubuke, muchite zintu ziluleme, muleke chiimbo chakuchita chibi nkaambo bamwi tabakwe luzibo atala aLeza. Ndaamba oobo kuchitila kuti mube aabweeme.
35 Nikuba oobo, umwi ulakonzya kubuzya kuti: “Bafwide bazoobusigwa biyeni? Ani bazoobusigwa kabali aamibili iili biyeni?” 36 Iwe numufuba-fuba, nchubyala tachibi chuumi pe kuti teechasaanguna kufwa. 37 Eecho nchubyala ninseke, ibe yawiiti, naakuti yayimwi mbuto, kutali mubili pe uutazookomene, 38 pesi Leza wiipa mubili mbuli mbayanda alubo mbuto imwi ayimwi wiipa mubili wayo. 39 Mibili yoonse tayikozyenie pe, kuli wabantu, kuli wang’ombe, kuli wabayuni, awabaswi. 40 Alubo kuli mibili yakujulu amibili yaanyika, pesi bulemu bwamibili yakujulu mbumbi alubo bulemu bwamibili yaanyika mbumbi. 41 Bulemu bwazuba mbumbi, bulemu bwamweezi mbumbi, bulemu bwanyenyeezi mbumbi. Kwaamba choonzyo, nyenyeezi imwi ayimwi, ilaabulemu busiyene abwayimwi nyenyeezi.
42 Nchimwi biyo akubusigwa kwabantu bwafwide. Eecho chibyalwa mukubola, chibusigwa mukutabola. 43 Eecho chibyalwa kachitakwe bulemu, chibusigwa kachili aabulemu. Eecho chibyalwa kachitakwe manguzu, chibusigwa kachili aamanguzu. 44 Eecho chibyalwa kachili aamubili wanyama, chibusigwa kachili aamubili wamuuya. Nkinkaako, kuti kakuli mubili wanyama, nkukwaamba kuti kuli mubili wamuuya. 45 Mbuli mbukulembedwe kuti: “Adamu muntu wakusaanguna wakaba muntu muumi.” Adamu wamamanino wakaba muuya uupa buumi. 46 Nikuba oobo, teekwakasaanguna mubili wamuuya pe. Mubili wanyama nguwo wakasaanguna, nikwakazooza mubili wamuuya. 47 Muntu wakusaanguna ngwaanyika alubo wakapangwa aabulongo, muntu wabili wakazwa kujulu. 48 Aabo bakapangwa aabulongo, balikozyenie ayooyo wakapangwa aabulongo. Alubo aabo bali kujulu, balikozyenie ayooyo wakazwa kujulu. 49 Mbukunga twakaba muchikozyano chayooyo wakapangwa aabulongo, nkukwaamba kuti tuzooba muchikozyano chayooyo wakujulu.
50 Bakombima, ndilikumubuzya kuti, nyama aganzi tazikonzyi pe kukona Bwaami bwaLeza alubo kubola takukonzyi pe kukona kutabola. 51 Amubone! Ndilikumubuzya nsiswa iisalala: Toonse tatukooni pe mulufu, pesi toonse tuzoochinchwa 52 muchiindi chifwiifwi biyo, mukulaba kwaliso, kwanoolizigwa mweembo wamamanino. Nkaambo mweembo uzoolizigwa alubo bafwide bazoobusigwa kabatachiboli pe alubo tuzoochinchwa. 53 Nkaambo eecho chibola, cheelede kuzwaata kutabola alubo eecho chifwa, cheelede kuzwaata kutafwa. 54 Pesi eechi chibola chaakuzwaata kutabola alubo eechi chifwa chaakuzwaata kutafwa, kaambyo aaka kalembedwe kazoozuzikizigwa kakuti: “Lufu lwamenwa kukabe kutamani.” 55 “Yoolufu, kuzunda kwako kuli kuli? Yoolufu, kuchisa kwako kuli kuli?” 56 Machise aayeta lufu nchibi alubo manguzu aachibi Mulawu.* 57 Pesi alumbwe Leza, nkaambo nguupa kuti tuzunde kwiinda muMwaami wesu Jesu Kkristu!
58 Nkinkaako, bakombima bayandwa, amwiime nji, mutasunzuki pe alubo chiindi choonse kamuli aazyiingi zyakuchita mumulimu waMwaami, kamuzi kuti milimu yanu muMwaami tayili yabuyo pe.