KuMahebberu

11 Lusyomo nkuba aachoonzyo chakuti eezyo zilangililwa zizoochitika, mbukamboni buli aantanganana* bwazintu ziliwo zitaboneki. 2 Akaambo kalusyomo, bantu bachiindi* bakapegwa bukamboni.

3 Akaambo kalusyomo, tumvwisisisya kuti bwiime bwazintu bwakabambwa* ajwi lyaLeza, zyakuti zintu ziboneka zyakabawo kuzwa kuzintu zitaboneki.

4 Akaambo kalusyomo, Abbelo wakapa chipayizyo chiyandikana loko kuli Leza kwiinda chaKkayini, alubo kwiinda mulusyomo oolo, wakatambula bukamboni bwakuti wakaliluleme, nkaambo Leza wakazitambula* zipo zyakwe, alubo nikuba kuti wakafwa, uchaambuula kwiinda mulusyomo lwakwe.

5 Akaambo kalusyomo, Inokki wakalonzegwa kuchitila kuti ataluboni pe lufu, alubo taakwe nkwaakajanika pe nkaambo Leza wakali wamulonzya, nkaambo katanalonzegwa, wakatambula bukamboni bwakuti wakali wabotezya Leza. 6 Mukuyungizya, kuti muntu katakwe lusyomo, tazichiti pe kuti abotezye Leza, nkaambo kufumbwa muntu uuswena kuli Leza, weelede kusyoma kuti mpali akuti ngusikubapa bulumbu aabo bamuyanduula aamoyo woonse.

7 Akaambo kalusyomo, Nowa naakatambula nchenjezyo iizwa kuli Leza atala azintu zyakatalinabonwa, wakatondeezya kuti ulamuyoowa Leza, mpawo wakayaka bwaato bwakufutwida bamung’anda yakwe, alubo kwiinda mulusyomo oolo, wakayipa mulandu nyika, alubo wakaba sikukona bululami buzwa kulusyomo.

8 Akaambo kalusyomo, Abbrahamu naakayitwa, wakaswiilila kwiinda mukwiinka kundawu njaakali kuzootambula kayili lukono, wakayinka nikuba kuti taakakuzi pe nkwaakali kuya. 9 Akaambo kalusyomo, wakakkala kali mweenzu munyika yachisyomezyo mbuli kuti munyika iitali yakulimbabo, kakkala mumatente aamwi a-Izakka aJakkobo, basikukona aanguwe chisyomezyo nchicheecho. 10 Nkaambo wakali kulindila muunzi uuli aantalisyo zyachoonzyo, ooyo wakabambwa akuyakwa aaLeza.

11 Akaambo kalusyomo, anguwe Sara wakatambula manguzu aakuminta nikuba kuti wakali wayinda aachiimo chakuba aamwana, nkaambo wakamubona kuti ulasyomeka ooyo wakachita chisyomezyo. 12 Nkinkaako, kuzwa kumuntu uumwi wakali mbuli kuti ulifwide, kwakazyalwa bana biingi mbuli nyenyeezi zyakujulu alubo batabaliki mbuli museele wakumbali aalwizi.

13 Boonse aaba bakafwa kabali aalusyomo, nikuba kuti teebakakubona pe kuzuzikizigwa kwazisyomezyo, pesi bakazibona kazili kule akuzitambula, alubo bakaambilizya aantanganana kuti bakali beenzu abasikukkala kwachiindi chifwiifwi munyika eeyo. 14 Nkaambo aabo baambuula munzila eeyi, batondeezya kuti babeleka changuzu kuyanduula ndawu yabo. 15 Nikuba oobo, kaansinga bakali kukkala kabayeeya ndawu njibakazwa, bakali kunoojana mweenya wakubweeda. 16 Pesi lino balikubelekela kuti bajane ndawu mbotu, nkukwaamba, ndawu yakujulu. Nkinkaako, Leza takwe bweeme pe ambabo kuti ayitwe kuti nguLeza wabo, nkaambo wababambila muunzi.

17 Akaambo kalusyomo, Abbrahamu naakasunkwa, kwakali mbuli kuti wamupayizya kale Izakka—mwaalumi wakatambula zisyomezyo kabotelwa, wakali kuyanda kupayizya mwanaakwe wakazyedwe aalikke— 18 nikuba kuti wakali wabuzigwa kuti: “Aabo batazoowambwe kuti mbana bako, bazooba kwiinda muli Izakka.” 19 Pesi wakabona kuti Leza ulakonzya kumubusya kuzwa kubafu, alubo wakamutambula kuzwa kubafu munzila yakukozyanisya.

20 Akaambo kalusyomo, anguwe Izakka wakalongezya Jakkobo a-Isawu akaambo kazintu zyakali kuza.

21 Akaambo kalusyomo, Jakkobo kali waba aafwiifwi kufwa, wakalongezya umwi awumwi wabana baJosefa, alubo wakakomba kaseyeme aamufunko wakwe.

22 Akaambo kalusyomo, Josefa kali waamba kufwa, wakaambuula atala akulonga kwabana ba-Israyeli alubo wakapa malayilile atala amafuwa aakwe.*

23 Akaambo kalusyomo, Mozesi wakasiswa aabazyali bakwe kwamyeezi iitatu kuzwa naakazyalwa, nkaambo bakabona kuti mwana wakali mubotu, alubo teebakawuyoowa pe mulawu wamwaami. 24 Akaambo kalusyomo, Mozesi naakakomena, wakakaka kwiitwa kuti mwana wamwana musimbi waFaro, 25 wakasala kujatwa bubi aamwi abantu baLeza kwiinda kuti abotelwe aachibi kwachiindi chifwiifwi, 26 nkaambo wakabona masampu aaKkristu mbuli bunoti bupati kwiinda bunoti bwaku-Ijipita, nkaambo wakali kukulangilila aamoyo woonse kupegwa bulumbu. 27 Akaambo kalusyomo, wakazwa mu-Ijipita katayoowi bukali bwamwaami, nkaambo wakayinkilila kunembo kayimvwi nji mbuli kuti wakalimubwene Ooyo uutaboneki. 28 Akaambo kalusyomo, wakabamba Pasika alubo wakasansiila ganzi, kuchitila kuti sikunyonyoona atachisi* bana babo bakusaanguna.

29 Akaambo kalusyomo, bakayinda aakati kaLwizi Lusalala mbuli kuti mpaanyika njumu, pesi bantu baku-Ijipita nibakeezya kuchita oobo, bakamenwa.

30 Akaambo kalusyomo, miduli yakuJerikko yakadilika, bantu nibakawuzyunguluka kwamazuba aali musanu aabili. 31 Akaambo kalusyomo, Rahabbu wuule taakanyonyoonwa aamwi abantu bakataswiilila, nkaambo wakatambula basikulanga-langa nyika muluumuno.

32 Kuchili zimwi na nzindeelede kwaamba? Nkaambo chiindi chilandisiya kuti ndayinkilila kunembo kwaambuula atala aGidiyoni, Bbarakki, Samisoni, Jefita, Davida aSamuyele abamwi bapolofita. 33 Kwiinda mulusyomo, bakazunda baami, bakeeta bululami, bakatambula zisyomezyo, bakajala milomo yabalavu, 34 bakazima manguzu aamulilo, bakafutuka kupanga, mukubula manguzu bakachitwa kuti babe aamanguzu, bakaba aamanguzu munkondo, bakazunda masoja aakali kubalwana. 35 Banakazi bakatambula bafwide babo kwiinda mukubusigwa, pesi bamwi bantu bakapenzegwa akaambo kakuti teebakazumina kwaangununwa aachimwi chinunuzyo, kuchitila kuti bakajane kubusigwa kubotu loko. 36 Nisimpe, bamwi bakasunkwa kwiinda mukufubaazigwa akuumwa, kuyungizya aali zeezi, bamwi bakaangwa ncheni akuwaalilwa mumajele. 37 Bakatululwa mabwe, bakasunkwa, bakanengwa akuba zipanzi zibili,* bakajayigwa aapanga, bakali kweenda kabazweete zikumba zyambelele azikumba zyampongo, mukubula, mumapenzi, mukutajatwa kabotu, 38 alubo nyika teeyakali kubeelela pe. Bakali kuyabuzunga munkanda, muzilundu, mumpako amumalindi aanyika.

39 Pesi boonse aaba, nikuba kuti bakatambula bukamboni bulikabotu akaambo kalusyomo lwabo, teebakakubona pe kuzuzikizigwa kwachisyomezyo, 40 nkaambo Leza wakali watubonena chimwi chintu chibotu kakuchili chiindi, kuchitila kuti batachitwi kuti bamaninine iswe katutawo pe.