Babetesi
8 Baalumi bamusyobo wa-Efremu bakati kulinguwe: “Niinzi eechi nchwaatuchitila? Wakalekelaanzi kutwiita nuwakayinka kukulwana maMidiyani?” Bakamwaambwiida loko. 2 Pesi wakati kulimbabo: “Niinzi biya nchindachita chikozyenie aanchimwachita? Zyakuvululwida zya-Efremu teezibotu na kwiinda butebuzi bwamasaansa bwa-Abbi-yezari? 3 Leza wakabikka basilutwe bamaMidiyani mujaanza lyanu, nkukwaamba Orebbu aZeebbu, niinzi biya nchindachita?” Naakaamba oobo, bakabatama.
4 Mpawo Gidiyoni wakasika kuJodani wazubuka mulonga ooyo. Mwaalumi ooyo abaalumi bali 300 mbaakali aabo bakali bakatala, pesi teebakaleka pe kubaandilila. 5 Mpawo wakabuzya baalumi bakuSukkoti kuti: “Ndikumbila mubape chinkwa baalumi balikunditobela nkaambo bakatala, alubo ime ndilikwaandilila Zebba aZalimuna, baami baMidiyani.” 6 Pesi basilutwe bakuSukkoti bakati: “Zebba aZalimuna baba mukuboko kwako kale na, zyakuti nga tulabapa chinkwa masooja aako?” 7 Nibakaamba oobo, Gidiyoni wakati: “Akaambo kanzimwaamba, ndizoomukwibbuula amaamvwa aamukoto-koto wamunkanda Jehova naazoobikka Zebba aZalimuna mukuboko kwangu.” 8 Wakazwa ooko, watanta waya kuPenuweli waakwaamba chikumbizyo chikozyenie, pesi baalumi bakuPenuweli bakamusandula majwi aakozyenie aabaalumi bakuSukkoti. 9 Ambabo baalumi bakuPenuweli wakababuzya kuti: “Kuti ndiboole muluumuno, ndiyanda kuzoodilisya ngazi eeyi.”
10 Zebba aZalimuna bakali kuKkakkori amasooja aabo aasika ku 15 000. Aaba mbabo bakali basyaala kunkamu yoonse yamasooja yabantu baKubuzwezuba, nkaambo baalumi bali 120 000 bakali aamapanga bakali bafwa. 11 Gidiyoni wakayinkilila kunembo anzila iitozya kubantu bakkala mumatente kubuzwezuba kwaNobba aJogibbeha mpawo wakalwana kkeempu eeyo kayilyiibide. 12 Zebba aZalimuna nibakachija, wakabaandilila wajata baami aabo babili baMidiyani, nkukwaamba Zebba aZalimuna, wakapa kuti kkeempu yoonse iyoowe.
13 Mpawo Gidiyoni mwana waJowashi wakaboola kuzwa kunkondo kabelesya nzila yiinda muHeresi. 14 Naakali munzila, wakajata mulombe wakuSukkoti mpawo wakamubuzya-buzya. Mulombe ooyo wakamulembela mazina aabasilutwe abaalu bakuSukkoti, bakali baalumi bali 77. 15 Mpawo wakayinka kubaalumi bakuSukkoti wababuzya kuti: “Ngoyu Zebba aZalimuna aabo mbimwakandisampawida kamuti, ‘Zebba aZalimuna baba mukuboko kwako kale na, zyakuti tweelede kubapa chinkwa baalumi bakatede mbulaabo?’” 16 Wakabweza baalu bamuunzi wabakwibbuula amaamvwa aamukoto-koto wamunkanda, wakabayiisya chiiyo baalumi bamuSukkoti. 17 Wakadilisya ngazi yakuPenuweli akujaya baalumi bamumuunzi.
18 Wakabuzya Zebba aZalimuna kuti: “Bakali biyeni baalumi mbimwakajaya kuTabbori?” Bakasandula kuti: “Bakali mbuli nduwe, boonse bakali mbuli bana bamwaami.” 19 Gidiyoni wakati: “Bakali banike bangu, bana babaama. Mbuli Jehova mbali muumi, kaansinga mwakabasiya kabali bawumi, tendalikunoomujaya pe.” 20 Mpawo wakabuzya Jetere mwanaakwe wakusaanguna kuti: “Buka ubajaye.” Pesi mulombe ooyo taakalisomona pe panga lyakwe, wakayoowa nkaambo wakachili muniini. 21 Mpawo Zebba aZalimuna bakati: “Buka, utujaye, nkaambo mwaalumi uboneka aanguzu zyakwe.” Nkinkaako, Gidiyoni wakabuka wajaya Zebba aZalimuna mpawo wakabweza tuntu twakulibotya tuli mbuli mweezi uuchizwaakukkala twakali munsingo zyankamela zyabo.
22 Mpawo ma-Israyeli bakabuzya Gidiyoni kuti: “Tweendelezye, iwe amwanaako amuzukulu wako nkaambo wakatuvuna mukuboko kwamaMidiyani.” 23 Pesi Gidiyoni wakati kulimbabo: “Tandikoomweendelezya pe, naba mwanaangu takoomweendelezya pe. Jehova nguwe uutamweendelezye.” 24 Gidiyoni wakayinkilila kunembo kati: “Ndiyanda kukumbila chimwi chintu kulindinywe: umwi awumwi wanu aandipe ring’i yamumpemo kuzwa kuzintu nzyaakabweza.” (Bantu aaba bakali aamaring’i aamumpemo aangolida nkaambo bakali ma-Ishumayeli.) 25 Bakasandula kuti: “Tulakupa.” Bakawaala maring’i aamumpemo aamulembo ngubakayala kuzwa kuzintu nzibakabweza. 26 Bulemu bwamaring’i aamumpemo aangolida ngaakakumbila bwakali kusika kumashekeli* aangolida aali 1 700, kutabikkilizya atuntu twakubotya tuli mbuli mweezi uuchizwaakukkala, malangu-langu, zigogo zyawuulu zyapepulu zyakali kuzwaatwa abaami baMidiyani ancheni zyakuzwaata zyamunsingo zyankamela.
27 Gidiyoni wakapanga kabaki kabupayizi kabelesya zintu eezi, wakakabikka aantanganana mumuunzi wakwe wa-Ofira; ma-Israyeli boonse bakachita bwaamu bwakumuuya ankako alubo kakaba kakole kuli Gidiyoni akubantu bamung’anda yakwe.
28 Ma-Israyeli bakapa kuti maMidiyani balibombye alubo teebakabalwana lubo pe;* mumazuba aaGidiyoni, nyika yakapumuna* kwaminyaka iili 40.
29 Nkinkaako, Jerubbaala mwana waJowashi wakabweeda kumuunzi wakwe waakukkala nkukooko.
30 Gidiyoni wakaba aabana balombe bali 70 nkaambo wakali aabanakazi biingi loko. 31 Mwanakazi wakwe umwi wamuShekkemu anguwe wakamuzyalila mwana mulombe, mpawo Gidiyoni wakamuuzika kuti Abbimelekki. 32 Gidiyoni mwana waJowashi wakafwa kali wapona minyaka myiingi mpawo wakazikkwa mukabanda kaJowashi wisi mu-Ofira yama-Abbi-yezari.
33 Gidiyoni mbaakafwa biyo, ma-Israyeli bakasaanguna lubo kuchita bwaamu bwakumuuya abaBbaala, bakasala Bbaala-bberiti kuti abe leza wabo. 34 Ma-Israyeli teebakamuyeeya pe Jehova Leza wabo wakabavuna mukuboko kwabasinkondonyina boonse bakabazyungulukide; 35 alubo teebakatondeezya luyando lutamani kuli bamung’anda yaJerubbaala, nkukwaamba Gidiyoni akaambo kazintu zyoonse zibotu nzyaakali wachitila ma-Israyeli.