Lugwalo lwaJakkobo
3 Bakombima, biingi banu tabeelede kuba bayiisi pe, mbukunga mulizi kuti tuzootambula lubeta lupati loko. 2 Nkaambo toonse tulalebwa* ziindi zyiingi. Kuti muntu katalebwi mumajwi, nkukwaamba kuti ulimaninide, alubo ulakonzya kweendelezya mubili wakwe woonse. 3 Kuti twabikka matomu kumilomo yamabbiza kuti atuswiilile, nga tweendelezya mibili yawo yoonse. 4 Alubo amulange maato: Nikuba kuti mapati alubo atontwa aaguwo pati, pesi anyonwa aansoke niini loko kuti ayinke kufumbwa nkwayanda sikweenzya bwaato kuti ayinke.
5 Munzila iikozyenie, lulimi nchipanzi chamubili chiniini, nikuba oobo lulidunda loko. Amubone mbukali kaniini kalilo katenta lusaka lupati! 6 Andulo lulimi mulilo. Lulimi lwiiminina nyika yakutalulama aakati kazipanzi zyamibili yesu, nkaambo lupa kuti mubili woonse utasalali pe, lutenta buumi boonse bwamuntu, alubo lutentwa aamulilo muGehena.* 7 Nkaambo misyobo yoonse yabanyama bamulusaka, yabayuni, yabanyama bayavula ayazilenge zyamulwizi, yeelede kweendelezegwa alubo bantu bakayiyendelezya kale. 8 Pesi taakwe muntu uukonzya kweendelezya lulimi. Talunyoneki pe alubo luchisa bamwi. Luzwide munsamu uujaya. 9 Tulalubelesya kutembawula Jehova* Taata, pesi kumwi tulalubelesya kutuka bantu bakabawo kwiinda “muchikozyano chaLeza.” 10 Mumulomo uumwi muzwa chilongezyo alutuko.
Bakombima, tazili kabotu pe kuti zintu zichitike munzila eeyi. 11 Kujana zyachita na kuti mukasawu kamwi muzwe maanzi mabotu* amaanzi aalula? 12 Bakombima, kujana mukuyu wazyala ma-olifa na, naakuti musaansa kujana wazyala nkuyu na? Naaba maanzi aalaamunyo taagwisyi maanzi mabotu pe.
13 Ngwani musongo alubo uumvwisisisya aakati kanu? Atondeezye milimu iichitwa aamoyo uubombede iizwa kubusongo kwiinda mukulijata kabotu. 14 Pesi kuti kamuzwide bbivwe akukazyania* mumyoyo yanu, mutanoolidundi pe kamulikubejela kasimpe. 15 Oobu teebusongo buzwa kujulu pe, mbwaanyika, mbwabunyama, buzwa kumadimoni. 16 Nkaambo kufumbwa kuli bbivwe akukazyania,* kunooli manyongwe achintu choonse chibi.
17 Pesi busongo buzwa kujulu, chakusaanguna bulasalala, mpawo bulaaluumuno, bulamvwisisisya, bulilibambilide kuswiilila, buzwide lweetelelo amichelo mibotu, tabusaluuli pe, teebwakuupa-wupa pe. 18 Mukuyungizya, muchelo wabululami ubyalwa muzyiimo zilaaluumuno, kuchitila aabo* bapa kuti kube luumuno.