Lwakusaanguna kuBakkorinte
4 Muntu weelede kutubona mbuli babelesi* baKkristu abalangizi bansiswa zisalala zyaLeza. 2 Akaambo kamakani aaya, balangizi balangililwa kuti babe bantu basyomeka. 3 Ime biya tazigwasyi pe kuti mundilange-lange naakuti ndilangwe-langwe aankuta zyabantu. Kwaamba choonzyo, nikuba ndime tandililangi-langi pe. 4 Nkaambo tandiboni pe kuti kuli chintu chibi nchindakachita. Nikuba oobo, eezi tazyaambi kuti ndililuleme pe, nkaambo uundilanga-langa nguJehova.* 5 Nkinkaako, mutabeteki chintu pe chiindi cheelede kachitanasika, kusikila Mwaami asike. Zintu zisisikene zichitwa mumudima, uzoozibikka aatuba alubo makanze aali mumyoyo yabantu, uzoopa kuti azibinkane mpawo umwi awumwi uzoolumbayizigwa aaLeza.
6 Bakombima, ndabelesya zintu eezi kulindime akuli Apolo, kuchitila kuti mugwasikane nkaambo ndiyanda kuti, kwiinda mulindiswe, muzibe kaambo aaka kakuti: “Mutayinzilizyi aazintu zilembedwe,” kuchitila kuti mutalisumpuli kamuyandisya umwi kwiinda umwi. 7 Ani usiyenaali abamwi bantu? Kwaamba choonzyo, niinzi biya nchulaacho nchwaakatapegwa? Kuti kakuli kuti wakachipegwa, nkamboonzi nulikulisumpula aanga teewakachipegwa biya pe?
8 Mwakkutisikana kale na? Mwanota kale na? Mwasaanguna kale na kweendelezya mbuli baami, iswe katutawo? Kwaamba choonzyo, ndilombozya kuti kaansinga mwakasaanguna kale kweendelezya mbuli baami, kuchitila kuti andiswe tweendelezye aandinywe mbuli baami. 9 Nkaambo ndibwene kuti iswe tubaapostoli, Leza wakatubikka kuti tube bakumamanino mukweebelwa, mbuli bantu bapedwe chisubulo chakujayigwa, nkaambo twaba bantu beebelwa mubbuwa lyazisobano anyika, angilozi kuswaanizya abantu. 10 Tuli bafuba-fuba akaambo kaKkristu, pesi inywe mulichenjede muli Kkristu, tatusimide pe, pesi inywe mulisimide, mulalemekwa, pesi iswe tatulemekwi pe. 11 Ambulisunu tulikufwa aanzala anyota, tulikubula zigogo, tulikuumwa, tatukwe aakukkala, 12 alubo tulikubeleka milimu iimizya amaboko eesu. Nitutukilwa tulalongezya, nitupenzegwa tulalisimya amoyo mulamfu. 13 Nitubejelezegwa tusandula aamoyo uubombede,* kusikila lino twaba mbuli doti* lyanyika, alubo twaba mbuli zintu zyoonse zyeelela kusweegwa.
14 Ndilikumulembela zintu eezi, kutali kuti ndimufwisye bweeme pe, pesi kuti ndimulaye mbuli bana bayandwa. 15 Nkaambo nikuba kuti mulakonzya kuba aabayiisi bali 10 000 muli Kkristu, kwaamba choonzyo, tamukwe mawuso miingi pe, nkaambo muli Kkristu Jesu, ime ndaba wuso kwiinda mumakani mabotu. 16 Nkinkaako, ndimusungwaazya kuti munditobelezye. 17 Nchindilikumutumina Timoti, nkaambo mwanaangu uuyandwa alubo uusyomeka muMwaami. Uzoomuyeezya mbundichita zintu* mukubelekela Kkristu, mbuli mbundili kuyiisya koonse mumbungano imwi ayimwi.
18 Bamwi balalisumpula mbuli kuti tandizoosiki pe kulindinywe. 19 Pesi ndilasika kulindinywe lino-lino, kuti kakuli kuyanda kwaJehova.* Tandikooba aandaba amakani ngibaambuula aabo balisumpula, pesi ndiyanda kuziba kuti baajana kuli manguzu. 20 Nkaambo Bwaami bwaLeza, teenkani yamajwi pe, pesi ninkani yamanguzu aaLeza. 21 Nziizili nzimuyanda? Muyanda kuti ndize kulindinywe akaponda na, naakuti aluyando amoyo uubombede?