Detoronomi
10 “Aachiindi eecho, Jehova wakandibuzya kuti, ‘Beza* mabwe aabili aapapalete aali mbuli aakusaanguna, utante uze kulindime kuchilundu; weelede kulipangila bbokesi lyazisamu. 2 Mpawo aamabwe aayo ndilalemba majwi aakali aamabwe aapapalete aakusaanguna ngwaakapwaya, weelede kuzoowabikka mubbokesi.’ 3 Ndakapanga bbokesi lyamukoka amabwe aabili aapapalete aali mbuli aakusaanguna mpawo ndakatanta chilundu kandijisi mabwe aayo mukuboko. 4 Aamabwe aayo wakalemba majwi ngaakalembede kumasaangunino, Milawu Iili Kkumi,* Jehova njaakamubuzya kuchilundu kuzwa mumulilo mubuzuba bwamuswaangano, mpawo Jehova wakandipa mabwe aayo. 5 Ndakafutata ndaseluka chilundu mpawo ndakabikka mabwe aayo aapapalete mubbokesi ndindakali ndapanga, oomo mwaachibede mbuli mbaakandilayilila Jehova.
6 “Ma-Israyeli bakazwa kuBberoti Bbene-jaakkani baya kuMosera. Aroni wakafwa wazikkwa nkukooko, mpawo mwanaakwe Eliyezari wakasaanguna kubeleka kali mupayizi mundawu yakwe. 7 Bakazwa nkukooko baya kuGudigoda, mpawo bakazwa kuGudigoda baya kuJotibbata, nyika yeenda tulonga twamaanzi.
8 “Aachiindi eecho, Jehova wakasala musyobo waLevi kuti unyampule bbokesi lyaJehova lyachizuminano, wiimikile kunembo lyaJehova kuchitila kuti umubelekele akuti ulongezye bantu muzina lyakwe, mbuli mbubali kuchita kusikila sunu. 9 Aaka nkikaambo kapede kuti Levi atabi aachipanzi naakuti lukono aakati kabananyina. Jehova ndukono lwakwe, mbuli mbaakaamba Jehova Leza wanu kulinguwe. 10 Ime lwangu ndakakkala muchilundu mbuli mbundakachita kumasaangunino, ndakakkala mazuba aali 40 amansiku aali 40, Jehova wakandiswiilila lubo aachiindi eecho. Jehova taakayanda pe kumunyonyoona. 11 Mpawo Jehova wakandibuzya kuti, ‘Yinka kunembo lyabantu, mulibambile kulonga kuchitila kuti banjile, babweze nyika njindakakonkezya kumasianyinakulu kuti ndizoobapa.’
12 “O Israyeli, niinzi Jehova Leza wako nzyayanda kulinduwe? Uyanda biyo kuti: uyoowe Jehova Leza wako, weende munzila zyakwe zyoonse, umuyande, ubelekele Jehova Leza wako amoyo wako woonse abuumi bwako boonse, 13 akuti ubambe malayilile amilawu yaJehova njindili kukulayilila sunu kuti zikweendele kabotu. 14 Bona, majulu* ngaaJehova Leza wako, naaba majulu aamajulu, anyika azyoonse zili mulinjiyo. 15 Pesi Jehova wakaswena aafwiifwi amasianyookulu akwaayanda, alubo wakasala ndinywe nibana babo kuzwa kubantu boonse mbuli mbukubede sunu. 16 Mweelede kusalazya myoyo yanu muleke kuba aamitwe miyumu. 17 Nkaambo Jehova Leza wanu, nguLeza wabaleza aMwaami wabaami, nguLeza mupati, uuli aamanguzu, uuyoosya, uutasaluuli alubo uutatambuli chisinkamulomo. 18 Ubeteka muchaala amukamufu munzila iiluleme alubo ulamuyanda mweenzu, ulamupa chakulya azyakuzwaata. 19 Andinywe mweelede kuyanda beenzu, nkaambo mwakali beenzu munyika ya-Ijipita.
20 “Weelede kuyoowa Jehova Leza wako, umubelekele, ukakatile kulinguwe akukonka muzina lyakwe. 21 Nguwe ngweelede kutembawula. NguLeza wako wakakuchitila zintu zyoonse eezi zipati zigambya nzwaakalibonena ameso aako. 22 Masianyookulu nibakakunuka kuya ku-Ijipita, bakali 70, pesi lino Jehova Leza wako wapa kuti mube biingi loko mbuli nyenyeezi zyakujulu.