Lwabili kuBakkorinte

7 Nkinkaako nibayandwa, mbukunga tuli aazisyomezyo eezi, atulisalazye kuzintu zyoonse zipa kuti tutasalali kumubili akumuuya, tuyungizye busalali bwesu mukuyoowa Leza.

2 Amututambule mumyoyo yanu. Taakwe ngutwakabisizya pe, taakwe ngutwakapambanisya pe, taakwe ngutwakadyaaminina pe. 3 Tandilikwaamba zintu eezi kuti ndimupe mulandu pe. Nkaambo mbuli mbundakaamba kale, muli mumyoyo yesu kuti tufwaamwi akuti tuponaamwi. 4 Ndili aalwaangunuko lupati lwakwaambuula kulindinywe. Ndilalidunda kapati akaambo kandinywe. Ndazuzigwa luumbulizyo alubo ndilikufusuuka biya akukondwa mumapenzi eesu woonse.

5 Kwaamba choonzyo, nitwakasika kuMakkedoniya, mibili yesu teeyakapumuna pe, pesi twakayinkilila kunembo kupenzegwa munzila zyoonse. Kunze twakali kulwanwa, alubo mukati twakali kuyoowa. 6 Pesi Leza ooyo uumbulizya aabo bawuside, wakatuumbulizya kwiinda mukubawo kwaTito, 7 kutali akubawo kwakwe kupela, pesi aluumbulizyo ndwaakajana akaambo kandinywe, mbukunga wakatubuzya atala achiyandisyo chanu chakuyanda kundibona, kuusa kwanu kupati, akukataazikana kwanu* akaambo kandime, nkinkaako, ndakabotelwa loko.

8 Nikuba kuti ndakapa kuti muuse akaambo kalugwalo, tandilisoli pe. Nikuba kuti ndakalisola kumatalikilo (akaambo kakuti lugwalo oolo lwakapa kuti muuse nikuba kuti mwakawusa kwachiindi chifwiifwi), 9 pesi lino ndilikubotelwa, kutali akaambo kakuti mwakawusa kupela, pesi akaambo kakuti kuusa kwanu kwakapa kuti musanduke. Nkaambo mwakawusa kweendelana aakuyanda kwaLeza, zyakuti taakwe mapenzi aakamusikila akaambo kandiswe. 10 Nkaambo kuusa kweendelana aakuyanda kwaLeza, kupa kuti muntu asanduke mpawo azoojane lufutuko katalisoli pe. Pesi kuusa kwanyika, kweeta lufu. 11 Amubone kuusa kweendelana aakuyanda kwaLeza nkumwakachita kazizwa aansi aamoyo mbukwakapa kuti mube, kwakapa kuti mulisalazye, munyeme loko, muyoowe loko, mube aachiyandisyo chipati, musungwaale loko, mube aachiyandisyo chipati chakululamika zintu zitali kabotu! Muzintu zyoonse mwakatondeezya kuti mulasalala* kunkani eeyi. 12 Nikuba kuti ndakamulembela, teendakachita oobo akaambo kamuntu wakabisya naakuti akaambo kamuntu wakabisigilwa, pesi ndakamulembela kuchitila kuti chiyandisyo nchimulaacho chakutuswiilila aakati kanu, chiboneke kunembo lyaLeza. 13 Nchitwawumbulizigwa.

Pesi mukuyungizya kuluumbulizyo lwesu, tulikubotelwa loko akaambo kakubotelwa kwaTito, nkaambo moonse mwakabusilizya moyo* wakwe. 14 Nkaambo kuti kakuli kuti inywe ndakamudundilizya kulinguwe, tandikooba aabweeme pe, pesi mbukunga zintu zyoonse nzitwakamubuzya zyakali zyachoonzyo, ankuko kumudundilizya nkutwakachita kuli Tito, kwaboneka kuti nkwachoonzyo. 15 Alubo luyando ndwalaalo kulindinywe ndupati loko, nkaambo ulakuyeeya kuswiilila kwanu moonse, mukuti mwakamutambula kamuyoowa akuzazama. 16 Ndilabotelwa, nkaambo muzintu zyoonse ndilamusyoma.*