Lwakusaanguna kuBatesalonikka
3 Nitwakabona kuti tatuchikonzyi pe kulisimya, twakabona kazili kabotu loko kuti tukkale atulikke mu-Atene, 2 alubo twakatuma Timoti, mukombima amubelesi waLeza wamakani mabotu* aali atala aKkristu, kuti azoomusimye akumuumbulizya akaambo kalusyomo lwanu, 3 kuchitila kuti kutabi muntu naaba umwi uuzungaanisigwa* aamapenzi aaya. Nkaambo inywe lwanu mulizi kuti tatukonzyi pe kuchija mapenzi aali boobu. 4 Nkaambo nitwakachili aandinywe, twakali kukkala katumubuzya kuti tuzooswaana mapenzi, alubo mbuli mbumuzi, eezi nzizyo zyachitika. 5 Nkinkaako, nindakabona kuti tandichikonzyi pe kulisimya, ndakatuma muntu kuti ndizibe atala akusyomeka kwanu, nkaambo zilakonzeka kuti amwi Sikusunka wakamusunka mpawo mulimu wesu waba wabuyo.
6 Pesi Timoti wasika lino-lino kazwa kulindinywe alubo watubuzya makani mabotu atala akusyomeka kwanu aluyando lwanu, kuti mukkala kamuyeeya chiindi chibotu nchimwakabaacho andiswe akuti muli aachiyandisyo chakutubona mbuli mbutuli aachiyandisyo chakumubona andiswe. 7 Nchitwawumbulizigwa bakombima mumakataazyo eesu woonse amumapenzi eesu woonse* akaambo kandinywe akusyomeka kwanu. 8 Nkaambo nga twabusilizigwa* kuti kamwiimvwi nji muMwaami. 9 Kujana twatondeezya biyeni kuti tulamulumba Leza akaambo kakukondwa kupati nkutulaako kunembo lyakwe akaambo kandinywe? 10 Sikati amansiku tukomba nkombyo zyakukombelezya amoyo woonse kuti tuzoomubone akuti tumupe nzimutakwaazyo mulusyomo lwanu.
11 Leza wesu, Taata lwakwe aMwaami wesu Jesu, abatujulile nzila yakuti tuze kulindinywe. 12 Mukuyungizya, Mwaami ape kuti luyando lwanu luyungizye, muyandane loko akuti muyande bantu boonse mbuli mbutumuyanda andiswe, 13 kuchitila kuti asimye myoyo yanu, kuti itabi aamulandu mukusalala kunembo lyaLeza wesu Taata, kuchiindi chakubawo kwaMwaami wesu Jesu kali aabasalali bakwe boonse.