Lwabili kuBakkorinte
11 Ndilombozya kuti munditondeezye moyo mulamfu akaambo kakuti ndilimufuba-fuba mbichaani. Pesi kwaamba choonzyo, mulikunditondeezya moyo mulamfu. 2 Nkaambo ndili aabuzuba* akaambo kandinywe, buzuba bukozyenie ambwalaabo Leza nkaambo ndakamusyomezya kuti mukwatwe kumwaalumi uumwi, kuchitila kuti ndimutole kuli Kkristu kamuli nakalindu uusalala. 3 Pesi ndiyoowela kuti, mbuli nzoka mbuyakoongelezya Eva kwiinda mulweeno lwayo, mizeezo yanu ilakonzya kupambanisigwa mpawo muleke kusyomeka kuli Kkristu akumupa busalali bumweelede. 4 Nzindilikwaamba nzyakuti, kuti kwasika umwi muntu kalikukambawuka Jesu, uutali yooyo ngutwakakambawuka, naakuti, kuti mwatambula muuya uutali ooyo ngumwakatambula, naakuti, kuti mwatambula makani mabotu aatali aayo ngimwakatambula, mulafwambaana kumutondeezya moyo mulamfu muntu ooyo. 5 Nkaambo ndiyeeya kuti baapostoli banu basumpukide loko, taakwe chintu nichiba chimwi nchibandiindaacho pe. 6 Nikuba kuti tandipedwe chipo chakwaambuula pesi luzibo ndilaalo. Kwaamba choonzyo, twakamutondeezya munzila zyoonse amuzintu zyoonse kuti luzibo tulaalo.
7 Naakuti, ndakabisya na nindakalibombya, kuchitila kuti musumpulwe, mbukunga ndakabotelwa kwaambilizya makani mabotu aaLeza kulindinywe kanditamubbadalisyi pe? 8 Kwakali mbuli kuti ndilikubbida zimwi mbungano, kwiinda mukutambula zipo* kuti ndimubelekele. 9 Nikuba oobo, nindakali aandinywe alubo nindakabula zyakubelesya, taakwe ngundakalemezya pe, nkaambo bakombima bakazwa kuMakkedoniya bakandipa zyiingi nzindakabulide. Kwaamba choonzyo, muzintu zyoonse ndakeezya kuti nditamulemezyi alubo ndilayinkilila kunembo kuchita oobo. 10 Kufumbwa kuti kasimpe kaKkristu kakachikkede mulindime, tandikooleka pe kulidunda kunkani eeyi mundawu zili mu-Akkaya. 11 Akaambo kanzi? Akaambo kakuti tandimuyandi na? Peepe. Leza ulizi kuti ndilamuyanda.
12 Pesi ndilayinkilila kunembo kuchita nzindilikuchita, kuchitila kuti batabi aakaambo kakuyubaako pe, aabo bayanda kubonekaanga baleelene andiswe muzintu nzibalidundaazyo. 13 Nkaambo baalumi bali boobu mbaapostoli bakubeja, mbabelesi bali aalweeno, balichita kuba baapostoli baKkristu. 14 Tazindigambyi pe eezi, nkaambo anguwe Saatani ulikulichita kuba ngilozi yamumuni. 15 Nkinkaako, teechintu chigambya pe kuti ambabo babelesi bakwe, balikulichita kuba babelesi babululami. Pesi mamanino aabo azooba kweendelana amilimu yabo.
16 Ndilayindulula lubo: Kutabi muntu naaba uumwi uubonaanga ndilimufuba-fuba pesi kuti kamubonaanga ndilimufuba-fuba, amundibone kuba muntu mufuba-fuba, kuchitila kuti ndilidunde mbichaani andime. 17 Nzindilikwaamba lino tandichitobelezyi chikozyano chaMwaami pe, pesi ndaabutobelezya muntu mufuba-fuba, uulisyoma alubo uulidunda. 18 Mbukunga biingi balikulidunda akaambo kazintu zyakunyama,* andime ndilalidunda. 19 Mbukunga mulibona kuba bantu bachenjede, nkamboonzi nimuli kubatondeezya moyo mulamfu bantu bafuba-fuba, kumwi kamuli kubotelwa? 20 Kwaamba choonzyo, kufumbwa muntu uumutola kubuzike, uunyonyoona zintu zyanu, uumunyanga zintu zyanu, uulisumpula alubo uumuuma lubayi, mulamutondeezya moyo mulamfu.
21 Nzindilikwaamba eezi zipa kuti iswe tubule bulemu, nkaambo bamwi banu babonaanga tatukwe manguzu pe.
Pesi kuti bamwi bantu kabatayoowi pe—ndilikwaambuula mbuli muntu mufuba-fuba—andime tandikooyoowa pe. 22 MaHebberu na? Andime ndili muHebberu. Ma-Israyeli na? Andime ndili mu-Israyeli. Mbana ba-Abbrahamu na? Andime ndili mwana wa-Abbrahamu. 23 Mbabelesi baKkristu na? Ime biya ndisandula mbuli muntu uupengede, ndilabayinda boonse: Ndakachita mulimu mwiingi, ndakaangwa twiingi, ndakapenzegwa twiingi kwiinda mukuumwa alubo ndakasifwe twiingi. 24 Kwaziindi zili musanu, maJuda bakanduuma zimboko zili 39. 25 Kwaziindi zitatu ndakawumwa tuponda, mpawo kwachiindi chimwi ndakatululwa mabwe, kwaziindi zitatu ndakanyonyookelwa bwaato. Limwi zuba mansiku asikati ndakali mulwizi lubbila loko. 26 Kwaziindi zyiingi ndakali mulweendo, ndakali mungozi mumilonga, ndakali mungozi kuzigwebenga, ndakali mungozi kubantu bakulindiswe, ndakali mungozi kubantu bazisi, ndakali mungozi mumuunzi, ndakali mungozi munkanda, ndakali mungozi mulwizi, ndakali mungozi kubakombima bakubeja, 27 mukubeleka amukuchita milimu iimizya, mukutoona mansiku kwaziindi zyiingi, mukufwa aanzala anyota, mukubula chakulya kwaziindi zyiingi, mukufwa mpeyo amukubula zyakuzwaata.
28 Kuyungizya kuzintu zyoonse eezi, kuli chimwi chintu chindikataazya loko buzuba abuzuba: kukataazikana atala ambungano zyoonse. 29 Ngwani uutakwe manguzu, ime kandili aamanguzu? Ngwani uulebwa, ime nditanyemi loko?
30 Kuti kandeelede kulidunda, ndilalidunda aazintu zitondeezya kuti tandikwe manguzu pe. 31 Leza Wisi waMwaami Jesu, Ooyo weelede kutembawulwa kukabe kutamani, ulizi kuti tandili kubeja pe. 32 KuDamasikko, mweendelezi wakali munsi aaMwaami Aritasi, wakali kulinda muunzi wabantu bakuDamasikko kuchitila kuti andijate, 33 pesi ndakaselusigwa aawindo lyakajisini aamuduli wamuunzi kandili mubbasikiti mpawo ndakafutuka mumaboko aakwe.