Makani mabotu aakalembwa aaMateyo
28 Nikwakali kwaamba kucha mubuzuba bwakusaanguna bwamviki, Sabata kayili yayinda, Mariya Magadalina awumwi Mariya, bakasika kuzoobona kabanda.
2 Lino bona, kwakali kwachitika muzuzumo wanyika mupati, nkaambo ngilozi yaJehova* yakali yaseluka kuzwa kujulu, yakunkulisya bbwe lyakajalide kabanda alubo yakalikkede aalindilyo. 3 Ngilozi eeyo yakali kumweka mbuli kalabi alubo zigogo zyayo zyakali kutuba buu mbuli chaanda.* 4 Balindi nibakayibona, bakayoowa loko mpawo bakasaanguna kuzazama alubo bakaba mbuli bantu bafwide.
5 Pesi ngilozi eeyo yakabuzya banakazi aabo kuti: “Mutayoowi pe nkaambo ndilizi kuti mulikuyanduula Jesu, ooyo wakagankaminwa aachisamu. 6 Tawo pe aano, nkaambo wakabusigwa mbuli mbaakaamba. Amuze muzoobone mpaakalede. 7 Lino amufwambaane mwiinke, mukabuzye basikwiiya bakwe kuti wakabusigwa kuzwa kubafu alubo lino ulamusaangunina kusika kuGalili. Muyoomubona nkukooko. Amubone, ndamubuzya kale.”
8 Nkinkaako, banakazi aabo bakazwa aakabanda kakuyeezya chakufwambaana, kabayoowede alubo kabali kubotelwa loko alubo bakachijaana kuti bakabuzye basikwiiya bakwe. 9 Lino bona! Jesu wakabaswaana mpawo wakati: “Mwapona!” Mpawo banakazi aabo bakaswena bamujata kumawulu mpawo bakamufugamina. 10 Mpawo Jesu wakati kulimbabo: “Mutayoowi pe, amwiinke mukabuzye basikwiiya bangu, kuchitila kuti baye kuGalili, ooko nkuko nkubatakandibone.”
11 Nibakachili munzila kabaya nkukooko, bamwi balindi bakanjila mumuunzi mpawo bakabuzya bapati babapayizi zintu zyoonse zyakali zyachitika. 12 Bapati babapayizi abaalu bakabunganaamwi kuti baambuuzyanie, mpawo bakapa masoja mali nyingi yansiliva, 13 mpawo bakati: “Amukaambe kuti, ‘Basikwiiya bakwe bakasika mansiku mpawo babba mubili wakwe swe katulikoona.’ 14 Alubo, kuti zintu eezi zyasika mumatwi aamweendelezi, tuyoomupandulwida makani aaya,* inywe tamweelede kukataazikana pe.” 15 Nkinkaako, bakabweza mali yansiliva akuchita mbuli mbubakabuzigwa alubo makani aaya akazula kumaJuda woonse kusikila sunu.
16 Nikuba oobo, basikwiiya bali 11 bakayinka kuGalili kuchilundu Jesu nchaakaambide kuti bakaakuswaanane nkuko. 17 Nibakamubona, bakamufugamina pesi bamwi bakali kuzumbuuzya. 18 Jesu wakasika mpubakabede mpawo wakaambuula aambabo kati: “Ndapegwa manguzu woonse kujulu aanyika. 19 Nkinkaako, amwiinke mukayiisye bantu bazisi zyoonse kuti babe basikwiiya, mubabbabbatizye muzina lyaTaata, alyaMwana alyamuuya uusalala, 20 kamulikubayiisya kubamba zintu zyoonse nzindakamulayilila. Amubone! ndinooli aandinywe mazuba woonse kusikila kumamanino aabwiime bwazintu.”*