Chiyubunuzyo chaJohane
2 “Kungilozi yambungano iili ku-Efeso, lemba kuti: Eezi nziizintu nzyaamba ooyo uujisi nyenyeezi zili musanu azibili mukuboko kwakwe kwachilisyo alubo weenda aakati kazibikkilo zyamalambe zyangolida zili musanu azibili: 2 ‘Ndiliizi michito yako, amilimu yako, akulisimya kwako, akuti tubaleki kupela bantu babi, akuti ulabasunka aabo balyaamba kuti mbaapostoli pesi kabatali baapostoli pe, alubo wakajana kuti mbabeji. 3 Alubo ulikulisimya, ulijisilidi akaambo kazina lyangu alubo teewakatala pe. 4 Nikuba oobo, ndili aakaambo aaka atala anduwe, kakuti waleka kutondeezya luyando ndwaakalaalo kumasaangunino.
5 “‘Nkinkaako, yeeya mbuwakabede kutanawa, alubo usanduke, uchite michito njwaakali kuchita kumasaangunino. Kuti teewachita oobo, ndilaza kulinduwe, mpawo ndigwisye chibikkilo chako chalambe aandawu yacho, kunze kwakuti wasanduka. 6 Nikuba oobo, kuli chintu chibotu nchuchita: ulayizonda michito yakabunga kaNikkolayo, njindizonda andime. 7 Ooyo uuli aamatwi, amvwe nzuwaamba muuya kumbungano: Ooyo uuzunda ndizoopa kuti alye munsamu wabuumi, uuli muparadayizi yaLeza.’
8 “Kungilozi yambungano iili kuSimuna, lemba kuti: Eezi nziizintu nzyaamba, ‘Wakusaanguna aWamamanino,’ ooyo wakafwa mpawo waba muumi lubo: 9 ‘Ndilaazi mapenzi aako akufwaba kwako—pesi ulinotede—amasampu ngibakwaamba aabo balyaamba kuti maJuda, kakuli teemaJuda aachoonzyo pe, pesi kabali chikombelo chaSaatani. 10 Utaayoowi pe mapenzi ngwaaba aafwiifwi kuswaana. Bona! Dyabbulosi ulayinkilila kunembo kuwaala bamwi banu mujele, kuchitila kuti musunkwe chakumaninina, alubo muzooba aamapenzi kwamazuba aali kkumi. Tondeezya kuti ulasyomeka nikuba kusikila kulufu mpawo ndizookupa bulumbu bwabuumi.* 11 Ooyo uuli aamatwi, amvwe nzuwaamba muuya kumbungano: Ooyo uuzunda takaluboni pe lufu lwachibili.’
12 “Kungilozi yambungano iili kuPegamu, lemba kuti: Eezi nziizintu nzyaamba ooyo uuli aapanga damfu, libosya, linenga koonse-koonse: 13 ‘Ndilikuzi nkukkala, ukkala ooko kuli chuuno chabwaami chaSaatani, nikuba oobo wiinkilila kunembo kujatilila kuzina lyangu alubo teewakaleka pe kusyoma mulindime nikuba kumazuba aa-Antipasi, kamboni wangu uusyomeka, ooyo wakajayigwa kumbali lyako, ooko nkwakkala Saatani.
14 “‘Nikuba oobo, ndili aatwaambo tuche atala anduwe, kuti ooko nkubede kuli bantu bakakatila kunjiisyo yaBbalamu, ooyo wakayiisya Bbalakki kuti abikke chilebyo kunembo lyabana ba-Israyeli, kuti balye zintu zyakapayizigwa kuzibumbwa akuti bachite bwaamu.* 15 Munzila iikozyenie, anduwe ulaabo aabo bakakatila kunjiisyo yakabunga kaNikkolayo. 16 Nkinkaako, sanduka. Kuti teewachita oobo, ndilikuza kulinduwe chakufwambaana alubo ndizoobalwana apanga damfu lyamulomo wangu.
17 “‘Ooyo uuli aamatwi, amvwe nzuwaamba muuya kumbungano: Ooyo uuzunda ndizoomupa imwi mana iisisidwe, alubo ndizoomupa kabwe katuba kabulungusene, kalembedwe zina pya litazibidwe aawumwi muntu kunze kwayooyo uukatambula.’
18 “Kungilozi yambungano iili kuTiyatira, lemba kuti: Eezi nziizintu nzyaamba Mwana waLeza, ooyo uuli aameso aali mbuli mulilo uuvwilima amawulu aali mbuli kkopa mbotu:* 19 ‘Ndiliizi michito yako, aluyando lwako, alusyomo lwako, amulimu wako, akulisimya nkuchita, akuti michito yako njulikuchita lino myiingi kwiinda yakumasaangunino.
20 “‘Nikuba oobo, ndili aakaambo aaka anduwe, kuti ulikumulekela kupela mwanakazi uutegwa Jezebbeli, ooyo uulyaamba kuti mupolofita, alubo uuyiisya bazike bangu akubeena kuti bachite bwaamu* akuti balye zintu zyakapayizigwa kuzibumbwa. 21 Mwanakazi ooyu ndakamupa chiindi chakuti asanduke, pesi tayandi pe kusanduka kubwaamu* bwakwe. 22 Bona! Kwaba aafwiifwi kuti mwanakazi ooyu ndimuwaalile aabulo bwakuchisilwa, alubo aabo balikuchita bumambi anguwe ndizoobawaalila mumapenzi mapati, kunze kwakuti basanduka kumichito yakwe. 23 Alubo bana bakwe ndizoobajaya aachilwazi chijaya, kuchitila kuti mbungano zyoonse zizibe kuti ndime ooyo uulanga-langa mizeezo* iili mukati, amyoyo alubo umwi awumwi ndizoomupa zyeendelana amichito yakwe.
24 “‘Nikuba oobo, aabo boonse bali muTiyatira, boonse batatobeli njiisyo eeyi, aabo bakataziba zintu eezyo zyaambwa kuti “zintu zinikide zyaSaatani,” ndibabuzya kuti: Taakwe umwi mukuli pe uulema ngundilikubikka aalindinywe. 25 Nikuba oobo, amujatisisye kuzintu nzimulaazyo kusikila ndizoosike. 26 Alubo ooyo uuzunda alubo uubamba michito yangu kusikila kumamanino, ndizoomupa manguzu aakweendelezya zisi, 27 alubo uzooyembela bantu ankoli yansimbi zyakuti bazoopwachulwa kuba zipanzi-panzi mbuli zibelesyo zyabulongo, mbuli mbundakatambula manguzu kuzwa kuli Taata. 28 Alubo ndizoomupa nyenyeezi yakubuchedo. 29 Ooyo uuli aamatwi, amvwe nzuwaamba muuya kumbungano.’