Lugwalo lwaJakkobo
4 Niinzi chipa kuti kube nkondo akulwana aakati kanu? Tazizwi kuzintu ziyandwa aanyama yanu na zilikulwana mukati kanu?* 2 Muli aachiyandisyo, pesi taakwe nchimulaacho pe. Mulikwiinkilila kunembo kujaya akweemuzya pesi tamujani pe. Mulikwiinkilila kunembo kulwana akuchita zyankondo. Taakwe nchimulaacho pe nkaambo tamukumbili pe. 3 Chiindi nimukumbila tamupegwi pe, nkaambo mukumbila kamuli aamakanze mabi, kuchitila kuti muzibelesezye kukuchita ziyandwa aanyama yanu.
4 Nibasimamambi,* tamuzi na kuti kuba beenzinyina banyika kupa kuti mube basinkondonyina aLeza? Nkinkaako, kufumbwa muntu uuyanda kuba mweenzinyina wanyika, ulichita kuba sinkondonyina waLeza. 5 Naakuti, mubonaanga lugwalo lulaamba na kakutakwe kaambo kuti: “Muuya uukkede mulindiswe ulaachiyandisyo chakuba aamunyono”? 6 Nikuba oobo, luzyalo lupati ndwapa ndupati loko. Nkinkaako, lugwalo lwaamba kuti: “Leza ulabakazya aabo balisumpula, pesi aabo balibombya ubafwida luzyalo lupati.”
7 Nkinkaako, amulibombye kuli Leza, pesi amumukazye Dyabbulosi, mpawo ulamuchija. 8 Amuswene aafwiifwi aLeza, anguwe ulaswena aafwiifwi andinywe. Amusalazye maboko aanu inywe nibasizibi, musalazye myoyo yanu, inywe nimuli aamyoyo iibili. 9 Amuuse, moomoke alubo mulile. Kuseka kwanu akuchinche kube koomoka, alubo kukondwa kwanu akube kumana manguzu. 10 Amulibombye mumeso aaJehova* mpawo uzoomusumpula.
11 Nibakombima, amuleke kwaambuula bubi atala abamwi. Kufumbwa muntu waambuula bubi atala amukombinyina naakuti uubeteka mukombinyina, waambuula bubi atala amulawu alubo ubeteka mulawu. Kuti wabeteka mulawu, tuchili sikuchita zyaambwa aamulawu pe, pesi waba mubetesi. 12 Kuli Sikupa Mulawu aMubetesi uumwi biyo, ooyo uukonzya kufutula akunyonyoona. Pesi iwe nduweni kuti ubeteke muntu nguyakilenaawe?
13 Amumvwe, inywe nimwaamba kuti: “Sunu naakuti juunza tuzooyinka mumuunzi ooyu, mpawo tuzookkala mumo kwamunyaka uumwi alubo tuzoochita bbizinesi akujana mpindu,” 14 kakuli tamuzi pe kuti buumi bwanu bunooli biyeni juunza. Nkaambo muli sikunku uuboneka kwachiindi chifwiifwi mpawo ulamana. 15 Pesi, mweelede kwaamba kuti: “Kuti Jehova* kayanda, tuzoopona mpawo tuchite eechi naakuti eechiya.” 16 Pesi lino mulalisumpula mukulidunda kwanu. Kulidunda koonse ooku nkubi. 17 Nkinkaako, kuti umwi muntu kazi kuchita chintu chibotu, mpawo waleka kuchichita, unooli ulikubisya.