Milimu yaBaapostoli
9 Pesi Sawulu kachifundikilide akunyema alubo kayanda kujaya basikwiiya baMwaami, wakayinka kumupayizi mupati, 2 waakukumbila magwalo ngaakali kuyootola kuzikombelo kuDamasikko, kuchitila kuti akasunge baalumi abanakazi Banzila Eeyi mpawo abatole kuJerusalema.
3 Naakali kuyabweenda alubo kali waba aafwiifwi kusika kuDamasikko, mumuni wakamumwekela mpawaawo kuzwa kujulu, 4 mpawo wakawidaansi alubo wakamvwa jwi lyakamubuzya kuti: “Sawulu, Sawulu, undipenzezyaanzi?” 5 Mpawo Sawulu wakati: “Nduweni Mwaami?” Jwi lyakati: “Ndime Jesu ngulikupenzya. 6 Pesi buka unjile mumuunzi mpawo uzoobuzigwa nzweelede kuchita.” 7 Baalumi mbaakali kweendaabo bakayimikila kabatakwe lyakwaamba, bakali kumvwa jwi pesi muntu wakali kwaambuula teebakamubwene pe. 8 Mpawo Sawulu wakanyampuka, pesi taakwe nchaakali kubona pe nikuba kuti wakali kulanga. Bantu mbaakali kweendaabo bakamujata kuboko mpawo bakamutola kuDamasikko. 9 Kwamazuba aatatu, taakwe nchaakali kubona pe alubo taakwe nchaakalya nikuba kunywa.
10 MuDamasikko mwakali umwi sikwiiya uutegwa Ananiya. Mwaami wakati kulinguwe muchilengaano: “Ananiya!” Mpawo wakati: “Ndime aano Mwaami.” 11 Mwaami wakati kulinguwe: “Nyampuka, uye kumugwagwa uutegwa Uululeme, ukayanduule mwaalumi uutegwa Sawulu wakuTaso mung’anda yaJudasi nkaambo ulikukomba 12 alubo muchilengaano wabona mwaalumi uutegwa Ananiya kalikuza kulinguwe kuti azoomubikke maboko, kuchitila kuti abone lubo.” 13 Pesi Ananiya wakati: “Mwaami, ndakamvwa bantu biingi loko kabali kwaambuula atala amuntu ooyu, azintu zibi nzyaakachitila basalali bako kuJerusalema. 14 Alubo bapati babapayizi bakamupa mvumo yakuti asunge bantu boonse bayita zina lyako.” 15 Pesi Mwaami wakati kulinguwe: “Yinka, nkaambo mwaalumi ooyu nchibelesyo chisalidwe kulindime kuti atole zina lyangu kuzisi, kubaami akubana ba-Israyeli. 16 Nkaambo ndizoomutondeezya aantanganana mbaali miingi mapenzi ngayelede kuswaana akaambo kazina lyangu.”
17 Nkinkaako, Ananiya wakeenda alubo wakanjila mung’anda mpawo wakamubikka maboko, wamubuzya kuti: “Sawulu, mukombima, Mwaami Jesu, ooyo wakaboneka kulinduwe mumugwagwa nwaakali kuzookuno, wandituma kulinduwe kuchitila kuti meso aako abone akuti uzule muuya uusalala.” 18 Mpawaawo, Sawulu wakaloka zimwi zintu zili mbuli makwa aabaswi mumeso, mpawo wakasaanguna kubona, alubo wakanyampuka wabbabbatizigwa. 19 Mpawo wakalya, wajana manguzu.
Alubo wakakkala kwamazuba abasikwiiya kuDamasikko. 20 Aachiindi nchicheecho, wakasaanguna kukambawuka muzikombelo atala aJesu kati, ooyu Mwana waLeza. 21 Pesi bantu boonse bakali kumuswiilila bakagamba, kabati: “Mwaalumi ooyu teenguwe na wakali koombya bantu muJerusalema bayita zina eeli? Ookuno taakazida kuzoosunga bantu aaba na akubatola kubapati babapayizi?” 22 Pesi Sawulu wakayinkilila kunembo kuba aamanguzu alubo maJuda bakkala muDamasikko bakali kugamba chiindi naakali kubapandulwida munzila iimvwisisika kuti Jesu ngunguwe Kkristu.
23 Nikwakayinda mazuba miingi, maJuda bakayanduula nzila yakuti bamujaye. 24 Nikuba oobo, Sawulu wakaziziba nzibakali kuyanda kuchita. Alubo bakali kulinda milyango sikati amansiku kuchitila kuti bamujaye. 25 Nkinkaako, basikwiiya bakwe bakamubweza mansiku bamubikka mubbasikiti, mpawo bakamuselusizya aabbanga lyakali kumuduli wamuunzi.
26 Naakasika kuJerusalema, wakeezya kuti aliswaanizye abasikwiiya pesi boonse bakali kumuyoowa nkaambo teebakali kusyoma pe kuti wakali waba sikwiiya. 27 Nkinkaako, Bbanabbasi wakasika kuzoomugwasya alubo wakamutola kubaapostoli alubo wakababuzya buzwide atala ambaakabona Mwaami munzila, akuti wakali waambuulaawe. Alubo wakababuzya atala ambaakaambuula katayoowi muzina lyaJesu kuDamasikko. 28 Nkinkaako, wakakkalaabo alubo wakali kweendeenda kaangunukide muJerusalema, kaambuula muzina lyaMwaami katayoowi pe. 29 Wakali kwaambuula akukazyania amaJuda baambuula chiGrikki, pesi bakeezya kumujaya. 30 Bakombinyina nibakaziziba eezi, bakakunukaawe kuKkesariya mpawo bakati aye kuTaso.
31 Aachiindi eecho, mbungano zyakali muJudiya yoonse, muGalili amuSamariya zyakaba muluumuno, alubo zyakali kuyakwa. Mbungano zyakali kuvula nkaambo zyakali kweenda munzila iitondeezya kuti ziyoowa Jehova* akuumbulizigwa mumuuya uusalala.
32 Petro naakali kuyabweenda muchilawu choonse, wakakunuka kaya kubasalali bakali kukkala kuLida. 33 Kundawu eeyo, wakajana umwi mwaalumi uutegwa Eniyasi, ooyo wakali waba aaminyaka iili musanu ayitatu kalede abulo bwakwe, katabuki pe nkaambo wakayumide mubili. 34 Petro wakati kulinguwe: “Eniyasi, Jesu Kkristu wakuponia. Nyampuka, uyale bulo bwako.” Mpawo wakanyampuka mpawaawo. 35 Bantu boonse bakkala kuLida akuNtandabale yaSheroni, nibakamubona, bakasyoma Mwaami.
36 KuJopa, kwakali sikwiiya uutegwa Tabita. Zina lyakwe kuti lyasandululwa lyaamba kuti “Dokkasi.”* Mwanakazi ooyu wakali kuchita milimu mibotu alubo wakali kupa zipo zyalweetelelo nzyaakali kupanga. 37 Pesi mumazuba aayo, mwanakazi ooyu wakachiswa mpawo wakafwa. Nkinkaako bakamusanzya, bamulazika mung’anda yamujulu. 38 Mbukunga Lida yakali aafwiifwi akuJopa, basikwiiya nibakamvwa kuti Petro uli mumuunzi ooyo, bakatuma baalumi babili kuti bakamubuzye kuti: “Tukumbila kuti ufwambaane, uzookuno.” 39 Naakamvwa oobo, Petro wakanyampuka wayinkaabo. Naakasika, bakamutola mung’anda yamujulu, mpawo bamukabafu boonse bakasika kulinguwe kabalikulila akumutondeezya zigogo* zyiingi nzibakasuminwa aaDokkasi naakachili aambabo. 40 Petro naakabuzya bantu boonse kuti bazwe mung’anda, wakafugama, wakomba mpawo wakalanga chidumbu wati: “Tabita, buka.” Tabita wakalanga, mpawo naakabona Petro, wakabuka, wakkala. 41 Petro wakamutambikizya kuboko kwakwe wamubusya mpawo wakayita basalali abamukabafu mpawo wakabatondeezya kuti muumi. 42 Makani aaya akazibinkana muJopa yoonse alubo bantu biingi bakaba basyomi muMwaami. 43 Petro wakakkala muJopa kwamazuba miingi asikusuka zikumba uutegwa Simoni.