Kulonga
24 Leza wakati kuli Mozesi: “Tanta uze kuli Jehova, iwe a-Aroni aNadabbu a-Abbihu abaalu bama-Israyeli bali 70 mpawo mukotame kule-kule. 2 Mozesi alikke nguwe weelede kuswena kuli Jehova, pesi bamwi batasweni pe. Bamwi boonse tabeelede kutantaamwi pe anguwe.”
3 Mozesi wakasika wabuzya bantu majwi woonse aaJehova, anzila zyoonse zyakubeteka mpawo bantu bakasandula aajwi limwi kabati: “Zyoonse nzyaamba Jehova tulazichita.” 4 Mozesi wakaalemba aansi majwi woonse aaJehova mpawo wakafuma kuseeni wayaka chipayililo munsi aachilundu amapila aamabwe aali 12, kweendelana amisyobo iili 12 yama-Israyeli. 5 Naakamaninsya, wakatuma balombe bachi-Israyeli mpawo bakapa zipo zitentwa alubo bakapa bapule bang’ombe kuti babe chipayizyo chalumvwanano kuli Jehova. 6 Mozesi wakabweza hafu yaganzi walibikka mundido mpawo limwi wakalisansiila aachipayililo. 7 Mpawo wakabweza bbuku lyachizuminano walibalila bantu ajwi lili aajulu mpawo bantu bakati: “Zyoonse nzyaamba Jehova tulazichita alubo tulamuswiilila.” 8 Mozesi wakabweza ganzi walisansiila bantu mpawo wakati: “Eeli ndiganzi lyachizuminano nchaachita Jehova andinywe kweendelana amajwi woonse aaya.”
9 Mozesi a-Aroni aNadabbu a-Abbihu abaalu bama-Israyeli bali 70 bakatanta chilundu, 10 mpawo bakabona Leza wa-Israyeli. Aansi aamawulu aakwe, kwakali chintu chakali mbuli kazila kapangidwe aamabwe aasafire aayalene alubo chakali kumweka mbuli majulu. 11 Leza taakabanyonyoona pe baalu balemekwa ba-Israyeli, ibakabona chilengaano chaLeza wakasimpe alubo bakalya akunywa.
12 Mpawo Jehova wakati kuli Mozesi: “Kuza kulindime kuchilundu uzookkale ookuno. Ndilakupa mabwe aapapalete nginditalembe milawu amalayilile ngibeelede kuyiisigwa.” 13 Mozesi amubelesi wakwe Joshuwa bakanyampuka mpawo Mozesi wakatanta chilundu chaLeza wakasimpe. 14 Pesi baalu wakababuzya kuti: “Amutulinde mpawaawa kusikila tukaboole. Munooli aa-Aroni aHuri. Kufumbwa uuli aakaambo kayanda kubetekwa, ulakonzya kwiinka kulimbabo.” 15 Mozesi wakatanta chilundu chiindi joba nilyakachivumbide.
16 Bulemu bwaJehova bwakakkala aaChilundu chaSinayi alubo joba lyakachivumba kwamazuba aali musanu alimwi. Mpawo mubuzuba bwamusanu aabili, Leza wakayita Mozesi kuzwa mujoba. 17 Bulemu bwaJehova bwakali mbuli mulilo uuvwilima aajulu aachilundu kuma-Israyeli bakali kulanga. 18 Mozesi wakanjila mujoba, mpawo wakatanta chilundu. Wakakkala mumo kwamazuba aali 40 abusiku buli 40.