Johane Wachitatu

1 Ime ndimunene,* ndilikukulembela Gayo uuyandwa, ngundiyanda loko.

2 Nuuyandwa, ndikombela kuti wiinkilile kunembo kuzwidilila muzintu zyoonse akuti upone kabotu mbuli mbulikuchita lino. 3 Nkaambo ndakabotelwa loko, bakombima nibakasika akupa bukamboni atala akasimpe nkulaako, mbuli mbulikwiinkilila kunembo kweenda mukasimpe. 4 Taakwe chintu chindipa kukondwa* loko kwiinda eechi: kumvwa kuti bana bangu balikwiinkilila kunembo kweenda mukasimpe.

5 Nuuyandwa, utondeezya kuti ulasyomeka muzintu nzuchitila bakombima, nikuba kuti tubazi pe. 6 Bakapa bukamboni atala aluyando lwako kumbungano. Ndikumbila kuti chiindi nibeenda, ubasindikile munzila iibotezya Leza. 7 Nkaambo bakakambawuka akaambo kazina lyakwe, alubo taakwe chintu nchibakabweza kubantu bazisi. 8 Nkinkaako, tweelede kubatambula kabotu bantu bali boobu, kuchitila kuti tubelekaamwi ambabo mukasimpe.

9 Kuli zimwi zintu nzindakalembela mbungano, pesi Diyotrefe, ooyo uuyanda kuba wakusaanguna aakati kabo, taakwe chintu nchatambula aabulemu pe chizwa kulindiswe. 10 Nchicho chipa kuti ndazoosika, ndizooyubunune milimu njalikuchita yakumwaya majwi mabi atala andiswe.* Takkutisikani azeezi kupela, ulakaka kubatambula chabulemu bakombima alubo aabo bayanda kubatambula, uleezya kubakasya akubatandilaanze aambungano.

11 Nuuyandwa, utatobeli zintu zibi pe, pesi tobela zintu zibotu. Muntu uuchita zintu zibotu uzwa kuli Leza. Muntu uuchita zintu zibi, tanamubona pe Leza. 12 Dimetriyo balikumwaamba kabotu boonse alubo maponeno aakwe aleendelana akasimpe. Kwaamba choonzyo, andiswe tulikupa bukamboni atala anguwe, anduwe ulizi kuti bukamboni mbutupa iswe, mbwakasimpe.

13 Ndali aazintu zyiingi zyakukulembela, pesi tandiyandi pe kwiinkilila kunembo kukulembela kandibelesya peeni a-inki. 14 Nikuba oobo, ndilangilila kukubona lino-lino mpawo tuzoowambuule katubwenene.

Luumuno alube aanduwe.

Beenzuma balikukujuzya. Undijuzizye beenzuma amazinaabo.