Mikka
7 Baamayoo! Ndaba mbuli muntu uusika,
Michelo yachilimu kayili yabunganizigwa kale
Akuvululwida kuchitwa masaansa kali atebulwa kale,
Mpawo wajana kakutakwe chikama chamasaansa kuti alye,
Niziba nkuyu zyakusaanguna nzyalombozya.
2 Muntu uusyomeka waloba* aanyika,
Takuchikwe muntu uululeme pe aakati kabantu.
Boonse balikubwatilila bamwi kuti batile ganzi.
Umwi awumwi ulikuvwima muntunyina akansabwe.
3 Maboko aabo alaaluzibo lwakuchita zintu zibi,
Muzulwidi uyanda kupegwa chimwi chintu,
Mubetesi uyanda kubbadalwa,
Walupati-pati waamba nzyalombozya,
Alubo balikuzichitaamwi.
4 Muntu uulikabotu loko aakati kabo uli mbuli maamvwa,
Muntu uuchita ziluleme aakati kabo mubi loko kwiinda lubaya lwamaamvwa.
Buzuba bwabalindi bako abwakubetekwa kwako buzoosika.
Mpawo bazooyoowa.
5 Utasyomi mweenzinyokwe
Nikuba kusyoma mweenzinyokwe waamoyo.
Chenjelela nzwaamba kuli yooyo uuyaama aakaango kako.
6 Nkaambo mwana mulombe usampawula wisi,
Mwana musimbi ubukila banyina,
Amukamwana ubukila banyinazyala.
Basinkondonyina bamuntu mbantu bamung’anda yakwe.
7 Pesi ime ndinoolangilide kuli Jehova.
Ndinoolindila* Leza walufutuko lwangu.
Leza wangu uzoondimvwa.
8 Iwe sinkondoma, utabotelwi akaambo kangu.
Nikuba kuti ndawa, ndizoobuka,
Nikuba kuti ndikkede mumudima, Jehova uzooba mumuni wangu.
9 Ndizoolisimya kubukali bwaJehova
—Nkaambo ndakamubisizya—
Kusikila ayiminine kaambo kangu akundichitila bululami.
Uzoondigwisya akundeeta mumumuni,
Ndizoobona bululami bwakwe.
10 Sinkondoma uzoobona,
Alubo uzooba aabweeme ooyo wakati kulindime:
“Ulikuli Jehova Leza wako?”
Meso aako azoomubona.
Uzoolyatuukwa mbuli madaka aamumigwagwa.
11 Bunooli buzuba bwakuyaka miduli yako yamabwe,
Mubuzuba oobo mugaano uzooyungizigwa.*
12 Mubuzuba oobo bazoosika kulinduwe
Kabazwa ku-Asiriya akumyuunzi yaku-Ijipita,
Kuzwa ku-Ijipita kusika kuMulonga,*
Kuzwa kulwizi kusika kulwizi, kuzwa kuchilundu kusika kuchilundu.
13 Alubo nyika izooba tongo akaambo kabantu bakkala mulinjiyo,
Akaambo kazintu nzibakachita.*
14 Yembela bantu bako amufunko wako, nkukwaamba tanga lyambelele zyalukono lwako,
Eezyo zyakali kukkala aazilikke mulusaka—aakati kamuunda.
Azichelele kuBbashani akuGiliyadi mbuli mumazuba aachiindi.
15 “Ndizoomutondeezya zintu zigambya loko
Mbuli kumazuba nindakamugwisya munyika ya-Ijipita.
16 Zisi zizoobona mpawo zizoofwa bweeme nikuba kuti zili aamanguzu miingi.
Bazoobikka kuboko aamulomo,
Matwi aabo azoosinka.
17 Bazoomyankuta lusuko mbuli nzoka,
Bazoozwa mundawu zyabo zyakukwabilila kabayoowede mbuli zilenge zyaanyika ziyavula.
Bazooza kuli Jehova Leza wesu kabali kuzazama,
Alubo bazookuyoowa.”
18 Ngwani Leza uuli mbuli nduwe,
Uulekelela chibi alubo uulekelela milandu yabaabo basyeede balukono lwakwe?
Takookkala kanyemede kukabe kutamani,
Nkaambo ulaluyanda luyando lutamani.
19 Uzootufwida lubo luzyalo, uzoozunda* milandu yesu.
Uzoowaalila zibi zyabo zyoonse kunsi aalwizi.
20 Uzootondeezya kuti ulasyomeka kuli Jakkobo,
Akumutondeezya luyando lutamani Abbrahamu,
Mbuli mbuwakakonka kumasianene kuzwa kumazuba aachiindi.