Habbakkukki
2 Ndinooyimvwi aandawu yangu yakulindila,
Ndinooyimvwi aandawu yakukwabilila.
Ndinoolindide kuti ndimvwe nzyataambe kwiinda mulindime
Ambunditasandule nindalulamikwa.
2 Mpawo Jehova wakandisandula kati:
“Chilembaansi chilengaano eechi, uchilembe kabotu aamabwe aapapalete,
Kuchitila kuti muntu uutachibalile aajulu atakataazikani pe.
3 Nkaambo chilengaano eechi chilindila chiindi chacho chibikkidwe,
Alubo chili kuchijaanina kumamanino aacho* alubo tachizoobeji pe.
Nikuba kuti chanonoka,* kkala kuchilangilila!*
Nkaambo ziyume zitete, chizoochitika kupela.
Tachizoononoki pe!
4 Langa muntu uulisumpula;
Taluleme pe mumoyo wakwe
Pesi mululami uzoopona akaambo kakusyomeka kwakwe.*
5 Kwaamba choonzyo, akaambo kakuti wayini ileena,
Muntu uulisumpula takaazuzikizyi pe makanze aakwe.
Ulaachiyandisyo chakulya chipati mbuli Kabanda;*
Uli mbuli lufu alubo takkutisikani pe.
Uliswini kubunganizya zisi zyoonse
Akuliyobolweda bantu boonse.
6 Boonse aaba tabazoowambi kasimpi na, chikozyano, akalabiko kulinguwe?
Bazoowamba kuti:
‘Uli aapenzi muntu uubunganizya zintu zitali zyakwe
—Eezi zinoochitika kwachiindi chilamfu biyeni?—
Ayooyo uulikomezezya chikwelete!
7 Basikukukweleta tabazoobuki chakufwambaana na?
Bazoobuka akukunyung’a-nyung’a chalunya,
Uzooba chintu nchibabweza changuzu.
8 Akaambo kakuti wanyanga zisi zyiingi,
Bamwi boonse basyeede bazookunyanga,
Bazookunyanga akaambo kakutila ganzi lyabantu,
Abukali mbwaakayeta aanyika,
Kumyuunzi akubantu bakkala mulinjiyo.
9 Uli aapenzi muntu uujanina bamung’anda yakwe zintu munzila mbi,
Kuchitila kuti ayake chitendele chakwe mujulu,
Kuti achije mapenzi!
10 Walyeetela mapenzi mung’anda yako.
Kwiinda mukunyonyoona bantu biingi, walibisizya.
11 Nkaambo bbwe lizookwiila kalili aamuduli,
Alubo pulanga lizoolisandula kalili aakaluli.
12 Uli aapenzi ooyo uuyaka muunzi kwiinda mukutila ganzi,
Ayooyo wiimikizya muunzi kwiinda mukutalulama!
13 Bona! TeeJehova wamakamu na uutazoope kuti bantu babeleke changuzu kusosela mulilo,
Akupa kuti zisi zilimizye kubelekela zitawo pe?
14 Nkaambo nyika izoozula luzibo lwabulemu bwaJehova
Mbuli maanzi mbaazuzya lwizi.
15 Uli aapenzi muntu uupa beenzinyina chakunywa,
Kaliikuyungizya bukali akunyema kuti bakolwe,
Kuchitila kuti abone chinkuna chabo!
16 Uzookkuta masampu kwiinda kuti ujane bulemu.
Anduwe—nywa uyubunune kutapalulwa kwako.*
Nkomeki iili mujaanza lyaJehova lyachilisyo izookusikila anduwe,
Alubo masampu azoovumba bulemu bwako;
17 Kulwana kwakachitika kuLebbanoni kuzookuvumba,
Alunyonyooko lwakayoosya banyama bamusokwe luzookusikila,
Akaambo kakuti wakatila ganzi lyabantu
Akujaya bantu aanyika,
Mumyuunzi akuli baabo bakkala mulinjiyo.
18 Chifanikisyo chibezedwe chigwasyaanzi
Kakuli chakapangwa aamuntu?
Chibumbwa chansimbi* amuyiisi wakubeja zigwasyaanzi,
Nikuba kuti sikuchipanga ulachisyoma,
Kapanga baleza babuyo bataambuuli?
19 Uli aapenzi muntu uubuzya chisamu kuti: “Buka!”
Naakuti uubuzya bbwe litaambuuli kuti: “Buka! Tuyiisye!”
Amubone! Chizilulwidwe aangolida ansiliva,
Alubo tachikwe moya wakuyoya pe mulinchicho.
20 Pesi Jehova uli mutempele lyakwe lisalala.
Wumuna kunembo lyakwe, O nyika yoonse!’”