Kulonga
20 Mpawo Leza wakaamba majwi aaya woonse. Wakati:
2 “Ndime Jehova Leza wako, ooyo wakakugwisya munyika ya-Ijipita, mung’anda yabuzike. 3 Utabi aabamwi baleza kunze kwangu.
4 “Utalipangili chikozyano chibezedwe naakuti chifanikisyo chachimwi chintu chili kujulu naakuti aanyika naakuti mumaanzi kunsi aanyika. 5 Utazikotamini pe naakuti koongelezegwa kuti uzibelekele, nkaambo ime ndiJehova Leza wako, ndime Leza uuyanda kukombwa biyo alikke, uusubula bana akaambo kamulandu wamawisi kusikila kuzyalani lyachitatu azyalani lyachine lyabaabo bandizonda, 6 pesi uutondeezya luyando lutamani kuzyuulu zyamazyalani aabaabo bandiyanda ababamba milawu yangu.
7 “Utabelesyi zina lyaJehova Leza wako munzila iiteelede, nkaambo Jehova takaleki pe kumusubula ooyo uubelesya zina lyakwe munzila iiteelede.
8 “Yeeya buzuba bwaSabata, bukkale kabusalala. 9 Weelede kubeleka akuchita milimu yako yoonse mumazuba aali musanu alimwi, 10 pesi buzuba bwamusanu aabili, ndisabata lyaJehova Leza wako. Taakwe mulimu ngweelede kuchita pe, iwe naaba mwanaako mulombe naaba mwanaako musimbi naaba muzike wako wachaalumi naaba muzike wako wachanakazi nichiba chivuubwa chako naaba mweenzu wako uukkede aanduwe.* 11 Nkaambo mumazuba aali musanu alimwi, Jehova wakalenga julu, nyika, lwizi azintu zyoonse zili mulinzizyo alubo wakasaanguna kupumuna mubuzuba bwamusanu aabili. Jehova nchaakabulongezya buzuba bwaSabata akubusalazya.
12 “Lemeka wuso abanyoko, kuchitila kuti upone mazuba miingi munyika Jehova Leza wako njalikukupa.
13 “Utajayi.
14 “Utachiti bumambi.
15 “Utabbi.
16 “Utapi bukamboni bwakubeja atala amweenzinyokwe.
17 “Uteemuzyi ng’anda yamweenzinyokwe naaba mwanakazi wakwe naaba muzike wakwe wachaalumi naaba muzike wakwe wachanakazi niiba ng’ombe yakwe niliba donki lyakwe nichiba chintu chakwe.”
18 Bantu boonse bakali kumvwa kudilima akulila kwamweembo alubo bakali kubona tulabi achilundu kachili kuunta busi. Nibakabona akumvwa zintu eezi, bakazazama baakwiimikila kule-kule. 19 Nkinkaako, bakati kuli Mozesi: “Ambuula aandiswe, tulakuswiilila, pesi Leza ataambuuli aandiswe, nkaambo tuyoowa kufwa.” 20 Nkinkaako, Mozesi wakati kubantu: “Mutayoowi pe, nkaambo Leza wakasimpe wasika kuti azoomusunke, kuti mukkale kamumuyoowa kuchitila kuti mutabisyi.” 21 Nkinkaako, bantu bakaliimvwi kule-kule, pesi Mozesi wakaswena aafwiifwi ajoba lisiya, oomo mwaakabede Leza wakasimpe.
22 Mpawo Jehova wakati kuli Mozesi: “Nzezi nzweelede kubuzya ma-Israyeli, ‘Mwalibonena amulikke kuti ndaambuula aandinywe kuzwa kujulu. 23 Mutapangi baleza bansiliva kuti mubakombe mbuli mbumundikomba alubo mutalipangili baleza bangolida. 24 Mweelede kundiyakila chipayililo chabulongo, mupayizye aalinchicho zipo zyanu zitentwa, zipayizyo zyanu zyalumvwanano,* mbelele zyanu ang’ombe zyanu. Kufumbwa nkundiyoopa kuti zina lyangu likayeeyegwe, ndiyoosika kulindinywe akumulongezya. 25 Mutabelesyi mabwe aabezedwe* nimundiyakila chipayililo chamabwe. Nkaambo kuti mwabelesya chizela aalinchicho, mulachisofwaazya. 26 Mutabelesyi matantilo nimuya kuchipayililo changu, kuchitila kuti mutabonenwi pe.’”*