Detoronomi
14 “Muli bana baJehova Leza wanu, mutalinenguuli pe nikuba kuligela masusu aankumu nimulila muntu uufwide. 2 Nkaambo muli bantu basalala kuli Jehova Leza wanu alubo Jehova wakamusala kuti mube bantu bakwe, bantu bakwe mbayandisya aakati kabantu boonse bakkala aanyika.
3 “Tamweelede kulya chintu chisesemya. 4 Aaba mbiibanyama mbimukonzya kulya: ng’ombe, mbelele, mpongo, 5 nsya, mondwe, lweengu,* mpongo yamusokwe, muzilawa, mbelele yamusokwe, ambelele yamuzilundu. 6 Mulakonzya kulya kufumbwa munyama uuli aansumba zyaanzeene uuselula. 7 Nikuba oobo, tamweelede kulya banyama aaba batobela baselula naakuti bali aansumba nzyaanzeene: nkamela, sulwe achibila nkaambo balaselula, pesi tabakwe nsumba zyaanzeene pe. Balisofweede kulindinywe. 8 Tamweelede kulya ngulube nkaambo ili aansumba zyaanzeene pesi tayiseluli pe. Ilisofweede kulindinywe. Banyama aaba tamweelede kubalya pe naakuti kubaguma kabafwide.
9 “Aakati kazintu zyoonse zikkala mumaanzi, nzezi nzimukonzya kulya: Chintu choonse chili aatuyambyo amakwa mulakonzya kuchilya. 10 Pesi tamweelede kulya kufumbwa chintu chitakwe tuyambyo amakwa. Chilisofweede kulindinywe.
11 “Mulakonzya kulya kufumbwa muyuni uusalala. 12 Pesi aaba tamweelede kubalya pe: gumbe, chuungwe, kkubi lisiya, 13 nsika iisalala,* nsika iisiya,* baluunga bamisyobo yoonse, 14 bachikwangala bamisyobo yoonse, 15 mpoo, polo, muyuni uuli mbuli dada, misyobo yoonse yamagumbe, 16 polo muniini, polo uuli aamatwi malamfu, dada lili aansingo ndamfu, 17 sifundwe, kkubi, syaakabbilila, 18 syulamoobe, misyobo yoonse yankolekole, ng’anga yabayuni, akampembezya.* 19 Zilenge* zyoonse zili aamababa zyeenda kazili zyiingi anzizyo zilisofweede kulindinywe, tazyeelede kuligwa pe. 20 Zilenge zyoonse zyuuluka zisalala mulakonzya kuzilya.
21 “Tamweelede kulya munyama wakalifwida. Mulakonzya kuupa mweenzu uukkede mumyuunzi yanu,* ulakonzya kuulya naakuti kuuzizya mweenzu. Nkaambo inywe muli bantu basalala kuli Jehova Leza wanu.
“Utajiki mwana wampongo mumalili aabanyina.
22 “Munyaka amunyaka, tamweelede kuleka pe kupa chakkumi chazintu zyoonse nzimulima mumyuunda yanu. 23 Muzoolya chipanzi chakkumi chazilyo zyanu, chawayini yanu mpya, chamafuta aanu abana bakusaanguna bang’ombe zyanu abambelele ampongo zyanu kunembo lyaJehova Leza wanu, kundawu njatazoosale kubikka zina lyakwe, kuchitila kuti mwiiye kuyoowa Jehova Leza wanu chiindi choonse.
24 “Pesi kuti ndawu njaasala Jehova Leza wako kuti zina lyakwe likkale nkuko kayili kule alubo kutakonzyi pe kutola chakkumi akaambo kakuti nkule ankukkala (nkaambo Jehova Leza wako uzookulongezya) 25 nkukwaamba kuti, ulakonzya kuchuuzya aamali mpawo wiinke aamali eeyo kundawu njatazoosale Jehova Leza wanu. 26 Mpawo ulakonzya kubelesya mali eeyo kuula kufumbwa nchuyanda, ibe ng’ombe, mbelele, mpongo, wayini azimwi zyakunywa zikola, kufumbwa nchuyanda; ukazilide nkukooko kunembo lyaJehova Leza wako alubo ubotelwe, iwe abamung’anda yako. 27 Alubo utamulubi pe muLevi uukkede mumyuunzi yako, nkaambo tapedwe chaabilo naakuti lukono aamwi anduwe.
28 “Kumamanino aaminyaka iitatu, mweelede kugwisya chipanzi choonse chakkumi chazintu zyanu nzimwakajana mumunyaka ooyo, mpawo mukazibikke mumyuunzi yanu. 29 Mpawo muLevi ooyo uutapedwe chaabilo naakuti lukono aamwi anduwe, mweenzu, muchaala amukamufu ibali mumyuunzi yako bazoosika bazoolye bakkute, kuchitila kuti Jehova Leza wako akulongezye* muzintu zyoonse nzuchita.