Milimu yaBaapostoli
26 Mpawo Agripa wakabuzya Pawulu kuti: “Wazumizigwa lino kulisandwida.” Pawulu wakatandabika kuboko kwakwe, mpawo wakalisandwida kati:
2 “O Mwaami Agripa, ndilabotelwa kulisandwida kunembo lyako sunu, atala azintu zyoonse maJuda nzibalikunditamikizya, 3 mbukunga uzizi kabotu ziyanza zyoonse akukazyania kwamaJuda. Nkinkaako, ndikumbila kuti ube aamoyo mulamfu, undiswiilile.
4 “Kwaamba choonzyo, buumi mbundakali kupona kuzwa kandichili muniini aakati kabantu bakulindiswe amuJerusalema, bulizibinkene kumaJuda boonse 5 bakandizi. Kuti kabayanda, balakonzya kupa bukamboni bwakuti ndakali muFarisi alubo ndakali kwiitobela buzwide njiisyo yabukombi bwesu. 6 Pesi ndiimvwi aano kuti ndibetekwe akaambo kabulangilizi bwachisyomezyo Leza nchaakaamba kumasianene. 7 Chisyomezyo eechi, nchicho ambabo bamisyobo yesu iili 12 nchibalikulangilila kuti chizoozuzikizigwa, kwiinda mukubelekela Leza mulimu uusalala amoyo woonse sikati amansiku. MaJuda balikundipa mulandu akaambo kabulangilizi oobu, O Mwaami.
8 “Nkamboonzi nimutasyomi kuti Leza uzoobusya bantu bafwide? 9 Ime lwangu, ndakali kuyeeya kuti ndakeelede kuchita zintu zyiingi kuti ndikazye zina lyaJesu wakuNazareta. 10 Eezi nzizyo loko nzindakachita muJerusalema. Basalali biingi ndakali kubajalila mumajele, nkaambo ndakali ndapegwa manguzu abapati babapayizi. Alubo nibakeelede kujayigwa, ndakali kuzuminanaazyo. 11 Chiindi chiingi, ndakali kuboombya muzikombelo zyoonse, kandibasungilizya kuti basiye lusyomo lwabo. Mbukunga ndakalibanyemenede, ndakayinka, kusikila ndaakusika kuli imwi myuunzi kuti ndikabapenzye.
12 “Nindakali kuchita zintu eezi kandiya kuDamasikko, kandipedwe manguzu alubo kanditumidwe aabapati babapayizi, 13 munzila zuba kalili aakalangabweeseme, O Mwaami, ndakabona mumuni mupati wiinda wazuba kuzwa kujulu, wakandimwekela abaabo mbindakali kweendaabo. 14 Nitwakawidaansi toonse, ndakamvwa jwi lyakati kulindime muchiHebberu: ‘Sawulu, Sawulu, undipenzezyaanzi? Kubbompa zibinzyo* nkulikuchita kulapa kuti ulichise.’ 15 Pesi ndakati: ‘Nduweni Mwaami?’ Mpawo Mwaami wakati: ‘Ndime Jesu ngulikupenzya. 16 Buka wiimikile. Ndalibonia kulinduwe kuchitila kuti ndikusale kuti ube mubelesi wangu akuti ube kamboni wazintu nzwaabona anzinditakutondeezye atala andime. 17 Alubo ndizookuvuna kubantu aaba akuzisi ooko nkundilikukutuma, 18 kuti ukabajule meso, ukabagwisye mumudima ubeete mumumuni, akuti ukabaangunune kumanguzu aaSaatani mpawo ubeete kuli Leza, kuchitila kuti balekelelwe zibi zyabo akuti bajane lukono aakati kabaabo bakasalazigwa, kwiinda mukuba aalusyomo mulindime.’
19 “Lino O Mwaami Agripa, teendakayanda pe kukazyania aachilengaano chakujulu. 20 Ndakasaanguna kwiinka kuDamasikko, ndazooya kuJerusalema, ndazoonjila muJudiya yoonse mpawo ndakazooya kubantu bazisi, kandilikutola mulumbe wakuti bantu beelede kusanduka akuti baboole kuli Leza kwiinda mukuchita milimu iitondeezya kuti basanduka. 21 Eezi nzizyo zyakapa kuti maJuda bandijate mutempele akuyanda kundijaya. 22 Pesi akaambo kakuti ndakagwasigwa aaLeza, ndilikwiinkilila kunembo kupa bukamboni kubapati abaniini kusikila sunu. Taakwe chintu nchindaamba kunze kwazintu zyakaambwa aaBapolofita aMozesi kuti zizoochitika, 23 kuti Kkristu wakali kuzoopenzegwa akuti, mbukunga nguwe wakali kuzoosaanguna kubusigwa kuzwa kubafu, wakali kuzoowambilizya mumuni kubantu aaba akuzisi.”
24 Pawulu naakachili kwaambuula zintu eezi kalikulisandwida, Festo wakoompolola kati: “Pawulu wapenga! Lwiiyo lwakupenzya!” 25 Pesi Pawulu wakati: “Nuulemekwa Festo, tandipengede pe. Ndilikwaamba majwi aakasimpe, kandili aamizeezo iilikabotu. 26 Kwaamba choonzyo, Mwaami ngundilikwaambuulaawe kandaangunukide, uzizi kabotu loko zintu eezi. Ndili aachoonzyo chakuti taakwe nchatazi pe kumakani aaya nkaambo taakwe chintu chakachitwa chakusisikizya. 27 Mwaami Agripa, ulabasyoma na Bapolofita? Ndilizi kuti ulabasyoma.” 28 Pesi Agripa wakati kuli Pawulu: “Muchiindi chifwiifwi biyo, ulapa kuti ndibe muKkristu.” 29 Mpawo Pawulu wakati: “Chiyandisyo changu kuli Leza nchakuti, iwe abantu balikundiswiilila sunu, mube mbuli ndime pesi kamutakwe zyaanzyo eezi pe, kufumbwa kuti zilatola chiindi chifwiifwi naakuti chilamfu.”
30 Mpawo Mwaami wakanyampuka, kuswaanizya amweendelezi aBbenisi abaalumi mbibakakkedaabo. 31 Pesi nibakali kuzwa, bakasaanguna kubuzyania kuti: “Mwaalumi ooyu taakwe nchaakachita pe chipa kuti ayelele kujayigwa naakuti kusungwa.” 32 Mpawo Agripa wakabuzya Festo kuti: “Kaansinga mwaalumi ooyu taakatola kaambo kakwe kuli Kkesari, nikuli waangununwa.”