Detoronomi
24 “Kuti mwaalumi wakwata mwanakazi mpawo taamukonda akaambo kakuti wajana chimwi chintu chitali kabotu aalinguwe, weelede kumulembela lugwalo lwakumuleka amupe mpawo amutande azwe aang’anda yakwe. 2 Kuti wazwa aang’anda yakwe, ulakonzya kwiinka akakwatwe awumwi mwaalumi. 3 Kuti mwaalumi wachibili uumukwete wamuzonda* mpawo wamulembela lugwalo lwakumuleka wamupa mpawo wamutanda kuti azwe aang’anda naakuti kuti mwaalumi ooyo wachibili uumukwete wafwa, 4 mulumaakwe wakusaanguna wakamutanda tazumizigwi pe kuti amukwate lubo nkaambo wakasofwaazigwa. Kuchita oobo kulasesemya kuli Jehova. Muteeti chibi pe munyika Jehova Leza wanu njalikumupa kuti ibe lukono lwanu.
5 “Mwaalumi wakakwata lino-lino tayelede kubeleka mulimu wabusooja pe nikuba kupegwa imwi milimu. Tayelede kubeleka milimu eeyi kwamunyaka uumwi. Weelede kukkala aang’anda kuchitila kuti abotezye mwanakazi wakwe.
6 “Utabwezi ziyo naakuti mwanaankando zyamweenzinyokwe kuti zibe chijatisyo akaambo kachikwelete. Nkaambo unooli wabweza chintu nchaponaacho mweenzinyokwe.
7 “Kuti kwajanika kuti kuli muntu wakabba mu-Israyelinyina mpawo kwazibinkana kuti wakali kumujata munzila iitali kabotu akuti wakamuuzya, sikumubba ooyo weelede kujayigwa. Mweelede kugwisya chintu chibi aakati kanu.
8 “Kuti kwabbuka bulwazi bwachipele,* amutobelezye malayilile woonse bapayizi maLevi ngibatamubuzye. Amuchite mbuli mbundakabalayilila. 9 Amuyeeye nzyaakachita Jehova Leza wanu kuli Miriyemu nimwakali munzila kamuzwa ku-Ijipita.
10 “Kuti wakweletesya simayakilane wako chimwi chintu, utanjili mung’anda yakwe kuti ukabweze chintu nchaakubuzya kuti ulakupa kuti chibe chijatisyo chachikwelete. 11 Weelede kwiimikila aanze, mpawo muntu ngwaakakweleta akweetele chijatisyo eecho aanze. 12 Kuti muntu ooyo katakwe nchalaacho, toyelede koona kuli aachintu nchaakupa kuti chibe chijatisyo. 13 Weelede kubweedezya chintu nchaakakupa kachili chijatisyo nilyabbila biyo zuba, mpawo muntu ooyo uloona achigogo chakwe akukulongezya; uzoobonwa kuti uliluleme kunembo lyakwe Jehova Leza wako.
14 “Utasosi mubelesi uutakwe nchalaacho alubo uufwaba, kazitakwe ndaba kuti ngubbululu wako naakuti mweenzu munyika yako, mumyuunzi yako. 15 Weelede kumubbadala mubuzuba mbuboobo izuba kalitanabbila pe, nkaambo taakwe nchalaacho pe alubo uponena aambadalo njweelede kumupa. Kuti teewachita oobo, ulakwiilila Jehova akaambo kanduwe mpawo ulaba aamulandu.
16 “Mataata tabeelede kujayigwa akaambo kazintu zichitwa aabana babo, abana tabeelede kujayigwa akaambo kazintu zichitwa aamawisi. Muntu weelede kujayigwa akaambo kachibi chakwe.
17 “Utabeteki mweenzu naakuti muchaala munzila iitaluleme alubo mukamufu utamunyangi chigogo nchaakakupa kuti chibe chijatisyo chachikwelete. 18 Yeeya kuti wakali muzike mu-Ijipita akuti Jehova Leza wako wakakunununa kuzwa nkukooko. Nchindili kukulayilila kuti uchite zintu eezi.
19 “Nutebula zilyo mumuunda wako mpawo waluba musunta wazilyo mumuunda, utawubweedeli pe kuti ukawubweze, weelede kuusiila mweenzu, muchaala amukamufu, kuchitila kuti Jehova Leza wako akulongezye muzintu zyoonse nzuchita.
20 “Nuwoonza ma-olifa, utayindululi pe koonza mitabi yamusiko ooyo. Aasyaala ayelede kuba aamweenzu, muchaala amukamufu.
21 “Nuchela masaansa mumuunda wako wamisaansa, utabweedi kuyoochela aasyaala. Aasyaala ayelede kusiilwa mweenzu, muchaala amukamufu. 22 Yeeya kuti wakali muzike munyika ya-Ijipita. Nchindili kukulayilila kuti uchite zintu eezi.