Amosi
3 “Amumvwe jwi eeli Jehova ndyaamba atala andinywe, inywe nibantu bamu-Israyeli, atala ampuli yoonse njindakagwisya munyika ya-Ijipita:
2 ‘Aakati kampuli zyoonse zili aanyika, ndinywe amulikke mbindakaziba.
Nzizyo zitazoope kuti ndizoomubeteke akaambo kamilandu yanu yoonse.
3 Bantu babili nga baleendaamwi na kuti teebazuminana?
4 Mulavu nga ulavuluma na mulusaka kuti kakutakwe munyama ngwaajata?
Mulavu uuchili muniini,* nga ulang’ong’a* na kundawu nkwakkala kuti kakutakwe chintu nchaajata?
5 Kayuni nga kalachegwa aakakole na kuti kakutakwe wateya?
Kakole nga kalalesuka na kuti kakutakwe nchikacha?*
6 Kuti mweembo walizigwa mumuunzi, bantu tabazazami na?
Kuti mumuunzi mwachitika penzi, nga teeJehova na walyeeta?
7 Nkaambo Mwaami Singuzuzyoonse Jehova tachiti chintu nichiba chimwi
Kunze kwakuti wasaanguna kuyubununa makani aakwe aansiswa kubabelesi bakwe bapolofita.
8 Mulavu wavuluma! Ngwani uutaleke kuyoowa?
Mwaami Singuzuzyoonse Jehova waamba! Ngwani uutaleke kupolofita?’
9 ‘Amwaambilizye kungazi zyakukwabilila zyaku-Ashidodi
Akungazi zyakukwabilila zili munyika ya-Ijipita.
Amwaambe kuti: “Amubungane kuzilundu zyaSamariya,
Mubone lupyopyongano luli mumo
Alweeno luli mumo.
10 Nkaambo tabazi pe mbubeelede kuchita chintu chiluleme,” mbaamba Jehova,
“Aabo balikuyobola lupyopyongano alunyonyooko mungazi zyabo zyakukwabilila.”’
11 Nkinkaako, nzezi nzyaamba Mwaami Singuzuzyoonse Jehova,
‘Sinkondonyokwe uzoozyunguluka nyika,
Uzookumana manguzu,
Alubo zintu zili mungazi zyako zyakukwabilila zizoonyangwa.’
12 Nzezi nzyaamba Jehova,
‘Mbuli mweembeli mbakwesemuna myeendo iibili naakuti kapanzi kakutwi munkanwa lyamulavu,
Mbumbubo bantu bamu-Israyeli mbubatazookwesemunwe,
Aabo lino bakkede muSamariya aamalo mabotu alubo bakkede aazyuuno zibotu.’*
13 ‘Amuswiilizye alubo muchenjezye ng’anda* yaJakkobo,’ mbaamba Mwaami Singuzuzyoonse Jehova, Leza wamakamu.
14 ‘Nkaambo mubuzuba mbunditazoobeteke Israyeli akaambo kamilandu yakwe yoonse,*
Mpimpawo mpunditazoozibeteke zipayililo zyoonse zyakuBbeteli,
Meja aazipayililo azoogonkwa awide aansi.
15 Ndizoodilisya ng’anda yampeyo ang’anda yamayinza.’
‘Maanda aakabotesegwa aameja aanzovu azoonyonyoonwa,
Amaanda mapati* azooloba,’ mbaamba Jehova.”