Amosi
7 Nzezi Mwaami Singuzuzyoonse Jehova nzyaakanditondeezya: Bona! Wakeeta tanga lyansozi chiindi zilyo zyakumamanino* nizyakasaanguna kukomena. Eezi zyakali zilyo zyakumamanino zyakabyalwa, masokwe aamwaami kaali anengwa kale. 2 Nsozi eezi nizyakamaninsya kulya zimena aanyika, ndakati: “Ikaka Mwaami Singuzuzyoonse Jehova, balekelele! Jakkobo nga ulafutuka* biyeni? Nkaambo takwe manguzu pe!”
3 Nkinkaako, Jehova wakachincha mizeezo* atala azeezi. Jehova wakati, “Tazikoochitika pe.”
4 Nzezi Mwaami Singuzuzyoonse Jehova nzyaakanditondeezya: Bona! Mwaami Singuzuzyoonse Jehova wakaamba kuti nyika ipegwe chisubulo kakubelesegwa mulilo. Mulilo ooyo wakayuminizya maanzi miingi alubo wakanyonyoona chipanzi chanyika. 5 Mpawo ndakati: “Ikaka Mwaami Singuzuzyoonse Jehova, utapi kuti eezi zichitike. Jakkobo nga ulafutuka* biyeni? Nkaambo takwe manguzu pe!”
6 Nkinkaako, Jehova wakachincha mizeezo* atala azeezi. Mwaami Singuzuzyoonse Jehova wakati, “Azeezi tazikoochitika pe.”
7 Nzezi nzyaakanditondeezya: Bona! Jehova wakayimvwi aamuduli wakayakwa kakubelesegwa ntambo yakweelanisya alubo wakali aantambo yakweelanisya mukuboko kwakwe. 8 Mpawo Jehova wakati kulindime: “Ulikubonaanzi Amosi?” Mpawo ndakati: “Ntambo yakweelanisya.” Mpawo Jehova wakati: “Bona, ndilikubikka ntambo yakweelanisya aakati kabantu bangu ma-Israyeli. Tandichizoobalekeleli lubo pe. 9 Ndawu zili aajulu zya-Izakka zizooba matongo, andawu zisalala zya-Israyeli zizoonyonyoonwa mpawo ndizoolwana ng’anda yaJerobbowamu apanga.”
10 Amaziya mupayizi wakuBbeteli wakatumina Mwaami Jerobbowamu wa-Israyeli mulumbe ooyu: “Amosi ulikukubukila aakati kang’anda ya-Israyeli. Bantu bamunyika tabachaayandi biya pe majwi aakwe woonse. 11 Nkaambo nzezi nzyaamba Amosi, ‘Jerobbowamu uzoojayigwa aapanga, alubo kwaamba choonzyo, Israyeli uzootolwa mubuzike kazwa munyika yakwe.’”
12 Mpawo Amaziya wakati kuli Amosi: “Iwe sikubona zilengaano, zwa, uchijile kunyika yaJuda ukaakujane* chinkwa chako nkukooko alubo ukaakupolofite nkukooko. 13 Pesi tucheelede kupolofita muBbeteli pe, nkaambo nindawu iisalala yamwaami alubo ning’anda yabwaami.”
14 Mpawo Amosi wakasandula Amaziya kuti: “Teendakali mupolofita pe nikuba kuba mwana wamupolofita, pesi ndakali mweembeli alubo ndakali kubelekela mumyuunda yamikuyu.* 15 Pesi Jehova wakandigwisya kumulimu wakweembela butanga mpawo Jehova wakati kulindime: ‘Yinka ukaakupolofite kubantu bangu ma-Israyeli.’ 16 Nkinkaako, lino swiilila jwi lyaJehova: ‘Ulikwaamba kuti, “Utapolofiti zintu zibi atala a-Israyeli alubo utakambawuki makani mabi atala ang’anda ya-Izakka.” 17 Nkinkaako, nzezi nzyaamba Jehova: “Mwanakazi wako uzooba wuule mumuunzi alubo bana bako balombe abasimbi bazoojayigwa aapanga. Nyika yako izoowabanisigwa aantambo yakupimya. Alubo iwe lwako uzoofwida munyika iitasalali. Kwaamba choonzyo, Israyeli uzootolwa mubuzike kazwa munyika yakwe.”’”