Amosi
1 Aaya ngiimajwi aa-Amosi,* ooyo wakali aakati kabasikuvuba mbelele bakuTekkowa, ngaakatambula muchilengaano atala a-Israyeli mumazuba aaMwaami Uziya waJuda amumazuba aaJerobbowamu, mwana waJowashi, mwaami wa-Israyeli, kakuchili minyaka iibili kuti muzuzumo wanyika uchitike. 2 Wakati:
“Jehova uzoovuluma kali muZiyoni,
Alubo uzoowompolola kali muJerusalema.
Machezezyo aabeembeli azoolila,
Alubo aajulu aachilundu chaKkameli azooyuma.”
3 “Nzezi nzyaamba Jehova,
‘“Akaambo kamilandu iitatu yaDamasikko,* kwaamba choonzyo, milandu iine, tandizooleki pe kubasubula,
Nkaambo bakaziya Giliyadi azileyi zyansimbi zyakupola zilyo.
4 Nkinkaako, ndizootuma mulilo kung’anda yaHazayeli,
Uzoonyonyoona ngazi zyakukwabilila zyaBbeni-hadadi.
5 Ndizootyola minkulwa* yaDamasikko,
Ndizoonyonyoona bantu bakkala muBbikkati-aveni
Ayooyo weendelezya* muBbeti-edeni,
Alubo bantu bakuSiriya bazooyinka kuKkiri kabali bazike,” mbaamba Jehova.’
6 Nzezi nzyaamba Jehova,
‘“Akaambo kamilandu iitatu yaGaza, kwaamba choonzyo, milandu iine, tandizooleki pe kubasubula,
Nkaambo bakabweza kabunga koonse kabazike, bakabikka mumaboko aabantu baku-Edomu.
7 Nkinkaako, ndizootuma mulilo kumuduli waGaza,
Uzoonyonyoona ngazi zyakwe zyakukwabilila.
8 Ndizoonyonyoona bantu bakkala mu-Ashidodi,
Ayooyo weendelezya* mu-Ashikkeloni.
Kuboko kwangu kuzoolwana Ekkironi,
AmaFilisiti aatasyaale azoonyonyoonwa,” mbaamba Mwaami Singuzuzyoonse Jehova.’
9 Nzezi nzyaamba Jehova,
‘Akaambo kamilandu iitatu yaTire, kwaamba choonzyo, milandu iine, tandizooleki pe kubasubula,
Nkaambo kabunga koonse kabazike bakakapa Edomu,
Alubo teebakachiyeeya pe chizuminano nchibakachita ababbululu babo.
10 Nkinkaako, ndizootuma mulilo kumuduli waTire,
Uzoonyonyoona ngazi zyakwe zyakukwabilila.’
11 Nzezi nzyaamba Jehova,
‘Akaambo kamilandu iitatu ya-Edomu, kwaamba choonzyo, milandu iine, tandizooleki pe kumusubula,
Nkaambo wakaandilila mwanikaakwe apanga
Alubo wakakaka kumufwida luzyalo,
Uliswini kumuzavuula kanyemede
Alubo ulikwiinkilila kunembo kamunyemenede.
12 Nkinkaako, ndizootuma mulilo muTemani,
Uzoonyonyoona ngazi zyakukwabilila zyakuBbozira.’
13 Nzezi nzyaamba Jehova,
‘Akaambo kamilandu iitatu yama-Amoni, kwaamba choonzyo, milandu iine, tandizooleki pe kubasubula,
Nkaambo bakayawula banakazi bakali aamala bakuGiliyadi kuti bakomezye chilawu chabo.
14 Nkinkaako, ndizootenta muduli waRabba amulilo,
Uzoonyonyoona ngazi zyakwe zyakukwabilila,
Kunooli musindo wankondo mubuzuba bwankondo,
Aguwo pati mubuzuba nikuli luuwo.
15 Mpawo mwaami wabo uzooyinka aabalupati-pati bakwe kubuzike,” mbaamba Jehova.’