Lwabili kuBatesalonikka
2 Nikuba oobo bakombima, kumakani aali atala akubawo kwaMwaami wesu Jesu Kkristu akubunganizigwa kwesu kulinguwe, tukumbila kuti 2 mutafwambaani kuzungaanisigwa mumizeezo naakuti kuyoowa akaambo kamakani aakazulwidwa aamuuya,* majwi aakaambwa aabantu naakuti lugwalo lubonekaanga lwakazwa kulindiswe, eezyo zitondeezya kuti buzuba bwaJehova* bwasika.
3 Kutabi muntu uumusowa* munzila zyoonse, nkaambo buzuba oobu tabukasiki pe kunze kwakuti kuleya mulusyomo kusaangune kusika, amuntu uutatobeli mulawu ayubununwe, nkukwaamba mwana walunyonyooko. 4 Muntu ooyo ngusikukazya alubo ulalisumpula kwiinda chintu choonse chiitwa kuti nguleza naakuti chimwi chintu chikombwa, zyakuti ulakkala mutempele lyaLeza kalitondeezya aantanganana kubantu kuti nguleza. 5 Tamuchiyeeyede na kuti nindakachili aandinywe ndakali kukkala kandimubuzya zintu eezi?
6 Lino mulichizi chintu chilikumusinkila muntu ooyo, kuchitila kuti azooyubununwe kuchiindi chakwe cheelede. 7 Kwaamba choonzyo, kutatobela mulawu ooku kusisikene kwasaanguna kale kubeleka, pesi kuzooba aantanganana aakugwisigwa ooyo uulikukusinkila. 8 Mpawo muntu ooyo uutatobeli mulawu uzooyubununwa, alubo Mwaami Jesu uzoomunyonyoona amajwi alaamanguzu aazwa mumulomo wakwe* akumulobya natazooyubununwe kuchiindi chakubawo kwakwe. 9 Pesi kubawo kwamuntu ooyo uutatobeli mulawu, kulabawo kwiinda mukubeleka kwaSaatani, amilimu yoonse iigambya, azitondeezyo zyakubeja azigambyo 10 alweeno loonse lutaluleme kubantu balikunyonyooka, kuchitila kuti bajane zibeelede nkaambo teebakakatambula pe kasimpe akukayanda, kuchitila kuti bakonzye kufutulwa. 11 Eezi nzizyo zipede kuti Leza abalekele kuti bayungwe akaambo kalweeno, kuchitila kuti basyome makani aakubeja, 12 kuchitila kuti boonse babetekwe nkaambo teebakakasyoma pe kasimpe, pesi bakayandisya kutalulama.
13 Nikuba oobo, tweelede kumulumba Leza chiindi choonse akaambo kandinywe bakombima bayandwa aaJehova,* nkaambo kuzwa kumasaangunino, Leza wakamusala kuti muzoofutuke kwiinda mukumusalazya amuuya wakwe alusyomo ndumulaalo mukasimpe. 14 Wakamwiitila lufutuko oolu kwiinda mumakani mabotu ngitwaambilizya, kuchitila kuti mujane bulemu bwaMwaami wesu Jesu Kkristu. 15 Nkinkaako bakombima, amwiime nji alubo amujatisisye kuzintu nzimwakayiisigwa, kufumbwa kuti mwakazijana kumajwi aakaambwa naakuti kulugwalo lwakazwa kulindiswe. 16 Mukuyungizya, Mwaami wesu Jesu Kkristu lwakwe aLeza Taateesu, aabo bakatuyanda akutupa luumbulizyo lutamani abulangilizi bubotu kwiinda muluzyalo lupati, 17 abawumbulizye myoyo yanu akumusimya muzintu zyoonse zibotu nzimuchita anzimwaamba.