Lugwalo lwaJakkobo
2 Bakombima, kujana mwaamba kuti mulijisilidi kulusyomo lwaMwaami wesu uulemekwa Jesu Kkristu, kakuli mulikusaluulana aakati kanu? 2 Nkaambo kuti muntu uulaanweenwe zyangolida kutunwe twakwe alubo uuzweete zigogo zibotu wasika nkumubungene mpawo kwazoonjila muntu uufwaba, uulaazigogo zilaadoti, 3 nga mwayanda ooyo uuzweete zigogo zibotu na kwiinda mukumubuzya kuti, “Kkala aawa aandawu mbotu,” mpawo mwazoobuzya uufwaba kuti: “Iwe koyimvwi mpawaawo” naakuti, “Kkala aalya munsi aachilyatililo chamawulu aangu”? 4 Kuti kamulikuchita oobo, tamuli kusaluulana na aakati kanu, alubo teemwaba babetesi babeteka munzila mbi na?
5 Amuswiilile nibakombima bayandwa. Ani Leza taakasala aabo babonwa aanyika kuti balafwaba na, kuti banote mulusyomo akuti babe basikukona Bwaami, mbwaakasyomezya aabo bamuyanda? 6 Pesi tamubalemeki pe bafwaba. Ani teebaabo banotede na balikumudyaaminina akumukwenkwelesezya kunkuta zyamilawu? 7 Ani tabasampuli zina bbotu na ndimwakayitwaalyo? 8 Kuti kamulikutobelezya mulawu wamwaami kweendelana alugwalo lwaamba kuti, “Weelede kuyanda simayakilane wako mbuli mbuliyanda,” mulikuchita kabotu. 9 Pesi kuti mwayinkilila kunembo kusaluulana, mulikuchita chibi alubo mulawu wamupa mulandu* akaambo kakusotoka mulawu.
10 Nkaambo kuti muntu waswiilila zintu zyoonse zili muMulawu pesi waleka kuswiilila chintu chimwi, unooli wiityola yoonse. 11 Nkaambo ooyo wakaamba kuti, “Utachiti bumambi,” wakaamba lubo kuti, “Utajayi.” Nkinkaako, kuti teewachita bumambi pesi wajaya, unooli waba sikusotoka mulawu. 12 Amwiinkilile kunembo kwaambuula akulijata munzila eeyi, mbuli baabo batazoobetekwe aamulawu wabantu baangunukide.* 13 Nkaambo ooyo uuteeteleli, takeetelelwi pe aakubetekwa. Lweetelelo luzunda lubeta.
14 Zigwasyaanzi bakombima, kuti umwi muntu waamba kuti ulaalusyomo pesi katakwe milimu? Lusyomo oolo talukonzyi pe kumufutula, teembubo na? 15 Kuti bakwesu naakuti bachizi kabatakwe zyakuzwaata* achakulya chibakkwana buzuba mbuboobo, 16 mpawo umwi wanu wababuzya kuti: “Amwiinke muluumuno, mukasaalilwe, mukkute,” pesi kamutabapede nzibayanda kumubili, zigwasyaanzi? 17 Munzila iikozyenie, lusyomo alulikke lutakwe milimu lulifwide.
18 Nikuba oobo, umwi ulaamba kuti: “Iwe ulaalusyomo, ime ndilaamilimu. Nditondeezye lusyomo lwako lutakwe mulimu, ime ndilakutondeezya lusyomo lwangu kwiinda mumilimu.” 19 Ulasyoma na kuti kuli Leza uumwi? Ulikuchita kabotu. Naaba madimoni alasyoma alubo alazazama. 20 Iwe numuntu uutayeeyi, tuzi na kuti lusyomo lutakwe milimu talugwasyi pe? 21 Abbrahamu taateesu, taakaambwa kuti uliluleme na kwiinda mumilimu, naakazwa aakupa Izakka mwanaakwe aachipayililo? 22 Ulibwene kuti lusyomo lwakwe lwakabelekelaamwi amilimu yakwe, akuti lusyomo lwakwe lwakachitwa kuti lumaninine akaambo kamilimu yakwe, 23 alubo lwakazuzikizigwa lugwalo lwaamba kuti: “Abbrahamu wakaba aalusyomo muli Jehova,* alubo wakabonwa kuti uliluleme,” alubo wakayitwa kuti mweenzinyina waJehova.*
24 Mulibwene kuti muntu uzoowambwa kuti uliluleme kwiinda mumilimu, kutali kwiinda mulusyomo alulikke. 25 Munzila iikozyenie, anguwe Rahabbu wuule, taakaambwa kuti uliluleme na kwiinda mumilimu naakazwa aakubatambula kabotu batumwa akubabuzya kuti babweede kababelesya imwi nzila? 26 Kwaamba choonzyo, mbukunga mubili uutakwe muuya* ulifwide, andulo lusyomo lutakwe milimu lulifwide.