Makani mabotu aakalembwa aaMateyo
5 Naakabona makamu aabantu, wakatanta chilundu mpawo naakakkala aansi, basikwiiya bakwe bakasika kulinguwe. 2 Mpawo wakajula mulomo wakwe wasaanguna kubayiisya, kati:
3 “Balabotelwa aabo bazi kuti beelede kuzulwidwa aaLeza,* nkaambo Bwaami bwakujulu mbubwabo.
4 “Balabotelwa aabo balila, nkaambo bazoowumbulizigwa.
5 “Balabotelwa aabo bali aamyoyo iibombede, nkaambo bazookona nyika.
6 “Balabotelwa aabo bali aanzala anyota yabululami, nkaambo bazookkuta.
7 “Balabotelwa aabo bali aalweetelelo, nkaambo bazooyetelelwa.
8 “Balabotelwa aabo basalala mumoyo, nkaambo bazoomubona Leza.
9 “Balabotelwa aabo bapa kuti kube luumuno, nkaambo bazootegwa mbana baLeza.
10 “Balabotelwa aabo bakapenzegwa akaambo kabululami, nkaambo Bwaami bwakujulu mbubwabo.
11 “Mulabotelwa chiindi bantu nibamusampula akumupenzya akumubejelezya zintu zibi zyoonse akaambo kangu. 12 Amubotelwe alubo amukondwe loko mbukunga bulumbu bwanu mbupati kujulu, nkaambo nibaba bapolofita bakamusaangunina bakabapenzya munzila eeyi.
13 “Inywe muli munyo wanyika, pesi kuti munyo kawutachilweeli pe, nga ulachitwa biyeni kuti ulweele lubo? Tawuchikonzyi kubelesegwa kuchintu choonse kunze kwakuti usowelwe aanze kuti ulyatuukwe aabantu.
14 “Inywe muli mumuni wanyika. Muunzi tawukonzyi pe kusiswa kuti kawuli aachilundu. 15 Kuti bantu bayasya lambe, balibikka aachibikkilo chalambe kutali aansi aabbasikiti* pe alubo nga lyamunikila bantu boonse bali mung’anda. 16 Munzila iikozyenie, mumuni wanu awumunike kunembo lyabantu, kuchitila kuti babone milimu yanu mibotu mpawo bape bulemu kuli Wuso uuli kujulu.
17 “Mutabonaanga ndakazida kuzoomwaya Mulawu naakuti Bapolofita. Ndakazida kuzoozuzikizya kutali kumwaya. 18 Kwaamba choonzyo, ndimubuzya kuti, nchuuba kuti julu anyika zyiinde, kwiinda kuti kabbii kamwi kaniini loko naakuti kapanzi kamwi kabbii kali muMulawu kazwe, kusikila zintu zyoonse zichitike. 19 Nkinkaako, kufumbwa muntu uutyola umwi wamilawu eeyi miniini akuyiisya bamwi kuti bachite oobo, teeleli pe naaba aaniini kunjila muBwaami bwakujulu. Pesi kufumbwa muntu uutobela milawu eeyi akwiiyiisya, uzooyelela kunjila muBwaami bwakujulu. 20 Nkaambo ndimubuzya kuti, kuti bululami bwanu kabutayindi bwabalembi abaFarisi, tamuzoonjili pe muBwaami bwakujulu.
21 “Mwakamvwa kuti bantu bachiindi bakabuzigwa kuti: ‘Utajayi, pesi kufumbwa muntu uujaya, uzoolyaambilila kunkuta yabululami.’ 22 Nikuba oobo, ndimubuzya kuti, muntu woonse wiinkilila kunembo kanyemenede mukombinyina, uzoolyaambilila kunkuta yabululami alubo kufumbwa muntu uubuzya mukombinyina majwi aakunyansya aataambiki, uzoolyaambilila kuNkuta Mpati, pesi kufumbwa muntu waamba kuti, ‘Yoomufuba-fuba!’* uleelela kuwaalilwa mumulilo wamuGehena.*
23 “Nkinkaako, kuti kulikweeta chipo chako kuchipayililo mpawo kuli nkukooko, wayeeya kuti mukombinyokwe ulaakaambo anduwe, 24 siya chipo chako mpawaawo kunembo lyachipayililo, mpawo wiinke. Saanguna kuba aaluumuno amukombinyokwe, mpawo uboole uzoope chipo chako.
25 “Weelede kufwambaana kubamba makani amuntu uuli aakaambo anduwe nimuchili munzila kamuya kunkuta, kuchitila kuti atakutoli kumubetesi mpawo mubetesi atakutoli kumupulisa wankuta, ooyo utakuwaalile mujele. 26 Kwaamba choonzyo, ndikubuzya kuti, tukazwi pe mujele kusikila umaninsye kubbadala kamali kaniini kamamanino.*
27 “Mwakazimvwa kuti kwakaambwa kuti: ‘Utachiti bumambi.’ 28 Pesi ndimubuzya kuti, muntu woonse uulangisisya mwanakazi zyakuti wamumenena mate, wachita kale bumambi anguwe mumoyo wakwe. 29 Kuti liso lyako lyakuchilisyo kalipa kuti ulebwe, linonkole ulisowele kule. Nkaambo zilikabotu kuti usweekelwe aachipanzi chimwi chamubili wako, kwiinda kuti mubili wako woonse uwaalilwe muGehena.* 30 Alubo kuti kuboko kwako kwakuchilisyo kakupa kuti ulebwe, kugonke ukusowele kule. Nkaambo zilikabotu kuti usweekelwe aachipanzi chimwi chamubili wako, kwiinda kuti mubili wako woonse uchinke kawuli waba muGehena.*
31 “Mukuyungizya, kwakaambwa kuti: ‘Kufumbwa muntu uuleka mwanakazi wakwe, weelede kumupa lugwalo lwakumuleka.’ 32 Nikuba oobo, ndimubuzya kuti, muntu woonse uuleka mwanakazi wakwe kutali akaambo kabwaamu,* umunjizya musunko lyakuchita bumambi alubo kufumbwa muntu uukwata mwanakazi wakalekwa, uchita bumambi.
33 “Alubo mwakazimvwa kuti bantu bachiindi bakabuzigwa kuti: ‘Toyelede kukonka mpawo uleke kuzuzikizya pesi weelede kuzuzikizya zikonke zyako kuli Jehova.’* 34 Nikuba oobo, ndimubuzya kuti: Mutakonki pe, nikuba ajulu nkaambo nchuuno chabwaami chaLeza, 35 nikuba anyika, nkaambo nchilyatililo chamawulu aakwe, nikuba aJerusalema, nkaambo muunzi waMwaami mupati. 36 Mutakonki amitwe yanu pe nkaambo tamukonzyi pe kuchincha kasusu kamwi kuti katube naakuti kasiye. 37 Pesi ijwi lyanu lyakuti ‘Iiyi’ alibe iiyi, lyakuti ‘Peepe’ alibe peepe, nkaambo zyiinda eezi zizwa kumubi.
38 “Mwakamvwa kuti kwakaambwa kuti: ‘Liso kuliso, linyo kulinyo.’ 39 Nikuba oobo, ndimubuzya kuti: Mutamulwani pe muntu mubi, pesi kufumbwa muntu uumuuma lubayi kuseya lyakuchilisyo, amumupe alimwi seya. 40 Kuti muntu kayanda kukutola kunkuta kuti abweze chigogo chako chamukati, muleke abweze achaajulu, 41 alubo kuti muntu uuli mubweendelezi wakusungilizya kuti weende kkilomita* iimwi, yendaawe makkilomita aabili. 42 Ooyo uukukumbila, mupe nchaakumbila alubo utamufutatili pe ooyo uuyanda kukweleta* kulinduwe.
43 “Mwakamvwa kuti kwakaambwa kuti: ‘Weelede kuyanda simayakilane wako alubo uzonde sinkondonyokwe.’ 44 Nikuba oobo, ndimubuzya kuti: Amwiinkilile kunembo kuyanda basinkondonyokwe akukombela aabo bamupenzya, 45 kuchitila kuti muboneke kuti muli bana baWuso uuli kujulu, mbukunga upa kuti zuba lyakwe lizwide bantu babi ababotu alubo upa kuti mvula iwe kubantu baluleme abataluleme. 46 Nkaambo kuti kamuyanda aabo bamuyanda, kuli bulumbu mbumutazoojane na? Teenzizyo na nzibalikuchita ambabo basimutelo? 47 Alubo kuti kamujuzya bakombinyokwe kupela, niinzi biya nzimulikuchita zigambya? Teenzizyo na nzibalikuchita ambabo bantu bazisi? 48 Nkinkaako, mweelede kuba bantu bamaninide mbuli Wuso wakujulu mbamaninide.