KuBaroma
1 Ndime Pawulu, muzike waKkristu Jesu, alubo ndakayitwa kuti ndibe mwaapostoli akusalwa kuti ndaambilizye makani mabotu aaLeza, 2 ngaakasyomezya kakuchili chiindi muMagwalo aasalala kwiinda mubapolofita, 3 aali atala aMwanaakwe wakazyalwa aamubili wanyama kuzwa kubana baDavida, 4 pesi changuzu wakaambwa kuti Mwana waLeza kweendelana amuuya wabusalali, naakabusigwa kuzwa kubafu. Nichoonzyo, ooyu ngunguwe Jesu Kkristu Mwaami wesu. 5 Kwiinda mulinguwe, ndakatambula* luzyalo lupati abwaapostoli, kuchitila kuti zisi zyoonse ziswiilile akaambo kalusyomo akuti zina lyakwe lilemekwe. 6 Andinywe mwakazwa muzisi eezyo akwiitwa kuti mube baJesu Kkristu. 7 Ndilikumulembela moonse nimuli kuRoma nimuyandwa aaLeza, nimwakayitwa kuti mube basalali:
Amube aaluzyalo lupati aluumuno kuzwa kuli Leza Taateesu aMwaami Jesu Kkristu.
8 Chakusaanguna, ndilamulumba Leza wangu kwiinda muli Jesu Kkristu akaambo kandinywe moonse, nkaambo lusyomo lwanu lulikwaambwa munyika yoonse. 9 Nkaambo Leza ooyo ngundibelekela mulimu uusalala amoyo* wangu, nindikambawuka makani mabotu aali atala aMwanaakwe, ulizi kuti chiindi choonse tandileki pe kumwaamba munkombyo zyangu, 10 kandikombelezya kuti, kuti kazichita ndizoozwidilile kusika kulindinywe kuti kakuli kuyanda kwaLeza. 11 Nkaambo ndili aachiyandisyo chakuzoomubona kuti ndizoomupe chipo chamuuya kuchitila kuti musime mulusyomo 12 naakuti, tusungwaazyanie. Ime ndimusungwaazye alusyomo lwangu andinywe mundisungwaazye alusyomo lwanu.
13 Pesi bakombima, ndiyanda kuti muzibe kuti kwaziindi zyiingi, ndakali kuyanda kuza kulindinywe, pesi ndakali kusinkilwa kusikila sunu, kuchitila kuti ndijane michelo aakati kanu mbuli mbundilikwiijana akuli zimwi zisi. 14 Ndili aachikwelete kumaGrikki akubantu batali maGrikki, kubasongo akubafuba-fuba. 15 Nkinkaako, ndili aachiyandisyo chipati chakwaambilizya makani mabotu akulindinywe nkukooko kuRoma. 16 Nkaambo tandikwe bweeme pe atala amakani mabotu, kwaamba choonzyo, aaya manguzu aaLeza aakufutula bantu boonse bali aalusyomo, kusaanguna kumuJuda mpawo kuze kumuGrikki. 17 Nkaambo mulingawo, bululami bwaLeza bulatondeezegwa kuli baabo bali aalusyomo, kuchitila kuti lusyomo lwabo lusime mbuli mbukulembedwe kuti: “Pesi mululami uzoopona akaambo kalusyomo.”
18 Nkaambo bukali bwaLeza bulikutondeezegwa kuzwa kujulu kubantu boonse batayoowi Leza abataluleme, balikupa kuti kasimpe katazibinkanwi kababelesya nzila iitaluleme. 19 Nkaambo zintu zikonzya kuzibwa atala aLeza, zili aantanganana aakati kabo nkaambo Leza wakapa kuti zibe aantanganana kulimbabo. 20 Nkaambo buntu bwakwe butaboneki bulaboneka aantanganana kuzwa niyakalengwa nyika kaziya kunembo, nkaambo bulamvwisisika kuti twalanga zintu nzyaakalenga, kuti ulaamanguzu aatamani akuti nguLeza choonzyo, zyakuti tabakwe kaambo kakuyubaako pe. 21 Nkaambo nikuba kuti bakalimuzi Leza, teebakamupa bulemu pe mbuli Leza nikuba kumulumba, pesi bakayeeya zintu zitagwasyi alubo myoyo yabo yabufuba-fuba yakaba aamudima. 22 Nikuba kuti bakali kulyaamba kuti mbasongo, pesi bakaba bafuba-fuba. 23 Alubo bakachincha bulemu bwaLeza uutafwi kuti bube mbuli chifanikisyo chamuntu uufwa, chabayuni, chabanyama bali aamawulu aane achabanyama bayavula.
24 Nkinkaako, Leza wakabasiya kuti bachite zintu zitasalali ziyandwa aamyoyo yabo, kuchitila kuti mibili yabo italemekwi aakati kabo. 25 Bakasiya kasimpe kaLeza, mpawo bakasaanguna kusyoma zyakubeja, alubo bakakomba zilenge akuzibelekela milimu iisalala kwiinda kuti bachite oobo kuMulengi, ooyo uutembawulwa kusikila kukabe kutamani. Ameni. 26 Leza nchaakabalekela kuti babe aachiyandisyo chakoonana chitondwa, nkaambo banakazi aakati kabo, bakasiya nzibakalengelwa kuti kaboonana abaalumi mpawo bakasaanguna kulijata munzila iiteendelani ambubakalengwa kwiinda mukoonana muli chabo-chabo. 27 Munzila iikozyenie, baalumi bakasiya nzibakalengelwa kuti kaboonana abanakazi, mpawo bakapya aachiyandisyo chipati chakuti boonane aakati kabo, baalumi abaaluminyina, kabalikuchita zintu zitondwa alubo balikutambula chisubulo chikkwene cheendelana* akubisya kwabo.
28 Mbukunga bakazibona kaziteeleli kuzumina Leza,* Leza wakabalekela kuti bayeeye zintu zitagwasyi akuti bachite zintu nzibateelede kuchita. 29 Alubo bakazwide kutalulama koonse, bubi, butangazu, azintu zibi, bakazwide munyono, bujayi, kulwana, lweeno alunya, mbaasikuvwiya, 30 baambuula zintu zibi atala abamwi, batayandi Leza, batalemeki, balisumpula, balidunda, bayeeya kuchita zintu zibi, bataswiilili bazyali, 31 batamvwisisisyi, batabambi zizuminano, batakwe luyando abateeteleli pe. 32 Nikuba kuti bantu aaba baluuzi kabotu mulawu waLeza uululeme wakuti, aabo bachita zintu eezi beelede kufwa, pesi baliikwiinkilila kunembo kuzichita alubo balazuminana abantu bazichita.