Mikka

3 Ndakati: “Amumvwe kaka, nibasilutwe baJakkobo

Andinywe nibazulwidi bang’anda ya-Israyeli.

 2 Nikuba oobo, muzonda zintu zibotu kamuyanda zintu zibi.

Mufunda bantu bangu akugwisya nyama aazifuwa zyabo.

 3 Mulya nyama yabantu bangu

Akubafunda,

Mutyola zifuwa zyabo akuzipwaya,

Mbuli zintu zijikwa mumpoto, mbuli nyama iili mumpoto.

 4 Aachiindi eecho, bazooyita Jehova kuti abagwasye

Pesi tazoobasanduli pe.

Aachiindi eecho, uzoobasisila busyu bwakwe,

Akaambo kamichito yabo mibi.

 5 Nzezi Jehova nzyalikubuzya bapolofita, aabo balikupa kuti bantu bangu baleye,

Aabo baambilizya kuti ‘Luumuno!’ ooku kabalumide* chimwi chintu amenyo aabo

Pesi kabalwana muntu uutabikki chintu munkanwa lyabo:

 6 ‘Mansiku azoomusikila, tamuzooboni chilengaano pe,

Munooli mumudima kupela, tamuzoosondi pe.

Zuba lizoobabbilila bapolofita,

Lizoobabbilila sikati.

 7 Basikubona zilengaano bazooba aabweeme,

Abasondi, bazoomana manguzu.

Boonse bazoolivumba kumilomo,*

Nkaambo Leza tazoobasanduli pe.’”

 8 Pesi ime, ndizwide manguzu akaambo kamuuya waJehova,

Alubo ndizwide bululami achibindi,

Kuti ndibuzye Jakkobo kubukila kwakwe, a-Israyeli chibi chakwe.

 9 Amumvwe eezi kaka, inywe nibasilutwe bang’anda yaJakkobo

Andinywe nibazulwidi bang’anda ya-Israyeli,

Inywe nimutayandi bululami animupilingania zintu zyoonse ziluleme,

10 Inywe nimuyaka Ziyoni aganzi ndimutila akuyaka Jerusalema akutalulama.

11 Bazulwidi* bakwe babeteka kuti bajane chisinkamulomo,

Bapayizi bakwe bayiisya kuti bajane mbadalo,

Abapolofita bakwe basonda kuti bajane mali.*

12 Nkinkaako, akaambo kandinywe,

Ziyoni izoolimwa mbuli muunda,

Jerusalema izooba tongo,

Alubo chilundu chaNg’anda* chizooba mbuli ndawu zili aajulu mulusaka.