Zakkariya

14 “Bona! Buzuba bulikuza, buzuba bwaJehova, aawo lubono lwako* luli mulinduwe niluzoowabanisigwa mbuli zintu zyanyangwa bantu bazundwa. 2 Ndizoobunganizya bantu bazisi zyoonse kuti balwane Jerusalema, muunzi uzoozundwa alubo zintu zili mumaanda zizoobwezegwa abanakazi bazoovumpilwa. Hafu yabantu bamumuunzi izooya mubuzike, pesi aabo batazoosyaale aakati kabo tabazoonyonyoonwi pe mumuunzi.

3 “Jehova uzooyinka akalwane aazisi eezyo mbuli mbalwana mubuzuba bwankondo. 4 Mubuzuba oobo, mawulu aakwe azooyimikila aaChilundu chama-Olifa chilangene aaJerusalema nkwiili kubuzwezuba; Chilundu chama-Olifa chizookwamuka aakati, kuzwa kubuzwezuba do kububbila* kachipanga mumpata mupati; alubo chipanzi chimwi chachilundu chizooswena kubbazu lyakunyika, mpawo chimwi kubbazu lyakumusanza. 5 Muzoochijila kumumpata wazilundu zyangu nkaambo mumpata wazilundu eezyo uzoosika ku-Azeli. Muzoochija mbuli mbumwakachija muzuzumo wanyika mumazuba aamwaami Uziya waJuda. Jehova Leza wangu uzoosika, basalali boonse bazooba aamwi anguwe.

6 “Mubuzuba oobo, takuzoobi mumuni uumwekesya pe—zintu zizoogagatila akaambo kakuumwa aampeyo. 7 Alubo buzooba buzuba bumwi buzibinkene kuti mbuzuba bwaJehova. Takuzoobi sikati pe naaba mansiku; alubo chiindi chagoko kuzooba mumuni. 8 Mubuzuba oobo, maanzi aabuumi azooyenda kuzwa muJerusalema, hafu yawo izooyenda kayitozya kulwizi lwakubuzwezuba* mpawo imwi hafu yawo izooyenda kayitozya kulwizi lwakububbila.* Zizoochitika muchiindi chakupya amuchiindi champeyo. 9 Jehova uzooba mwaami wanyika yoonse. Mubuzuba oobo, Jehova uzooba nguwe Leza alikke, andilyo zina lyakwe lizooba limwi biyo.

10 “Nyika yoonse izooba mbuli Arabba, kuzwa kuGebba kuyoosika kuRimoni kumusanza waJerusalema; Jerusalema izoobuka aandawu yayo ikkalwe aabantu kuzwa kuGeedi lyaBbenjamini kuyoosika kundawu yaGeedi lyaKusaanguna akuyoosika kuGeedi lyaaKkona, akuzwa kuNgazi yaHananeli kuyoosika kuzikandilo zyawayini zyamwaami. 11 Alubo bantu bazookkala mulinguwe; lutuko lwalunyonyooko taluchizoobi lubo pe alubo bantu bazookkala muJerusalema kabalyiibide.

12 “Eechi nchiichisubulo Jehova nchatazoobelesye kusubula bantu bamisyobo iisiyene-siyene balwana Jerusalema: Nyama zyamibili yabo zizoobola kabayimvwi, meso aabo azoobola muzikomba zyameso aabo alulimi lwabo luzoobola munkanwa lyabo.

13 “Mubuzuba oobo, Jehova uzoopa kuti banyongane aakati kabo; muntu umwi awumwi uzoojata kuboko kwamweenzinyina alubo kuboko kwakwe kuzoolwana kuboko kwamweenzinyina.* 14 Anguwe Juda uzooswaanizigwa munkondo kuJerusalema; bunoti bwazisi zyoonse ziizyungulukide buzoobunganizigwa, nkukwaamba ngolida ansiliva azigogo kazili zyiingi loko.

15 “Alubo chisubulo chili mbuli eechiya chizoosikila mabbiza, myuulu,* nkamela, madonki, azivuubwa zyoonse zili mumakkeempu aabo.

16 “Kufumbwa muntu uutazoosyaale aakati kazisi zyoonse zitazooze kuzoolwana Jerusalema, unootanta munyaka amunyaka kuti akafugamine* Mwaami, Jehova wamakamu, akuti akasekelele Pobwe lyaZivututu. 17 Pesi kuti umwi muntu aakati kampuli zili aanyika waleka kutanta kuya kuJerusalema kuti akafugamine Mwaami, Jehova wamakamu, imvula tayizoowi pe kulimbabo. 18 Alubo kuti mpuli yaku-Ijipita yaleka kutanta akuti yaleka kunjila, mvula tayizoowi pe kulimbabo. Pesi bazoowumwa aachisubulo eechiya Jehova nchabelesya kusubula zisi zitatanti kuzoosekelela Pobwe lyaZivututu. 19 Eechi chizooba chisubulo cha-Ijipita akaambo kakubisya kwayo achakubisya kwazisi zyoonse zitatanti kaziza kuzoosekelela Pobwe lyaZivututu.

20 “Mubuzuba oobo, majwi aakuti ‘Busalali mbubwaJehova!’ azoolembwa aamilangu yamabbiza. Ampoto zyakujikila zili mung’anda yaJehova zizooba mbuli ndido zili kunembo aachipayililo. 21 Mpoto zyakujikila zyoonse zili muJerusalema amuJuda zizoosalala alubo zizooba zyaJehova wamakamu, abantu boonse bapayizya bazoonjila akubelesya zimwi mpoto kuti bajikile zipayizyo zyabo. Mubuzuba oobo, takuchizoobi muKkenani* mung’anda yaJehova wamakamu.”