Makani aakalembwa aaMakko
13 Naakali kuzwa mutempele, umwi wabasikwiiya bakwe wakati kulinguwe: “Muyiisi, bona mbaali mabotu mabwe aaya, amayake aaya!” 2 Nikuba oobo, Jesu wakati kulinguwe: “Ulaabwene na mayake woonse aaya mapati? Taakwe bbwe litazoosiigwe aajulu aabbwenyina, kalitakolomwedwe pe.”
3 Naakakkede aaChilundu chama-Olifa kalangide tempele, Petro aJakkobo aJohane a-Andreya bakamubuzya kakutakwe bantu kuti: 4 “Tubuzye, zintu eezi zizoochitika lili alubo niinzi chitazoobe chitondeezyo chakuti zintu zyoonse eezi zyaamba kusika kumamanino?” 5 Nkinkaako, Jesu wakasaanguna kubabuzya kuti: “Amuchenjelele kuti kutabi muntu uumweena pe. 6 Bantu biingi bazoosika muzina lyangu kabati, ‘Ndime nguwe,’ alubo bazooyena biingi. 7 Mukuyungizya, mwazoomvwa atala ankondo amilumbe yankondo, mutazooyoowi pe, zintu eezi zyeelede kuchitika pesi mamanino nga taanasika pe.
8 “Nkaambo chisi chizoobukila chimwi chisi alubo bwaami buzoobukila bumwi bwaami. Kuzooba mizuzumo yanyika mundawu zisiyene-siyene alubo kuzooba nzala. Zintu eezi matalikilo aamapenzi aali mbuli kumyongwa kwamwanakazi uuyanda kutumbuka.
9 “Pesi inywe amulichenjelele. Bantu bazoomutola kunkuta, alubo muzoowumwa muzikombelo akwiimikizigwa kunembo lyabeendelezi abaami akaambo kangu, kuchitila kuti bube bukamboni kulimbabo. 10 Alubo makani mabotu ayelede kusaanguna kukambawukwa muzisi zyoonse. 11 Nibamutola kunkuta, mutakataazikani pe kuti muzootyeni, pesi kufumbwa nzimutapegwe ku-awa njiyeeyo amuzyaambe, nkaambo teendinywe pe uutanoowambuule, pesi muuya uusalala. 12 Mukuyungizya, mukulana uzootola mwanike kukujayigwa, wisi uzootola mwana kukujayigwa, alubo bana bazoobukila bazyali akupa kuti bajayigwe. 13 Alubo muzoozondwa aabantu boonse akaambo kazina lyangu. Pesi ooyo uulisimya kusikila kumamanino, uzoofutulwa.
14 “Nikuba oobo, mwaakubona chintu chisesemya cheeta lunyonyooko kachiimvwi mpuchiteelede kwiimikila, (ooyo uubala abelesye maanu), mpawo aabo bali muJudiya abasaangune kuchijila kuzilundu. 15 Muntu uuli aajulu aang’anda, ataseluki nikuba kunjila mung’anda kuti akabweze chimwi chintu chili mung’anda yakwe, 16 alubo muntu uuli mumuunda atabweedeli zintu zili musule kuti akabweze chigogo chakwe chaajulu. 17 Bali aapenzi banakazi banooli aamada abanoonyonsya mumazuba aayo! 18 Amwiinkilile kunembo kukombela kuti zitazoochitiki muchiindi champeyo, 19 nkaambo mazuba aayo anooli mazuba aamapenzi aatanaba aabuzuba achitika kuzwa kumatalikilo aazilenge nzyaakalenga Leza kusikila kuchiindi eecho, alubo taazoochitiki lubo pe. 20 Kwaamba choonzyo, kaansinga Jehova* taakafwiinsya mazuba aayo, taakwe muntu walikuzoofutulwa pe. Pesi akaambo kabaabo basalidwe mbaakasala, waafwiinsya mazuba aayo.
21 “Mpawo kuti umwi muntu wamubuzya kuti, ‘Amubone! Ngoyu Kkristu,’ naakuti wati, ‘Nguulya aalya,’ mutasyomi pe. 22 Nkaambo kuzooba baKkristu bakubeja abapolofita bakubeja alubo bazoochita zitondeezyo azigambyo kuti beezye kweena basalidwe kuti kazichita. 23 Pesi inywe amuchenjelele. Ndamubuzya zintu zyoonse kazitanachitika pe.
24 “Pesi mumazuba aayo, mapenzi aayo kaali ayinda, zuba lizoochitwa kuti lisiye alubo mweezi tawuzoomuniki pe, 25 nyenyeezi zinooloka kuzwa kujulu alubo manguzu aali kujulu azoozungaanisigwa. 26 Mpawo bazoobona Mwanaamuntu kaza mumayoba kali aamanguzu miingi abulemu. 27 Alubo uzootuma ngilozi mpawo zizoobunganizya bantu bakwe basalidwe kuzwa kumabazu aane,* kuzwa kumagolelo aanyika kusikila kumagolelo aajulu.
28 “Amwiiye chikozyanisyo eechi kuzwa kumukuyu: Mbuutabe aantabi mpya akusyuuka matu, nga mwaziba kuti mayinza abaafwiifwi. 29 Munzila iikozyenie, andinywe kuti mwazoobona zintu eezi kazilikuchitika, amuzibe kuti waba aafwiifwi, aamilyango. 30 Kwaamba choonzyo, ndimubuzya kuti, zyalani eeli talizooyindi pe kusikila zintu zyoonse eezi zichitike. 31 Julu anyika zizooyinda pesi majwi aangu taazooyindi pe.
32 “Taakwe muntu uubuzi pe buzuba naakuti awa nizitazoochitike zintu eezi, niziba ngilozi zili kujulu, naaba Mwana, pesi Taata. 33 Amukkale kamulangide, amukkale kamulindide nkaambo tamuzi pe kuti chiindi chibikkidwe chizoosika lili. 34 Zikozyenie aamuntu wakayinka kunyika iili kule, wakasiya ng’anda yakwe mumaboko aabazike mpawo muzike umwi awumwi wakamupa mulimu wakuchita alubo wakalayilila mulindi wamulyango kuti akkale kalindide. 35 Nkinkaako, amukkale kamulindide, nkaambo tamuzi pe kuti mwining’anda usika lili, ulakonzya kusika goko naakuti aakati kamansiku naakuti kubuchedo* naakuti kuseeni loko, 36 kuchitila kuti naasika kamutayeeyeli pe, atamujani kamulikoona. 37 Pesi nzindimubuzya, ndizibuzya bantu boonse: Amukkale kamulindide.”