Detoronomi

4 “Nima-Israyeli, amuswiilile milawu anzila zyakubeteka nzindili kumuyiisya kuti muzibambe, kuchitila kuti mupone akuti munjile mukakone nyika Jehova Leza wamasianyookulu, njalikumupa. 2 Tamweelede kuyungizya chintu pe kujwi ndindili kumulayilila, naakuti kugwisya chimwi chintu kuli ndilyo, kuchitila kuti mubambe milawu yaJehova Leza wanu njindili kumulayilila.

3 “Mwakalibonena nzyaakachita Jehova akaambo kaBbaala wakuPeyori; Jehova Leza wanu wakabajaya bantu boonse aakati kanu bakatobela Bbaala wakuPeyori. 4 Pesi inywe nimuchikakatide kuli Jehova Leza wanu, muchili bawumi kusikila sunu. 5 Amubone, ndamuyiisya milawu anzila zyakubeteka mbuli mbaakandilayilila Jehova Leza wangu, kuchitila kuti mukayibambe nyika njimuyaakukona. 6 Mweelede kwiitobelezesya, nkaambo kuchita oobo kuyootondeezya kuti muli aabusongo akuti mulamvwisisisya kunembo lyazisi zitazoomvwe atala amilawu yoonse eeyi, mpawo zizoowamba kuti, ‘Chisi eechi nchipati, kwaamba choonzyo chili aabantu basongo alubo bamvwisisisya.’ 7 Kuli chisi chipati na, chili aabaleza bali aafwiifwi anchicho mbuli Jehova Leza wesu mbali aafwiifwi andiswe kufumbwa chiindi nitumwiita? 8 Alubo kuli chisi chipati na chili aamilawu iiluleme anzila zyakubeteka mbuli mulawu woonse ooyu ngundili kubikka sunu kunembo lyanu?

9 “Amuchenjele mulibikkile maanu, kuchitila kuti mutazilubi pe zintu nzimwakabona akuti zitazwi pe mumyoyo yanu mazuba woonse aabuumi bwanu. Alubo mweelede kuzibuzya bana banu abazukulu banu. 10 Mubuzuba nimwakayimvwi kunembo lyaJehova Leza wanu kuHorebbu, Jehova wakati kulindime, ‘Bunganizya bantu aaba kulindime kuti bamvwe majwi aangu, bayiye kundiyoowa mazuba woonse aabuumi bwabo aanyika akuti baayiisye bana babo.’

11 “Nkinkaako, mwakaswena aafwiifwi mwayimikila munsi aachilundu alubo chilundu chakali kuyaka mulilo kusika kujulu;* kwakali mudima ajoba lisiya mbi. 12 Mpawo Jehova wakasaanguna kwaambuula aandinywe kuzwa mumulilo. Mwakamvwa jwi pesi taakwe ngumwakabona pe—mwakamvwa biyo jwi. 13 Wakamubuzya chizuminano chakwe nchaakamulayilila kuti muchibambe, nkukwaamba Milawu iili Kkumi. Mpawo wakazooyilemba aamabwe aabili aapapalete. 14 Aachiindi eecho, Jehova wakandilayilila kuti ndimuyiisye milawu anzila zyakubeteka nzimuyoobamba munyika njimuyoonjila kuti mwiikone.

15 “Nkinkaako, amuchenjelele—mbukunga taakwe ngumwakabona mubuzuba Jehova naakaambuula aandinywe mumulilo kuHorebbu— 16 kuchitila kuti mutabisyi kwiinda mukulipangila chikozyano chibezedwe, chikozyano chamwaalumi naakuti chamwanakazi, 17 kufumbwa chikozyano chamunyama waanyika naakuti chamuyuni wuuluka mujulu, 18 kufumbwa chikozyano chachintu chiyavula aanyika naakuti chamuswi uuli mumaanzi kunsi aanyika. 19 Chiindi nimulanga kujulu akubona zuba amweezi anyenyeezi—nkukwaamba makamu woonse aakujulu—mutayungwi akuzikotamina kuti muzibelekele. Jehova Leza wanu wakazipa bantu boonse bali aansi aajulu. 20 Pesi inywe ndindinywe mbaakagwisya Jehova mubbibi lyamulilo lyakuyaazya nsimbi mu-Ijipita kuti mube lukono lwakwe, mbuli mbumubede sunu.

21 “Jehova wakandinyemena akaambo kandinywe, alubo wakakonkezya kuti tandikoomuzubuka pe Jodani nikuba kunjila munyika mbotu Jehova Leza wanu njalikumupa kuti ibe lukono lwanu. 22 Nkaambo ndilafwida munyika eeyi; tandikoomuzubuka pe Jodani, pesi inywe muyoomuzubuka kuti mukakone nyika eeyi mbotu. 23 Amuchenjelele kuti mutachilubi chizuminano Jehova Leza wanu nchaakapangana aandinywe, alubo mutalipangili chikozyano chibezedwe, kufumbwa chintu nchimwakakasigwa aaJehova Leza wanu. 24 Nkaambo Jehova Leza wanu mulilo uunyonyoona, nguLeza uuyanda kukombwa biyo alikke.

25 “Kuti mwazoozyala bana akuba aabazukulu akoongola munyika eeyo mpawo mubisye kwiinda mukupanga chikozyano chibezedwe chamusyobo uuli woonse akubisya mumeso aaJehova Leza wanu kuti mumunyemye. 26 Ndiita julu anyika kuti zibe bakamboni bangu sunu kuti choonzyo muzoonyonyoonwa chakufwambaana kunyika njimuli kuzubuka Jodani kuti mukiikone, tamukoongoli pe mulinjiyo pesi muzoonyonyoonwa chakumaninina. 27 Jehova uzoomumwaya aakati kazisi, bache biyo aakati kanu mbabo batazoofutuke kuzisi ooko Jehova nkwayoomutandila. 28 Kamuli nkukooko, muyoobelekela baleza bazisamu abamabwe bakapangwa aabantu, baleza batakonzyi kubona, kumvwa, kulya, naakuti kununkizya.

29 Kuti kamuli nkukooko mwamuyanduula Jehova Leza wanu, kwaamba choonzyo muyoomujana, kuti mwamuyanduula amoyo wanu woonse abuumi bwanu boonse. 30 Nimwazooba mumapenzi mapati akusikilwa aazintu zyoonse eezi muchiindi chili kunembo, muzooboola kuli Jehova Leza wanu akuswiilila jwi lyakwe. 31 Nkaambo Jehova Leza wanu, nguLeza Silweetelelo. Takamusiyi pe nikuba kumunyonyoona nikuba kuluba chizuminano nchaakakonkezya kumasianyookulu.

32 “Lino amubuzye atala amazuba aachiindi kamutanabawo pe, kuzwa mubuzuba Leza naakalenga muntu aanyika; amuyanduule kuzwa kuli aamwi magolelo aajulu kuyoosika kuli aambi magolelo aajulu. Kuli chimwi chintu chipati oobu na chakalichitikide naakuti chimwi chili mbuli nchicho chakamvwigwa? 33 Kuli bamwi bantu na bakamvwa jwi lyaLeza kalyaambuula mumulilo mbuli mbumwakalimvwa akusyaala kamuli bawumi? 34 Naakuti Leza kuli naakali weezya na kulisalila chisi aakati kazimwi zisi, ambeta, azitondeezyo, azigambyo, ankondo, akuboko kuli aamanguzu, akuboko kutandabikidwe, amilimu iiyoosya mbuli mbaakamuchitila Jehova Leza wanu ku-Ijipita kunembo lyanu? 35 Inywe lwanu mwakatondeezegwa zintu eezi kuchitila kuti muzibe kuti Jehova nguLeza wakasimpe; taakwe uumbi pe kunze kwakwe. 36 Wakapa kuti mumvwe jwi lyakwe kuzwa kujulu kuti amululamike, aanyika wakapa kuti mubone mulilo wakwe mupati, alubo mwakamvwa jwi lyakwe kuzwa mumulilo.

37 “Akaambo kakuti wakabayanda masianyookulu alubo wakasala bana mbibakazoozyala, wakamugwisya mu-Ijipiti akumusindikila amanguzu aakwe mapati. 38 Wakatanda bantu bazisi zipati, zili aamanguzu loko kwiinda ndinywe kunembo lyanu, kuchitila kuti amunjizye akumupa nyika yabo kuti ibe lukono lwanu, mbuli mbukubede sunu. 39 Nkinkaako, amuzibe mubuzuba oobuno, alubo muzibambe mumyoyo yanu kuti Jehova nguLeza wakasimpe kujulu aanyika. Taakwe uumbi pe. 40 Mweelede kubamba malayilile aakwe amilawu yakwe nzindilikumupa mubuzuba bwasunu, kuchitila kuti zimweendele kabotu abana banu mbimuyoozyala akuti mukoongole munyika njalikumupa Jehova Leza wanu.

41 Aachiindi eecho, Mozesi wakasala myuunzi iitatu iili kubuzwezuba kwaJodani. 42 Kuti muntu wajaya mweenzinyina katazibambilide kakuli taakali kumuzonda pe, weelede kuchijila kuli uumwi wamyuunzi eeyi kuti afutuke. 43 Wakasala Bbezeri iili munkanda muntandabale kuti ibe yamusyobo waRubbeni, aRamoti iili muGiliyadi kuti ibe yamusyobo waGadi, aGolani iili muBbashani kuti ibe yamusyobo waManase.

44 Ooyu nguMulawu Mozesi ngwaakapa ma-Israyeli. 45 Eezi nziiziyeekezyo, malayilile, anzila zyakubeteka Mozesi nzyaakapa ma-Israyeli nibakazwa mu-Ijipita, 46 muchilawu chaJodani, mukkuti lilangene* aaBbeti-peyori munyika yamwaami Sihoni wama-Amori, ooyo wakali kukkala kuHeshibboni, Mozesi ama-Israyeli ngubakazunda nibakazwa mu-Ijipita. 47 Bakakona nyika yakwe anyika yamwaami Ogi waBbashani, baami babili bama-Amori bakali kukkala muchilawu chaJodani chili kubuzwezuba, 48 kuzwa ku-Arowa iili kunkomwe yaKalonga ka-Anoni, kuyoosika kuChilundu chaSiyoni nkukwaamba Hemoni, 49 a-Arabba yoonse iili muchilawu chili kubuzwezuba aaJodani, kuyoosika kuLwizi lwa-Arabba,* kunsi aaminkunu yaPisiga.