Baami Wachibili
21 Manase wakali aaminyaka iili 12 naakaba mwaami, alubo wakeendelezya kwaminyaka iili 55 muJerusalema. Banyina bakali kutegwa Hefizibba. 2 Wakachita zibi mumeso aaJehova, katobela michito iisesemya yazisi eezyo Jehova nzyaakatanda kunembo lyama-Israyeli. 3 Wakayakulula ndawu zyakukombela eezyo Hezekkiya wisi nzyaakali wadilisya, alubo wakayaka zipayililo zyaBbaala akupanga chisamu chisalala,* mbuli mbaakali wachita Ahabbu mwaami wa-Israyeli. Wakakotamina makamu woonse aakujulu akwaabelekela. 4 Alubo wakayaka zipayililo mung’anda yaJehova, eeyo Jehova njaakaamba kuti: “Ndizoobikka zina lyangu muJerusalema.” 5 Wakayaka zipayililo zyamakamu woonse aakujulu mumabuwa aabili aang’anda yaJehova. 6 Alubo wakatenta* mwanaakwe mumulilo. Wakali kuchita masalamusi, wakali kusonda, alubo wakasala basondi abasikwaamba zitazoochitike kunembo. Wakachita zibi zyiingi loko mumeso aaJehova kuti amunyemye.
7 Wakabikka chikozyano chibezedwe chachisamu chisalala* nchaakapanga mung’anda, eeyo Jehova njaakali wabuzya Davida amwanaakwe Solomoni kuti: “Mung’anda eeyi amuJerusalema, ndawu njindasala aakati kamisyobo yoonse ya-Israyeli, ndizoobikka zina lyangu kukabe kutamani. 8 Tandizoopi kuti mawulu aama-Israyeli ayendengane lubo munyika njindakapa masianyinakulu, kuti kakuli kuti bazibamba amoyo woonse zintu zyoonse nzindakabalayilila, nkukwaamba Mulawu woonse mubelesi wangu Mozesi ngwaakabalayilila kuti bawutobele.” 9 Pesi teebakaswiilila pe, alubo Manase wakaliswini kubasowa, kapa kuti bachite zibi zipati kwiinda zisi eezyo Jehova nzyaakali wanyonyoona kunembo lyama-Israyeli.
10 Jehova wakaliswini kwaambuula kabelesya babelesi bakwe bapolofita kati: 11 “Manase mwaami waJuda wachita zintu zyoonse eezi zisesemya. Wachita zibi zyiingi kwiinda ma-Amori boonse bakamusaangunina, alubo wapa kuti Juda abisye akaambo kachibumbwa chakwe chisesemya.* 12 Nkinkaako, nzezi nzyaamba Jehova Leza wa-Israyeli: ‘Lino ndiyanda kweeta penzi muJerusalema amuJuda, litape kuti muntu woonse uutalimvwe mubili wakwe utilimuke. 13 Ndizootalamuna ntambo yakupimya aamuunzi waJerusalema eeyo yakabelesegwa kupima Samariya, alubo ndizoobelesya chibelesyo chakweelanisya chakabelesegwa aang’anda ya-Ahabbu. Ndizoopukuta muunzi waJerusalema usalale, mbuli muntu mbapukuta ndido kuti isalale, ulayipukuta mpawo ulayitibbika.* 14 Ndizoobalekelezya basyeede balukono lwangu ndibabikke mukuboko kwabasinkondonyina, mpawo basinkondonyina boonse bazoobatola mubuzike akubanyanga zintu zyabo, 15 nkaambo bakachita zibi mumeso aangu alubo bakaliswini kundinyemya kuzwa mubuzuba masianyinakulu nibakazwa mu-Ijipita kusika sunu.’”
16 Alubo Manase wakatila ganzi jingi loko lyabantu batakwe mulandu kusikila wazuzya Jerusalema kuzwa kubbazu limwi kusika kubbazu limwi, kuyungizya kuchibi chakwe nchaakapa kuti Juda abisye kwiinda mukuchita zibi mumeso aaJehova. 17 Makani aachiindi woonse aali atala aManase, azintu zyoonse nzyaakachita azibi nzyaakachita, taalembedwe na mubbuku lyamakani aachiindi aaziindi zyabaami baJuda? 18 Mpawo Manase wakalazikwaamwi amasianyinakulu alubo wakazikkwa mumuunda wakali aang’anda yakwe, mumuunda wa-Uza. Mwanaakwe Amoni wakaba mwaami mundawu yakwe.
19 Amoni wakali aaminyaka iili 22 naakaba mwaami, alubo wakeendelezya kwaminyaka iibili muJerusalema. Banyina bakali kutegwa Meshulemeti mwana waHaruzi wakuJotibba. 20 Wakaliswini kuchita zibi mumeso aaJehova, mbuli Manase wisi mbaakachita. 21 Wakaliswini kweenda munzila zyoonse wisi nzyaakeenda, alubo wakaliswini kubelekela zibumbwa zisesemya akuzikotamina, eezyo wisi nzyaakali kubelekela. 22 Nkinkaako, wakasiya Jehova Leza wamasianyinakulu, alubo taakeenda munzila yaJehova pe. 23 Mpawo babelesi ba-Amoni bakamubukila alubo bakajaya mwaami mung’anda yakwe. 24 Pesi bantu bamunyika eeyo bakajaya bantu boonse bakabukila Mwaami Amoni, mpawo bakabikka mwanaakwe Josiya kuti abe mwaami mundawu yakwe. 25 Makani aachiindi woonse aali atala a-Amoni, azintu nzyaakachita, taalembedwe na mubbuku lyamakani aachiindi aaziindi zyabaami baJuda? 26 Nkinkaako, bakamuzikka mukabanda kakwe mumuunda wa-Uza, mpawo mwanaakwe Josiya wakaba mwaami mundawu yakwe.